كوميسسيا قۇرامىنا دەنساۋلىق ساقتاۋ, سىرتقى ىستەر, ىشكى ىستەر, ءبىلىم جانە عىلىم, قارجى, يندۋستريا جانە ينفراقۇرىلىمدىق دامۋ, مادەنيەت جانە سپورت, اقپارات جانە قوعامدىق دامۋ مينيسترلىكتەرىنىڭ, ۇقك شەكارا قىزمەتىنىڭ باسشىلارى, الماتى, شىعىس قازاقستان, ماڭعىستاۋ, اقتوبە وبلىستارىنىڭ, نۇر-سۇلتان جانە الماتى قالالارى اكىمدەرىنىڭ ورىنباسارلارى كىردى.
«قىتايدا 2700-دەن اسا كوروناۆيرۋسپەن سىرقاتتانۋ وقيعاسى تىركەلدى, 80 ادام كوز جۇمدى. الەمدە اۋرۋ جۇعۋدىڭ 50 وقيعاسى تىركەلدى. مەملەكەت باسشىسىنىڭ تاپسىرماسى بويىنشا ۇكىمەت قورعانۋ شارالارىن قابىلدادى, ءتيىستى ءىس-شارالار جوسپارى ازىرلەندى», دەدى ۆيتسە-پرەمەر.
وتىرىستا شەكارادا سانيتارلىق-ەپيدەميولوگيالىق باقىلاۋدى كۇشەيتۋ, قحر-دان كەلۋشىلەردىڭ بارلىعىن تۇرعىلىقتى جەرى بويىنشا باقىلاۋ, مەديتسينا ۇيىمدارى مەن قىزمەتكەرلەرىنىڭ ازىرلىگىن قامتاماسىز ەتۋ, قحر-دان كەلەتىن ترانزيتتىك جولاۋشىلار ءۇشىن ەل اۋماعىندا 72 ساعاتتىق ۆيزاسىز بولۋ رەجىمىنىڭ كۇشىن توقتاتۋ جانە باسقا دا ماسەلەلەر قارالدى.
سونىمەن قاتار ۋحان قالاسىنداعى قازاقستان ازاماتتارىن ەۆاكۋاتسيالاۋ ماسەلەسى تالقىلاندى.
سىرتقى ىستەر ءمينيسترىنىڭ ءبىرىنشى ورىنباسارى ش.نۇرىشەۆتىڭ ايتۋىنشا, ۋحان قالاسىندا بۇگىندە قازاقستاندىق 98 ستۋدەنت بار. ديپلوماتتار ولارمەن بايلانىستا جانە قحر ءسىم-مەن بىرلەسىپ ولاردى ەۆاكۋاتسيالاۋ ماسەلەسىن پىسىقتاۋدا. قحر-داعى قازاقستان ەلشىلىگىندە جەدەل جەلى اشىلدى, تاۋلىك بويعى كەزەكشىلىك ۇيىمداستىرىلدى. بۇل رەتتە, قىتاي تاراپى ءالى ەشقانداي مەملەكەتكە ءوز ازاماتتارىن الىپ كەتۋگە رۇقسات بەرگەن جوق.
ءوز كەزەگىندە, دەنساۋلىق ساقتاۋ ءمينيسترى ەلجان ءبىرتانوۆ بيىل 6 قاڭتاردان باستاپ سانيتارلىق-ەپيدەميولوگيالىق قىزمەتتەردىڭ كۇشەيتىلگەن رەجىمدە جۇمىس ىستەپ جاتقانىن اتاپ ايتتى.
«قحر-مەن شەكارا ارقىلى وتكىزۋ پۋنكتتەرىندە 20 مىڭعا جۋىق ادام تەكسەرىلدى. ولاردىڭ بارلىعى مونيتورينگكە الىندى جانە 14 كۇن بويى ەسەپتە تۇرادى. قايتا كەلگەندەردىڭ بارلىعىن دا وسىلايشا قاداعالايتىن بولامىز. وقۋ-جاتتىعۋ جۇرگىزىلدى, call-ورتالىق اشىلدى, قوسىمشا 4780 توسەك-ورىنعا كارانتين ءۇشىن رەزەرۆتىك ستاتسيونارلار ازىرلەندى. مەديتسينا بۇيىمدارى مەن پرەپاراتتارىنىڭ قوسىمشا قاجەتتىلىگى بويىنشا ەسەپ-قيساپ جاسالۋدا», دەدى مينيستر.
وتىرىستى قورىتىندىلاعان بەردىبەك ساپارباەۆ دەنساۋلىق ساقتاۋ, اقپارات جانە قوعامدىق دامۋ مينيسترلىكتەرىنە تۇرعىندار اراسىندا كۇن سايىن اقپاراتتىق-ءتۇسىندىرۋ جۇمىستارىن جۇرگىزۋدى تاپسىردى. وبلىستار مەن قالالاردىڭ اكىمدىكتەرى دە وڭىرلىك دەڭگەيدە وسىنداي جۇمىستار جۇرگىزۋى ءتيىس.
«بارلىق جاۋاپتى مەملەكەتتىك ورگاندار ءوزارا ءتيىمدى ارەكەتتەستىك ورناتىپ, ءىس-شارالار جوسپارىنىڭ مۇلتىكسىز ورىندالۋىن قامتاماسىز ەتۋى كەرەك. بۇگىندە قازاقستاندا بۇل اۋرۋعا شالدىعۋ وقيعاسى تىركەلگەن جوق, بىراق ءبىز دايىن بولىپ, قاجەت جاعدايدا جىلدام ارەكەت ەتۋىمىز كەرەك. دەنساۋلىق ساقتاۋ مينيسترلىگى مەن جەرگىلىكتى اتقارۋشى ورگاندار قوسىمشا كۇشتەر مەن قۇرالداردى, سونىڭ ىشىندە جەكە قورعانىش قۇرالدارى مەن ءدارى-دارمەكتەردى, مەديتسينا ۇيىمدارىن قاراستىرۋى كەرەك», دەدى ۆيتسە-پرەمەر.
