الەمدى بي ىرعاعىمەن باۋراعان كارناۆالدار ەلىندە سۇرىپتالىپ, ءتۇرلى سىناقتان وتكەن جەكپە-جەككە «اشە كاپوەيرا» دەگەن رەسمي اتاۋ بەرىلگەن. مۇنىڭ نەگىزىن برازياليالىق اتاقتى بي شەبەرى, سپورتشى گراند مەشترە باححاو قالاعان. سپورتتىق جەكپە-جەك ءتۇرى رەتىندە ەڭ جاس ونەر بولىپ تانىلعانىمەن, كاپوەيرومەن شۇعىلدانۋشىلار قاتارى ءبىر قاۋىم ەلگە اينالىپتى. قازىر بۇل سپورتتان دۇنيەجۇزىلىك جارىستار ءوتىپ تۇرادى. ءتىپتى الىس قۇرلىقتان باستالعان ونەر داڭقى تالدىقورعانعا دەيىن جەتىپ ۇلگەرگەن. وسى جەكپە-جەكتەن وتكەن الەمدىك دوداعا جەتىسۋ جەرىنىڭ عانا ەمەس, جالپاق قازاقستاننىڭ نامىسىن قورعاپ بارعان جەتكىنشەك ەۋروپا چەمپيونى اتانىپتى.
تالدىقورعاندىق ۆيكتور كيم – وتكەن جىلدىڭ سوڭىندا پاريج قالاسىندا ەكىنشى رەت ۇيىمداستىرىلعان Vet Mandingueira فەستيۆالىنە قازاقستاننان بارعان جالعىز قاتىسۋشى. وسى فەستيۆال اياسىندا كاپوەيرو-Calado ءتۋرنيرى وتكەن ەكەن. كىشكەنتاي كاپوەيروشى سوندا شارشى الاڭعا شىعىپ, قارسىلاستارىنىڭ بارلىعىن جەڭىپتى. ءسويتىپ ەۋروپا چەمپيونى اتاندى. تالدىقورعاندىق جەتكىنشەكتىڭ جەتىستىگىنە جەكپە-جەك ونەرىنىڭ اتاسى سانالاتىن گراند مەشترە باححاونىڭ ءوزى ءتانتى بولىپ, تىلەكتەستىگىن بىلدىرگەن ەكەن.
– ۆيكتور بولاشاعىنان ۇلكەن ءۇمىت كۇتتىرەتىن سپورتشى. جالپى, كاپوەيرومەن شۇعىلدانۋ دەنە ەڭبەگىن عانا ەمەس, ادامنىڭ سانا-سەزىمىن, ويلاۋ قابىلەتىنىڭ تەرەڭدىگىن قاجەت ەتەدى. ويتكەنى بۇل ونەر سوققى مەن اكروباتيكا ەلەمەنتتەرىنىڭ جيىنتىعى عانا ەمەس, ءبۇتىن فيلوسوفيالىق جۇيەگە قۇرىلعان قيمىل-قوزعالىس جەلىسى. ياعني, كاپوەيروشىعا كۇش, جىلدامدىق, ىشكى قۋاتپەن قاتار سانانى دا جۇرەكپەن باسقارا ءبىلۋ داعدىسى ءتان. شاكىرتىمنىڭ بويىنان وسى تالاپقا ساي كەلەتىن ۇشقىندى بايقايمىن. ناتيجە جامان ەمەس. فرانتسيادا وتكەن چەمپيوناتتا جەڭىس تۇعىرىنا كوتەرىلدى. ەۋروپانىڭ جاس كاپوەيروشىلارى ۆيكتوردىڭ مىقتىلىعىن مويىندادى, – دەيدى جاتتىقتىرۋشى رۋستام بالاباەۆ.
الماتى وبلىسى
