قازاقستان • 28 قاڭتار، 2020

الماتىنىڭ مەديتسينالىق قىزمەتى كوروناۆيرۋسقا قارسى تۇرۋعا دايىن

158 رەتكورسەتىلدى

الماتىدا حالىقارالىق ستاندارتتار مەن بۇكىلالەمدىك دەنساۋلىق ساقتاۋ ۇيىمىنىڭ (بدسۇ) ۇسىنىستارىنا سايكەس كوروناۆيرۋس ينفەكتسياسىنىڭ-اسقىنعان ينفەكتسيالىق اۋرۋدىڭ تاراۋىن بولدىرماۋ بويىنشا ناقتىلى شارالار قابىلدانۋدا. بۇل تۋرالى الماتى اكىمى باقىتجان ساعىنتاەۆ «ينستاگرام» الەۋمەتتىك جەلىسىندەگى ءوزىنىڭ رەسمي پاراقشاسىندا حابارلادى.

اسقىنعان ينفەكتسيالىق اۋرۋدى اكەلۋگە جانە ونىڭ تاراۋىنا جول بەرمەۋ ماقساتىندا سانيتارلىق-پروفيلاكتيكالىق شارالار كۇشەيتىلدى. ايتار بولساق، اۋەجاي مەن تەمىرجول ۆوكزالدارى ارقىلى تۋريستىك جانە ميگراتسيالىق لەك وتەتىندىكتەن جولاۋشىلار تەكسەرىلۋدە. ۆيرۋس تاراعان وڭىرلەردەن ۇشىپ كەلگەن بارلىق رەيستەر ەرەكشە باقىلاۋعا الىنۋدا.

ينفەكتسيانى اكەلۋ مەن تاراتۋدى ەسكەرتۋ بويىنشا ەپيدەمياعا قارسى جانە سانيتارلىق-پروفيلاكتيكالىق شارالاردى جۇزەگە اسىرۋدىڭ ۆەدومستۆوارالىق جوسپارى جاسالدى. الماتى اۋەجايىنىڭ سانيتارلىق-كارانتيندىك پۋنكتىمەن بىرگە وقۋ-جاتتىعۋ ساباقتارى وتكىزىلدى. مۇنداي ساباقتار قالانىڭ ستاتسيونارلارىندا دا وتۋدە.

قالانىڭ مەديتسينالىق ۇيىمدارى مەن مەديتسينالىق قىزمەتكەرلەرى كوروناۆيرۋس ينفەكتسياسىنا كۇدىكتەلگەن اۋرۋلاردى قابىلداۋعا دايىن. ءدارى-دارمەكتىڭ قاجەتتى قورى جەتكىلىكتى، ولاردىڭ ىشىندە پاراتسەتامول، يبۋپروفەن، گليۋكوزا ەرىتىندىسى، فيزوەرىتىندىلەر، پرەدنيزولون، دەكسامەتازون، گەپارين، كونتريكا، سونىمەن قاتار انتيباكتەريالدى جانە ۆيرۋسقا قارسى پرەپاراتتار مەن دەزينفەكتسيالىق زاتتار بار. قالانىڭ مەدمەكەمەلەرىندە 690 مىڭنان استام، ال رەزەرۆتە 1،3 ملن بىررەتتىك بەتپەردەلەر بار. قالانىڭ ءدارىحانالارى دارىلەرمەن جانە بەتپەردەلەرمەن جەتكىلىكتى مولشەردە قامتاماسىز ەتىلگەن.

قالالىق ينفەكتسيالىق اۋرۋحانادا 20 توسەكتىك بوكس بولىمى جانە جانساقتاۋ ءبولىمى اشىلعان. ەگەر جاعداي كۇردەلەنەتىن بولسا، وندا №1 قكا قوسىمشا 200 توسەك، بالالاردىڭ №2 قكا 20 توسەك قوسىمشا دايىندالاتىن بولادى. الماتىدا (727) 382-35-36، 382-33-50 تەلەفوندارى، سونىمەن قاتار دەنساۋلىق ساقتاۋ مينيسترلىگىندە 1406 ءنومىرى بويىنشا «جەدەل جەلىلەر» ۇيىمداستىرىلعان.

سوڭعى جاڭالىقتار

قىلمىستىق ءىس قوزعالدى

ايماقتار • كەشە

باستى اقپارات (21.02.2020)

ۆيدەو • 21 اقپان، 2020

ۇقساس جاڭالىقتار