سەنات توراعاسى داريعا نازارباەۆا ۇلتتىق ەكونوميكا مينيسترلىگى ستاتيستيكا كوميتەتىنىڭ, اۋىل شارۋاشىلىعى مينيسترلىگى ۆەتەرينارلىق باقىلاۋ جانە قاداعالاۋ جونىندەگى كوميتەتىنىڭ وكىلدەرىمەن, اقمولا, قاراعاندى جانە تۇركىستان وبلىستارىنىڭ ۆەتەريناريا جانە اۋىل شارۋاشىلىعى باسقارمالارىنىڭ باسشىلارىمەن كەزدەستى.
ۇلتتىق ەكونوميكا مينيسترلىگى ستاتيستيكا كوميتەتىنىڭ توراعاسى نۇربولات ايداپكەلوۆ ءوز سوزىندە اۋىل شارۋاشىلىعى سالاسىنىڭ ستاتيستيكالىق دەرەكتەرى تاۋار وندىرۋشىلەردىڭ ءۇش ساناتى نەگىزىندە قالىپتاساتىنىن ايتتى. ولاردىڭ قاتارىندا شارۋا نەمەسە فەرمەر قوجالىقتارى, اۋىل شارۋاشىلىعى كاسىپورىندارى مەن جۇرتشىلىق شارۋاشىلىقتارى بار.
مەكەمە باسشىسى مال شارۋاشىلىعىنداعى ستاتيستيكالىق ەسەپتىڭ قيىندىعىن اتاپ ءوتتى. ونىڭ ايتۋىنشا, مال ەسەبىن جۇرگىزۋ راسىمدەرى پىسىقتاۋدى قاجەت ەتەدى جانە وندا اۋىل شارۋاشىلىعى مالىنا چيپ پايدالانۋ ارقىلى جەكە ءنومىر بەرۋ مەن جەكە دەرەكتەر بازاسىنا ەنگىزۋ ءارى ۆەتەريناريالىق پاسپورت بەرۋ بولۋى ءتيىس. «بۇل چيپتەر ازىرشە سوڭعى پايدالانۋشىعا دەيىن, ياعني ۆەتەرينارعا دەيىن جەتكەنشە بەلگىلى ءبىر ۋاقىت وتەدى. وسى ۋاقىت ىشىندە مالدى ەكى اينالىمعا جىبەرۋگە, ياعني تۋعىزىپ, ساتىپ جىبەرۋگە بولادى», دەدى ن.ايداپكەلوۆ.
كەزدەسۋدە ءسوز العان اۋىل شارۋاشىلىعى مينيسترلىگى ۆەتەرينارلىق باقىلاۋ جانە قاداعالاۋ كوميتەتىنىڭ توراعاسى ارمان وتەعۇلوۆ ىندەتتەن, ونىڭ ىشىندە تۇينەمەدەن ولگەن مالدى كومەتىن ورىنداردى كۇتىپ ۇستاۋ, اباتتاندىرۋ جانە سالۋدى ۇيىمداستىرۋ ءۇشىن قارجى ءبولۋ ماسەلەلەرىن جەرگىلىكتى اتقارۋشى ورگاندار ءتيىستى تۇردە شەشپەي كەلە جاتقانىن اتاپ ءوتتى.
ۆەتەرينارلىق باقىلاۋ جانە قاداعالاۋ كوميتەتىنىڭ توراعاسى سالا جۇمىسىنىڭ جاعدايىن جاقسارتۋ تۋرالى بىرقاتار ۇسىنىسىن ورتاعا سالدى. مالعا ارنالعان ءدارى-دارمەكتى جەتكىزۋدە كىدىرىستىڭ بولماۋى ءۇشىن ۆەتەريناريالىق پرەپاراتتاردى ءۇش جىلدىق كەزەڭگە ساتىپ الۋ; ەپيزووتيا جانە پانزووتيا, مال ۇرلىعى جانە زاڭسىز ورىن الماستىرۋ جاعدايلارىن انىقتاۋ ماقساتىندا ۆەتەرينارلىق پوليتسيا قۇرۋدى; مەملەكەتتىك ۆەتەرينارلىق-سانيتارلىق ينسپەكتورلارعا بىرىڭعاي كيىم ۇلگىسىن ەنگىزۋدى ۇسىندى.
