سالادا قوردالانعان كوپ ساۋالعا وراي اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە بولاشاق پەداگوگ ماماندارمەن وتكەن كەزدەسۋدە ءبىلىم جانە عىلىم ءمينيسترى اسحات ايماعامبەتوۆ جاۋاپ بەردى. بۇگىندە ەلىمىزدە پەداگوگ مامانداردى دايارلايتىن 85 جوعارى وقۋ ورنى بار دەسەك, ولاردىڭ سانى ەمەس, ساپاسىنا الاڭداۋشىلىعىن بىلدىرگەن مينيستر قازىرگى كەزدە تالاپقا ساي كەلمەيتىن وقۋ ورىندارى انىقتالىپ, ارنايى تەكسەرۋدەن ءوتىپ جاتقانىنا توقتالدى. ساپاسىز ءبىلىم بەرەتىن وقۋ ورىندارىنىڭ كوپتىگىنەن ەلىمىزدە 2016 جىلدان بەرگى ارالىقتا ەنگىزىلگەن جاڭاشىلدىقتان بەيحابار مامانداردىڭ تاربيەلەنىپ شىققانىنا قىنجىلىسىن بىلدىرگەن مينيستر, جاڭا زاڭ اياسىندا پەداگوگ مامانداردىڭ جۇمىس ىستەۋىنە قولايلى جاعدايلارمەن قاتار تالاپتىڭ دا كۇشەيەتىنىن جەتكىزدى. وسىعان وراي جوعارى وقۋ ورىندارى دا وقىتۋ باعدارلامالارىن جاڭارتۋى ءتيىس.
ال بيىلدان باستاپ پەداگوگ ماماندىعىنا باراتىن تۇلەكتەر ءۇشىن شەكتى بالل 70-ءتى قۇرايتىن بولادى. سونىمەن قاتار 2021 جىلدان باستاپ ءاربىر جوعارى وقۋ ورنىنىڭ ديپلومى ەنگىزىلەتىن بولادى. جۇمىس بەرۋشىلەر جاس ماماننىڭ بىلىكتىلىگىن, ءبىلىم ساپاسىن وسى ديپلومعا قاراپ تاڭدايدى. مۇنداي تالاپتار جوعارى وقۋ ورىندارى ءۇشىن ءبىلىم ساپاسىن ارتتىرۋعا ىقپال ەتەتىنى ءسوزسىز, دەيدى مينيستر. ال جاس پەداگوگ ۇلتتىق باعالاۋ تەستىنەن ءوتىپ, پەداگوگ-مودەراتور سەرتيفيكاتىن المايىنشا, مەكتەپتەرگە جىبەرىلمەيدى. ءارى قاراي پەداگوگ-مودەراتور سەرتيفيكاتىن العان جاس ماماننىڭ ەڭبەكاقىسىنا ۇستەمەاقى تولەنەدى. مۇنداي ۇستەمەاقى, ياعني 25 مىڭ تەڭگە كولەمىندە مەكتەپتەرگە ماگيسترلەردى تارتۋ ماقساتىندا دا قاراستىرىلىپ وتىر. مەكتەپكە كەلگەن جاس مۇعالىمنىڭ تالىمگەرىنە ءبىر جىلعى ەڭبەگى ءۇشىن اي سايىن 17500 تەڭگە كولەمىندە ۇستەمەاقى تولەنەدى. ەكونوميكالىق كورسەتكىشتەرگە بايلانىستى تولەم بارىسى جىل سايىن وزگەرىپ وتىرادى.
جاڭا مۇمكىندىكتەر جايىنان حاباردار ەتىپ, جاس پەداگوگتەردى ۇلاعاتتى ۇرپاق تاربيەلەۋ ىسىنە شاقىرعان مينيستر ا.ايماعامبەتوۆ قازىرگى كەزدە رەسپۋبليكادا 1-10 سىنىپتارى جاڭارتىلعان وقۋ باعدارلاماسىنا كوشسە, اعىمداعى جىلدىڭ قىركۇيەگىنەن باستاپ 11-سىنىپتار دا قوسىلادى دەپ اتاپ ءوتتى.
الماتى
