قوعام • 28 قاڭتار، 2020

كاسىپوداقتار فەدەراتسياسىنىڭ قاتارى تولىعىپ جاتىر

29 رەتكورسەتىلدى

قازاقستان رەسپۋبليكاسى كاسىپوداقتار فەدەراتسياسىنىڭ قاتارى تولىعىپ جاتىر. بۇل تۋرالى فەدەراتسيانىڭ ءباسپاسوز قىزمەتى حابارلادى. 

باس كەڭەس مۇشەلەرى فەدەراتسيا قۇرامىنا 15 مىڭ كەنشىنى، «ارسەلور ميتتال تەمىرتاۋ» اق كومىر دەپارتامەنتىنىڭ جۇمىسشىلارىن بىرىكتىرىپ وتىرعان جاڭا «قازكومىركاسىپوداعى» كومىر وندىرۋشىلەر سالالىق كاسىپوداعىن قابىلدادى.

كەنشىلەردىڭ «قازكومىركاسىپوداعى» جاڭا كاسىپوداعى 2001 جىلى قۇرىلعان «قورعاۋ» كومىر وندىرۋشىلەر كاسىپوداعى بازاسىندا قۇرىلدى. ونىڭ توراعاسى مارات ميرگايازوۆ كاسىپوداقتار فەدەراتسياسى كەنشىلەردىڭ قۇقىعىن ارقاشان قورعاپ وتىراتىنىن اتاپ ءوتتى. 

ء«بىز كاسىپوداقتار فەدەراتسياسىمەن بىرگە ەكەنىمىزدى ارقاشان سەزىنەمىز. كف ارقاسىندا كەنشىلەردىڭ كوپتەگەن ماسەلەسى ءوز شەشىمىن تاپتى»، – دەپ اتاپ ءوتتى م.ميرگايازوۆ.

ءوز كەزەگىندە كف توراعاسى ەرالى توعجانوۆ ەڭبەك ادامىنىڭ قۇقىعىن قورعاۋداعى كاسىپوداقتاردىڭ ءرولىن ايرىقشا اتاپ ءوتتى.

«قازاقستاندىق كەنشىلەر ەڭ قاۋىپتى جانە اۋىر ەڭبەك جاعدايىندا جۇمىس ىستەيدى. وسى ورايدا ولار ءوز قۇقىقتارىنىڭ سەنىمدى قورعالۋىن قاجەت ەتەدى. كف مۇشە ۇيىمداردىڭ الدىندا تۇرعان باستى مىندەت - لايىقتى ەڭبەك شارتتارىن قۇرۋ، تۇراقتى جالاقى جانە قاراپايىم ەڭبەككەرلەردىڭ مۇددەلەرىن تولىققاندى قورعاۋ»، - دەپ اتاپ ءوتتى كف باسشىسى.

كومىر وندىرۋشىلەر كاسىپوداعى مۇشەلەرىنىڭ پىكىرىنشە، «قازكومىركاسىپوداعىنىڭ» ەلىمىزدىڭ كاسىپوداقتار فەدەراتسياسىنىڭ قۇرامىنا كىرۋى تاۋ-كەن مەتاللۋرگيا ونەركاسىبىنىڭ جۇمىسشىلارىنىڭ مۇددەلەرىن قورعاۋدا كۇش بىرىكتىرۋگە جانە الەۋمەتتىك ارىپتەستىكتىڭ جوعارى دەڭگەيىندە ديالوگ جۇرگىزۋگە مۇمكىندىك بەرەدى.

ت. كۇزەمباەۆ اتىنداعى شاحتانىڭ كاسىپوداق كوميتەتىنىڭ توراعاسى قالقامان احمەتوۆ ءوز سوزىندە كەنشىلەردىڭ جاڭا سالالىق كاسىپوداعىن قۇرۋ تۋرالى يدەيا كوپتەن بەرى ويدا جۇرگەنىن العا تارتتى.

