ايماقتار • 28 قاڭتار، 2020

اقمولا وبلىسىندا بوس جاتقان 1،5 ميلليون گەكتار جەر انىقتالدى

61 رەتكورسەتىلدى

مەملەكەت باسشىسى قاسىم-جومارت توقاەۆ قازاقستان حالقىنا ارناعان جولداۋىندا اگروونەركاسىپتىك كەشەنگە ەرەكشە كوڭىل ءبولدى. ەل ۇكىمەتىنە سالانى ودان ءارى دامىتۋ بويىنشا ناقتى تاپسىرمالار بەرىلدى.

بۇگىنگى تاڭدا اقمولا وبلىسى اۋماعىندا اۋىل شارۋاشىلىعى ماقساتىنداعى 1،5 ميلليون گەكتارعا جۋىق جەردىڭ پايدالانىلماي جاتقانى انىقتالىپ وتىر. جەرگىلىكتى اتقارۋشى ورگان وكىلدەرى بۇل باعىتتا شارۋالارمەن جالعا الۋ تۋرالى كەلىسىمشارتتاردى بۇزۋ، جەردى مەملەكەتكە قايتارۋ سياقتى شارالاردى قولعا الىپ جاتىر. ناتيجەسىندە 730 مىڭ گەكتار جەردى اينالىمعا قوسۋ بويىنشا جۇمىس جۇرگىزىلۋدە.

– قالعان 775 مىڭ گەكتار جەردى ماقساتتى پايدالانۋ بويىنشا جازباشا ەسكەرتۋلەر جىبەرىلدى. اعىمداعى جىلى ولارعا باقىلاۋ جۇرگىزىپ، تەكسەرەتىن بولامىز. تالاپتى ورىنداماسا، مەملەكەت مەنشىگىنە قايتارۋ بويىنشا ءتيىستى شارالاردى قولعا الامىز، – دەيدى وبلىستىق جەردىڭ پايدالانىلۋى مەن قورعالۋىن باقىلاۋ باسقارماسىنىڭ باسشىسى ەرعالي شورين.

اۋىل شارۋاشىلىعى سالاسىنا ساندىق تەحنولوگيالاردى ەنگىزۋ جۇمىستارى دا وبلىستا جۇيەلى تۇردە جۇرگىزىلۋدە. قازىردە ەگىستىك پەن كوپجىلدىق شوپتەر وسەتىن جەرلەر تولىق تسيفرلاندىرىلدى. ال شابىندىق جانە جايىلىمدىق جەرلەردى ساندىق جۇيەگە كوشىرۋ جۇمىستارى اياقتالۋعا شاق قالدى.

– بۇگىندە جايىلىمدىق جەرلەردى تسيفرلاندىرۋ جۇمىسىن 2407 جەر يەسى جۇرگىزدى. ياعني، 4 ميلليون گەكتار جەر ساندىق جۇيەگە كوشىرىلدى. بۇل - جوسپاردىڭ 89 پايىزى. ال شابىندىق جەرلەردىڭ 148 مىڭ گەكتارى تسيفرلاندىرىلدى. بۇل باعىتتاعى جۇمىستار ءالى دە جالعاسىن تابادى، – دەيدى وبلىستىق اۋىل شارۋاشىلىعى باسقارماسىنىڭ قىزمەتكەرى ۆالەري ليتوۆچەنكو.

اۋىل شارۋاشىلىق جەرلەرىن تسيفرلاندىرۋ ارقىلى شارۋالار وسىمدىك شارۋاشىلىعى سالاسىنداعى ءتۇرلى سۋبسيديالاۋ باعدارلامالارىنا قاتىسۋ مۇمكىندىگىنە يە بولادى. سەبەبى، وتكەن جىلدىڭ باسىنان سۋبسيديا الۋعا ءوتىنىش تەك ەلەكتروندى فورماتتا قابىلدانادى. ال بۇل ءوز كەزەگىندە جەردىڭ اقپاراتتىق جۇيەدە تىركەلۋىن تالاپ ەتەدى.

سوڭعى جاڭالىقتار

ەسىك نەگە «تەسىك»؟

قوعام • كەشە

ۇقساس جاڭالىقتار