قازاقستان پرەزيدەنتى قاسىم-جومارت توقاەۆ ءباا تاق مۇراگەرىنە قوناقجايلىعى ءۇشىن العىسىن ءبىلدىرىپ, تۇڭعىش پرەزيدەنت – ەلباسى نۇرسۇلتان نازارباەۆتىڭ ىستىق لەبىزىن جەتكىزدى.
«بۇل مەنىڭ پرەزيدەنت رەتىندە اراب الەمىنە تۇڭعىش ساپارىم. بۇل ساپار قازاقستان ءسىزدىڭ ەلىڭىزگە ۇلكەن ءمان بەرىپ وتىرعانىن اڭعارتادى. وسى مۇمكىندىكتى پايدالانىپ, سىزگە تۇڭعىش پرەزيدەنتىمىز – ەلباسى نۇرسۇلتان نازارباەۆتىڭ ىستىق لەبىزىن جەتكىزگىم كەلەدى. شىن مانىندە, ەكى ەلدىڭ اراسىنداعى قارىم-قاتىناستىڭ ارقاسىندا كوپتەگەن جەتىستىككە قول جەتكىزدىك. وسى ماسەلە بويىنشا ءسىز جاڭا عانا وتە جاقسى ايتتىڭىز. تولىق كەلىسەمىن. ارامىزدا شىنايى دوستىق, ءوزارا تۇسىنىستىك, سەنىم بار. سوندىقتان قارىم-قاتىناسىمىزدىڭ كەلەشەگى زور», - دەدى قاسىم-جومارت توقاەۆ.
بۇدان سوڭ, مەملەكەت باسشىسى ءباا ساپارىنىڭ نەگىزگى ماقساتىن اتادى.
«مەنىڭ ساپارىمنىڭ نەگىزگى ماقساتى - ەكى ەلدىڭ اراسىنداعى ىنتىماقتاستىققا جاڭا سەرپىن بەرۋ. ۋاقىت ءبىر جەردە توقتاپ قالمايدى. قوسىمشا سەرپىن بەرىپ, ءىس-ارەكەت جاساۋ كەرەك. ءبىر جەردە تۇرىپ قالۋعا بولمايدى, العا جىلجۋىمىز كەرەك. مەن وسى ساپارعا ەرەكشە ءمان بەرە وتىرىپ, ۇلكەن ۇمىتپەن قارايمىن. كەلەسى جىلى امىرلىكتەردىڭ قۇرىلعانىنا 50 جىل بولادى. ال ءبىز كەلەسى جىلى تاۋەلسىزدىگىمىزدىڭ 30 جىلدىعىن اتاپ وتەمىز. بۇل قازاقستان ءۇشىن اسا ماڭىزدى تاريحي مەجە», - دەدى قازاقستان پرەزيدەنتى.