«بۇل شەشىم ۋاقىت تالابى مەن كەنشىلەردىڭ بارلىق ماسەلەسىن شەشۋ قاجەتتىگىنەن تۋىنداپ وتىر. ياعني، جاڭا قوعامدىق بىرلەستىك كوپ جىلدان بەرى «ارسەلور ميتتال تەمىرتاۋ» اق كەنشىلەرىنىڭ مۇددەلەرىن قورعاپ كەلە جاتقان «قورعاۋ» كومىر وندىرۋشىلەر كاسىپوداعى بازاسىندا قۇرىلدى. كۇزەمباەۆ اتىنداعى شاحتانىڭ كەنجارىندا كاسىپوداقتار فەدەراتسياسىنىڭ توراعاسى ەرالى توعجانوۆپەن كەزدەسۋ بارىسىندا ءبىز كاسىپوداقتار فەدەراتسياسىنىڭ قۇرامىنا كىرۋ ارقىلى دۇرىس شەشىم قابىلداپ جاتقانىمىزعا كۋا بولدىق. وسى جىلدار ىشىندە ول - ءار كەنشىمەن سويلەسۋ ءۇشىن 600 مەتر تەرەڭدىككە تۇسكەن جوعارى دارەجەدەگى ءبىرىنشى باسشى»، - دەدى ول. 

ال ي.كوستەنكو اتىنداعى شاحتانىڭ كاسىپوداق كوميتەتىنىڭ توراعاسى ۆلاديمير كووپ «قورعاۋ» كومىر وندىرۋشىلەر كاسىپوداعى مەتاللۋرگتەردىڭ سالالىق كاسىپوداعىنىڭ قۇرامىندا بولا تۇرا، كەنشىلەر ماسەلەلەرىن جوعارعى دەڭگەيگە شىعارۋدا ناقتى شەكتەۋلەرگە ۇنەمى تاپ بولاتىنىن جەتكىزدى.

ء«بىز كەنشىلەردىڭ سالالىق كاسىپوداعىن قۇرۋ جانە ونىڭ كاسىپوداقتار فەدەراتسياسىنىڭ قۇرامىنا كىرۋى كەنشىلەردىڭ قۇقىقتارىن ناقتى قورعاۋعا جانە ولاردىڭ الەۋمەتتىك كەپىلدەرىن ۇلعايتۋعا مۇمكىندىك بەرەتىنىنە سەنەمىز. سەبەبى، كاسىپوداقتار فەدەراتسياسى الەۋمەتتىك ارىپتەستەرمەن ءوزارا ىنتىماقتاستىقتىڭ جوعارى دارەجەسىنە قول جەتكىزدى دەپ ەسەپتەيمىز»، - دەدى ول.

«قركف مۇشە بولۋ ارقىلى قاراپايىم كەنشىلەر سالانىڭ وزەكتى ماسەلەلەرىن پارلامەنت جانە ۇكىمەت دەڭگەيىنە شىعارۋعا مۇمكىندىك الدى. بۇگىندە ءبىز كاسىپوداقتار فەدەراتسياسىنداعى وكىلدىك ارقىلى كەنشىلەردىڭ باستامالارىن كوتەرۋ ءۇشىن بىرقاتار ۇسىنىس ازىرلەپ جاتىرمىز. بۇل ورايدا كف باسشىسى ەرالى توعجانوۆ ولاردىڭ كوبىسىن قولداپ، اتاپ ءوتتى. بۇل – كەنشىلەردىڭ زەينەت جاسى، كاسىپتىڭ ەسكىرۋى جانە كەنشىلەردىڭ الەۋمەتتىك كەپىلدەرى» دەيدى «شاحتينسكايا» شاحتاسىنىڭ كاسىپوداق كوميتەتىنىڭ توراعاسى ايبەك تويبەكوۆ. 

ەسكە سالا كەتسەك، بۇگىندە كاسىپوداقتار فەدەراتسياسىنىڭ قۇرامىنا 17 اۋماقتىق جانە 24 سالالىق كاسىپوداقتار بىرلەستىگى كىرەدى. كف مۇشەلەرىنىڭ جالپى سانى – 2 ملن ادام.

سوڭعى جاڭالىقتار

قىلمىستىق ءىس قوزعالدى

ايماقتار • كەشە

باستى اقپارات (21.02.2020)

ۆيدەو • 21 اقپان، 2020

ۇقساس جاڭالىقتار