«قازاق عىلىمي-زەرتتەۋ ۆەتەريناريا ينستيتۋتى» سەرىكتەستىگىنىڭ باس ديرەكتورى احمەتجان سۇلتانوۆ اۋىل شارۋاشىلىعىنداعى ءوندىرىس تىزبەگىنىڭ بارلىق ساتىلارىندا ساندىق تەحنولوگيالاردى قولدانۋدىڭ ەرەكشە ءرولىن اتاپ ءوتتى.
داريعا نازارباەۆا تالقىلاۋ كەزىندە اگروونەركاسىپ كەشەنىندە ساندىق تەحنولوگيالاردى جاپپاي قولدانۋ, سونداي-اق عارىشتىق مونيتورينگ جۇيەسىن پايدالانۋ قاجەتتىگىنە قولداۋ ءبىلدىردى. ء«بىز باسەكەگە قابىلەتتىلىكتى جوعالتىپ بارا جاتىرمىز. بۇگىن بىزگە جىلدامدىق قاجەت, ال تسيفرلاندىرۋ وعان مۇمكىندىك بەرىپ وتىر. ەگەر شىن مانىندە, بارلىق كۇشتى وسىعان سالعاندا وتە تەز ءارى قىسقا مەرزىمدە اتقارۋعا بولادى. ىنتالاندىرۋ كەرەك», دەدى د.نازارباەۆا.
كەزدەسۋ بارىسىندا قاراعاندى وبلىسىنىڭ ۆەتەريناريا باسقارماسىنىڭ باسشىسى قايىربەك تۇرسىنبەكوۆ مال دارىگەرلەرى شالعاي اۋىلداردا تاپ بولاتىن قيىندىقتار تۋرالى ايتىپ بەردى. ق.تۇرسىنبەكوۆتىڭ پىكىرىنشە, وعان ەڭبەكاقىنىڭ ازدىعى, بىلىكتى مامانداردىڭ جەتىسپەۋى, ستاندارتتى ۆەتەرينارلىق ستانسالار مەن قىزمەت كولىكتەرىنىڭ بولماۋى جاتادى.
قايىربەك تۇرسىنبەكوۆ يەسىز مىسىق پەن يتتەردى اۋلاۋعا رەسۋرستاردىڭ جەتىمسىزدىگىنە ەرەكشە نازار اۋداردى. ول ۆەتەرينارلىق قىزمەتتەر جۇمىسىنىڭ كوپتىگىنە بايلانىستى جانۋارلاردى اۋلاۋ مەن ۇستاۋ ماسەلەلەرىنە نازار اۋدارۋعا ۇلگەرە بەرمەيتىنىن اتاپ ءوتتى.
سەنات باسشىسى قالىپتاسقان جاعدايدىڭ شەشىمى رەتىندە سالالىق مينيسترلىك تاراپىنان قولداۋ كورسەتۋدى ۇسىندى. «كەيبىر قالالاردا جەكە تۇلعالار ءوز قاراجاتى ەسەبىنەن مىسىق پەن يتكە ارنالعان وسىنداي ۆەتەرينارلىق پۋنكت اشىپ وتىر. ول جۇمىسپەن قوعامدىق بىرلەستىكتەر, ەرىكتىلەر, جانۋارلاردى جاقسى كورەتىندەر اينالىسادى. مۇمكىن ولارعا اۋىل شارۋاشىلىعى مينيسترلىگى تاراپىنان شاعىن قولداۋ قاجەت شىعار؟» – دەدى د.نازارباەۆا.
داريعا نازارباەۆا كەزدەسۋدىڭ قورىتىندىسى بويىنشا اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنە شاراعا قاتىسۋشىلار قوزعاعان پروبلەمالىق تاقىرىپتاردى زەردەلەۋدى جانە ولاردى پارلامەنتتىك تىڭداۋلاردا تالقىلاۋعا دايىنداۋدى تاپسىردى.
