تاق مۇراگەرى قازاقستان پرەزيدەنتى قاسىم-جومارت توقاەۆقا بىرىككەن اراب امىرلىكتەرى پرەزيدەنتى شەيح حاليفا يبن زايد ال-ناحاياننىڭ سالەمىن جەتكىزدى.
«جوعارى مارتەبەلى پرەزيدەنت مىرزا, ەڭ الدىمەن, بىرىككەن اراب امىرلىكتەرى اۋماعىنا قوش كەلدىڭىز دەپ ايتامىن. وزىڭىزگە ارنالعان بىرىككەن اراب امىرلىكتەرىنىڭ پرەزيدەنتى شەيح حاليفا يبن زايد ال-ناحاياننىڭ ىستىق ىقىلاسىن جەتكىزەمىن. امىرلىكتەردىڭ باسشىسى ءسىزدىڭ ساپارىڭىزعا ۇلكەن تابىس تىلەيدى. سونداي-اق امىرلىكتەر پرەزيدەنتىنىڭ جانە ءوزىمنىڭ اتىمنان جاقىن دوسىم, جوعارى مارتەبەلى نۇرسۇلتان نازارباەۆقا ىستىق ىقىلاسىمىزدى جەتكىزۋىڭىزدى سۇرايمىز», - دەدى شەيح مۇحاممەد بەن زايد ءال-ناحايان.
بۇدان سوڭ ول نۇرسۇلتان نازارباەۆ پەن امىرلىكتەر شەيحى حاليفا يبن زايد ال-ناحاياننىڭ وتە جاقىن قارىم-قاتىناستا ەكەنىن, سونىمەن قاتار, ەلباسىنىڭ ەكى ەل اراسىنداعى قارىم-قاتىناستاردى نىعايتۋعا ۇلكەن ۇلەس قوسقانىن اتاپ ءوتتى.
«قازىرگى ۋاقىتتا ەكى ەل اراسىنداعى قارىم-قاتىناستار وتە جوعارى دەڭگەيدە دەپ ايتا الامىز. ءبىز بىرىككەن اراب امىرلىكتەرى رەتىندە قازاقستانمەن ىقپالداستىقتى دامىتۋعا ەرەكشە ماڭىز بەرەمىز. ەكى ەل اراسىنداعى ىنتىماقتاستىقتىڭ بارلىق باعىتى مەن جولدارى وتە ۇلكەن. وسى رەتتە 2019 جىلى قىركۇيەك ايىندا ابۋ-دابيدە وتكەن قازاقستان مەن امىرلىكتەردىڭ ۇكىمەتارالىق كوميسسيانىڭ ناتيجەلى جۇمىسىن اتاپ وتكىم كەلەدى», - دەدى شەيح مۇحاممەد بەن زايد ءال-ناحايان.
