اتاپ ايتقاندا, ديپلومات سوڭعى جىلدارى قازاقستاننان شارم ال-شەيح پەن حۋرگاداعا تىكەلەي چارتەرلىك رەيستەر اشىلۋىنىڭ ارقاسىندا مىسىر كۋرورتتارىنا كەلەتىن قازاقستاندىق تۋريستەردىڭ سانى ەداۋىر ارتقانىن ايتتى. بيىلدان باستاپ مىسىردا كەڭىنەن جۇرگىزىلىپ جاتقان اقپاراتتىق-جارنامالىق كامپانيانىڭ ارقاسىندا مىسىرلىق تۋريستەردىڭ ءبىزدىڭ ەلگە كەلۋگە دەگەن قىزىعۋشىلىعى دا ارتۋدا. وسىعان وراي ەلشى ەكى ەل اراسىنداعى تۋريستىك اعىمدى كەڭەيتۋ ءۇشىن مىسىرلىق اۋەكومپانيالاردىڭ قازاقستانعا تىكەلەي اۋە رەيستەرىن اشۋعا قولعابىس بەرۋدى سۇرادى. ح.ءال-انناني مار ازاماتتىق اۆياتسيامەن بىرلەسىپ بۇل ماسەلەنى جاقىن ارادا شەشۋگە ۋادە ەتتى. ءمينيستردىڭ ايتۋىنشا, قوسىمشا رەيستەردىڭ اشىلۋى تەك ءوزارا ءتۋريزمنىڭ وسۋىنە عانا ەمەس, ەكى ەل اراسىنداعى بيزنەس قاتىناستارى مەن ساۋدا-ەكونوميكالىق ىنتىماقتاستىقتىڭ جاندانۋىنا سەرپىن بەرەدى.
بۇعان قوسا ا.يساعاليەۆ ۇلى دالا ەلىنىڭ داڭقتى پەرزەنتى سۇلتان بەيبارىستىڭ كايردەگى مەشىتىن قالپىنا كەلتىرۋ جۇمىستارىن جاڭعىرتقانى ءۇشىن مىسىردىڭ ۇكىمەتى مەن كونە ەسكەرتكىشتەر جانە تۋريزم مينيسترلىگىنە زور العىس ءبىلدىردى. قازىرگى كەزدە جۇمىستار قارقىندى جۇرگىزىلۋدە. بۇل جوبانىڭ باس مەردىگەرى – مىسىر مەن تاياۋ شىعىستاعى ەڭ ءىرى Arab Contractors قۇرىلىس كومپانياسى وكىلدەرىنىڭ ايتۋىنشا, مەشىتتى رەستاۆراتسيالاۋ جۇمىستارى تولىعىمەن 2020 جىلعى شىلدەدە اياقتالۋى ءتيىس. سۇلتان بەيبارىس مەشىتى – كايردەگى ايتۋلى تاريحي ورىنداردىڭ ءبىرى. بۇل عيماراتتىڭ تۇرعىزىلعانىنا 8 عاسىرعا تاياۋ ۋاقىت وتكەن. مەشىتتىڭ ۇزىندىعى – 108, ال ەنى – 105 مەتر. دۋال رەتىندە قالانعان تاس قابىرعالارىنىڭ بيىكتىگى 11 مەترگە جۋىق.
2007 جىلى ەلىمىز سيريا استاناسى داماسكىدەگى بەيبارىس سۇلتان كەسەنەسىن قايتا قالپىنا كەلتىرۋدى, وسى ەجەلگى شام شاھارىندا داڭقتى بابامىز ءال-فارابيدىڭ تاريحي-مادەني ورتالىعى مەن كەسەنەسىن سالۋدى, مىسىرلىق كايردە بەيبارىس سۇلتان مەشىتىن قالپىنا كەلتىرۋدى قولعا الىپ, قارجى ءبولدى. بۇل تاۋەلسىز قازاقستان تاريحىنداعى شەت مەملەكەتتىڭ اۋماعىندا تۇرعىزىلعان تۇڭعىش ءىرى مادەني وبەكتىلەرىمىز بولىپ ەسەپتەلەدى. بۇل ەسكەرتكىشتەردىڭ بارلىعى تەك قازاقستان, سيريا جانە مىسىر ءۇشىن عانا ەمەس, سونداي-اق, شىعىس جانە ەۋروپانىڭ بىرقاتار ەلى ءۇشىن دە زور تاريحي-مادەني ماڭىزعا يە. مىسىردا تۋىنداعان ساياسي-ەكونوميكالىق احۋالعا, رەۆوليۋتسيادان كەيىنگى كۇيزەلىستەرگە بايلانىستى بۇل ءىس توقتاتىلعان.
ەلىمىزدىڭ سىرتقى ىستەر مينيسترلىگىنىڭ دەرەگىنشە, مەشىتتى رەستاۆراتسيالاۋ جوباسىنىڭ قازىرگى جالپى قۇنى 12 ميلليون اقش دوللارىن قۇرايدى. ونىڭ 4,5 ميلليونىن قازاقستان ۇكىمەتى كەزىندە ءبولدى. مىسىر بولسا, قوسا قارجىلاندىرۋ ماقساتىندا 100 ميلليون ەگيپەتتىك فۋنت (شامامەن 5,6 ميلليون دوللار) اۋدارعان. قازاقستان ەلشىسى ارمان يساعاليەۆتىڭ ايتۋىنشا, باس مەردىگەر مەن مىسىردىڭ كونە ەسكەرتكىشتەر مينيسترلىگى اراسىندا جوبانىڭ قۇنىنا قاتىستى بۇعان دەيىن بولعان داۋلار مىسىر پرەمەر-ءمينيسترىنىڭ جەكە ارالاسۋى ارقاسىندا شەشىمىن تاپتى.
