– وبلىستىق توتەنشە جاعدايلار دەپارتامەنتىنىڭ قۇتقارۋشىلارى سوڭعى ءۇش تاۋلىك ىشىندە 21 قۇتقارۋ شاراسىن وتكىزىپ, قار قۇرساۋىندا قالعان 121 جولاۋشىنىڭ ءومىرىن امان الىپ قالدى. ولاردىڭ ىشىندە 6 بالا بار. زارداپ شەككەندەر جوق. قۇتقارۋ جۇمىستارى ءالى دە جالعاسۋدا. قاڭتاردىڭ 28-ىنە قاراعان ءتۇنى امانكەلدى, قامىستى, اۋليەكول, قوستاناي اۋداندارى مەن ارقالىق قالاسىنىڭ ماڭىندا 8 قۇتقارۋ شاراسىن وتكىزدى. ناتيجەسىندە كولىكتەرى قارعا باتىپ قالعان 22 ادام قۇتقارىلىپ, قاۋىپسىز جەرگە جەتكىزىلدى, – دەيدى وبلىستىق توتەنشە جاعدايلار دەپارتامەنتىنىڭ ءباسپاسوز حاتشىسى ءۋاليحان دوسانوۆ.
وبلىس قۇتقارۋشىلارى كۇن-ءتۇن دەمەي قىراعى كۇزەتتە تۇر. ولار جولدا قالعانداردى قۇتقارۋمەن قاتار, قار قۇرساۋىنداعى ەلدى مەكەندەردىڭ تۇرعىندارىنا كومەك كورسەتۋدە. ماسەلەن, 27 قاڭتار كۇنى چەرنيگوۆ اۋىلىنىڭ اكىمى اۋليەكول اۋدانىنىڭ قۇتقارۋشىلارىنا حابارلاسىپ, ىستىعى كوتەرىلىپ جاتقان 3 ايلىق نارەستەنى 45 شاقىرىم قاشىقتىقتا جاتقان اۋداندىق اۋرۋحاناعا شۇعىل جەتكىزۋدى سۇراعان. ارنايى تەحنيكانىڭ كۇشىمەن ەلدى مەكەنگە جەدەل جەتكەن قۇتقارۋشىلار انا مەن بالانى دەر كەزىندە اۋرۋحاناعا جەتكىزدى.
«قازگيدرومەتتىڭ» وبلىستىق فيليالىنىڭ ينجەنەر-سينوپتيگى سۆەتلانا كاننىڭ ايتۋىنشا, سارسەنبىدەن باستاپ وڭىردە بوران تولاستاپ, ارتى ايازعا ۇلاسادى.
نۇرقانات قۇلاباەۆ
قوستاناي وبلىسى
