ەلىمىزدىڭ بولاشاق عىلىمي الەۋەتىن قالىپتاستىرۋ ماقساتىندا ۇيىمداستىرىلىپ جۇرگەن كونكۋرستا «دارىن» رەسپۋبليكالىق عىلىمي-پراكتيكالىق ورتالىعىنىڭ ديرەكتورى بورانباي اقجول ءسوز الىپ, رەسپۋبليكالىق جارىسقا جولداما العان وقۋشىلاردى قۇتتىقتادى.
كونكۋرس وقۋشىلاردىڭ جاراتىلىستانۋ عىلىمدارىنا قىزىعۋشىلىعىن ارتتىرىپ, جوعارى سىنىپ وقۋشىلارىن عىلىم مەن تەحنيكانىڭ ءار ءتۇرلى سالالارىنداعى شىعارماشىلىق قىزمەتكە تارتۋ ماقساتىندا ۇلتتىق عىلىم اكادەمياسىنىڭ قامقورلىعىمەن وتكىزىلەدى.
قازىلار القاسىنىڭ قۇرامىنا جەتەكشى وتاندىق جوعارى وقۋ ورىندارىنىڭ: ءال-فارابي اتىنداعى قازاق ۇلتتىق ۋنيۆەرسيتەتى, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى, قازاقستان-بريتان تەحنيكالىق ۋنيۆەرسيتەتى, ق.ي.ساتباەۆ اتىنداعى قازاق ۇلتتىق تەحنيكالىق ۋنيۆەرسيتەتى, حالىقارالىق اقپاراتتىق تەحنولوگيالار ۋنيۆەرسيتەتى سىندى باسقا دا جوعارى وقۋ ورىندارىنىڭ وكىلدەرى كىرەدى.
رەسپۋبليكالىق عىلىمي جوبالار كونكۋرسى – «قازاقستان – 2050» ستراتەگياسىنداعى قازاقستان دامۋىنىڭ ەكونوميكالىق جانە الەۋمەتتىك مودەلدەرى» تاقىرىبى اياسىنداعى وقۋشىلاردىڭ عىلىمي زەرتتەۋلەر كونكۋرسى. كونكۋرس ءتورت باعىت بويىنشا وتكىزىلەدى: «عىلىمي-تەحنيكالىق پروگرەسس – ەكونوميكالىق ءوسۋدىڭ نەگىزگى بۋىنى», «ەكونوميكالىق جانە الەۋمەتتىك پروتسەستەردى ماتەماتيكالىق مودەلدەۋ», «تازا تابيعي ورتا – قازاقستان - 2050 ستراتەگياسىن ىسكە اسىرۋدىڭ نەگىزى», «قازاقستاننىڭ تاريحي ەسكەرتكىشتەرى جانە بولاشاعى بار ساياحات باعدارلارى».
بايقاۋدىڭ قورىتىندى كەزەڭىندە 751 جاس زەرتتەۋشى 590 عىلىمي جوبانى قورعايدى. كونكۋرس قورىتىندىسى بويىنشا جەڭىمپازداردان تۇراتىن ەلىمىزدىڭ قۇراما كومانداسى 10-15 مامىر ارالىعىندا اناحايم قالاسىندا (كاليفورنيا شتاتى) وتكىزىلەتىن جىل سايىنعى ISEF-2020 وقۋشىلاردىڭ حالىقارالىق عىلىمي جوبالار كونكۋرسىندا ءوز جۇمىستارىن ۇسىنادى.
كونكۋرستى وتكىزۋ ەرەجەسىنە سايكەس جەڭىمپازدار مەن جۇلدەگەرلەر ءبىلىم جانە عىلىم مينيسترلىگىنىڭ I, II, III دارەجەلى ديپلومدارىمەن ماراپاتتالادى.
بيىل وقۋشىلاردىڭ جوبالارىن قورعاۋدا اشىقتىقتى قامتاماسىز ەتۋ ماقساتىندا كونكۋرس ونلاين ۇيىمداستىرىلادى. بەينەترانسلياتسياعا سىلتەمەلەر قر بعم جانە «دارىن» رعپو-نىڭ الەۋمەتتىك جەلىلەردەگى اككاۋنتتارىندا ۇسىنىلاتىن بولادى.
