اتاپ ايتقاندا, «الەۋمەتتىك كارتا» اياسىندا وبلىستاعى كاسىپورىنداردىڭ 100 مىڭ جۇمىسشىسى مەن بيۋدجەتتىك ۇيىمداردىڭ 102 مىڭ قىزمەتكەرى جانە اتقارۋشى سالادا ەڭبەك ەتەتىن 3 500 ادامنىڭ جالاقىسى وسكەن. ياعني 2019 جىلى وڭىردەگى ورتاشا ايلىق ەڭبەكاقى مولشەرى 137 054 تەڭگەنى قۇرادى. بۇل كورسەتكىش 2018 جىلمەن سالىستىرعاندا 20,6 پايىزعا جوعارى. ال ناقتى ءوسىم كورىنىسى 14,7 پايىز شاماسىندا. جالپى, ايماقتاعى ەڭ جوعارى جالاقى قارجى سالاسى مەن ساقتاندىرۋ قىزمەتكەرلەرىنە تيەسىلى. ولاردىڭ ايلىعى – 211 241 تەڭگە. ال ەڭ تومەنگى – 78 939 تەڭگە جالاقىنى اكىمشىلىك جانە قوسالقى قىزمەت كورسەتۋ سالاسىندا ەڭبەك ەتەتىندەر الادى.
– مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس, بيىل الەۋمەتتىك سالا قىزمەتكەرلەرىنىڭ جالاقىسى كوبەيمەك. اتاپ ايتقاندا, وڭىردەگى 60 مىڭنان استام مۇعالىمنىڭ جالاقىسى 25 پايىزعا, مادەنيەت, ونەر, سپورت جانە مۇراعات سالاسىنداعى 5 مىڭ قىزمەتكەردىڭ جالاقىسى 30 پايىزعا ارتسا, 3 800 دارىگەردىڭ ايلىعى 30 پايىزعا جانە 12 200 مەدبيكەنىڭ تابىسى 20 پايىزعا وسەدى. سونداي-اق وبلىستاعى 3 100 الەۋمەتتىك قىزمەتكەردىڭ دە جالاقىسىنا ورتاشا ەسەپپەن 30 پايىزعا دەيىن ۇستەمە قوسىلادى, - دەيدى وبلىس اكىمىنىڭ ورىنباسارى باتىرجان بايجۇمانوۆ.
«الەۋمەتتىك كارتانىڭ» ءبىلىم بەرۋ باعىتى تۋرالى ايتقاندا, 2019-2020 جىلعى وقۋ جىلىندا الماتى وبلىسىنداعى ءبىلىم بەرۋ مەكەمەلەرىنىڭ 1-سىنىبىنا 50 مىڭعا جۋىق وقۋشى قابىلدانعانى ەسكە تۇسەدى. ياعني بالا سانىنىڭ كۇرت ارتۋى مەكتەپتەردەگى وقۋ سىنىپتارىنىڭ جەتىسپەۋىنە اكەلىپ, وقۋشىلار 3 اۋىسىمدا ءبىلىم الۋعا ءماجبۇر بولىپ وتىر. قازىر وبلىستاعى 38 مەكتەپتە وقۋشىلار 3 اۋىسىمدا وقىپ جاتىر. ەسەپ بويىنشا 3 اۋىسىمدى مەكتەپتەردى جويۋ ءۇشىن بىردەن 21 وقۋ وشاعىن سالۋ قاجەت. وعان 52 ملرد تەڭگە جۇمسالادى. الايدا قۇرىلىس قارقىن العان كۇننىڭ وزىندە مۇنشا مەكتەپتى پايدالانۋعا بەرۋگە 2021 جىلى عانا قول جەتۋى مۇمكىن. ال بيىل 6 مەكتەپتىڭ قۇرىلىسى جۇرگىزىلەدى. بۇل تاعى 3 مىڭ وقۋشىنىڭ ەركىن وتىرىپ ءبىلىم الۋىنا قولايلى جاعداي تۋعىزباق.
جالپى, بيىل وبلىس اۋماعىنداعى مەكتەپ-ينتەرناتتاردى كۇردەلى جوندەۋ مەن ءبىلىم مەكەمەلەرىنىڭ ماتەريالدىق-تەحنيكالىق بازاسىن نىعايتۋعا 300 ملن تەڭگە قارجى بولىنگەن. بۇل وبلىس مەكتەپتەرىندەگى بىرقاتار ماسەلەنى شەشۋگە مۇمكىندىك بەرمەك. اسىرەسە ءوڭىر مەكتەپتەرىندە ءتارتىپ پەن قاۋىپسىزدىكتى ساقتاۋ بويىنشا سىن كوپ. قازىر ءبىلىم بەرۋ نىساندارىندا 15 860 بەينەباقىلاۋ قۇرىلعىسى ىسكە قوسىلعان ەكەن. الايدا كامەرالاردىڭ دەنى ەسكىرگەن. كوپتەگەن قۇرىلعى ءبىر باعىتتى عانا بەينەگە تۇسىرەدى. ونىڭ جازبالارىن قاراپ, سۇرىپتاپ وتىراتىن ارنايى مامان تاعى جوق. سول سەبەپتەن دە مەكتەپ ىشىندەگى بالا قۇقىنىڭ بۇزىلۋى نازاردان تىس قالىپ جاتادى. ال وبلىستاعى ءۇش جۇزدەن استام مەكتەپتىڭ دارەتحاناسى عيمارات ىشىندە ەمەس, اۋلادا ورنالاسقانى دا اتا-انالاردىڭ الاڭداۋىنا نەگىز بولىپ وتىر.
وبلىستىڭ الەۋمەتتىك دامۋ كارتاسى بويىنشا بولىنگەن بيۋدجەت قارجىسىنىڭ باسىم بولىگى كوپ بالالى وتباسىلار مەن از قامتىلعان اۋلەتتەردىڭ جاعدايىن جاقسارتۋعا باعىتتالىپ وتىر. قازىر الماتى وبلىسىندا تىركەۋدە تۇراتىن 43 مىڭعا جۋىق وتباسىندا 4 جانە ودان دا كوپ بالا ءوسىپ كەلەدى.
ال جاڭا جىلدان باستاپ, وبلىستاعى وسىنشا وتباسى جاڭارتىلعان باعدارلاما بويىنشا اتاۋلى الەۋمەتتىك تولەم الۋدى باستادى. بۇگىندە رەسپۋبليكالىق بيۋدجەتتەن تولەنەتىن مەملەكەتتىك جاردەماقى 4 بالا ءۇشىن – 42 496 تەڭگە, 5 بالا ءۇشىن – 53 127 تەڭگە, 6 بالا ءۇشىن – 63 757 تەڭگە, 7 جانە ودان كوپ بالاعا – 74 388 تەڭگە كولەمىندە بەرىلۋدە. سونداي-اق وبلىس بويىنشا 18 جاسقا دەيىنگى 83 مىڭ بالانى الەۋمەتتىك قولداۋ ماقساتىندا 3,7 ميلليارد تەڭگە بولىنگەن. ونىڭ ىشىندە مەكتەپ جاسىنا جەتپەگەن 31 644 بالا جانە مەكتەپ جاسىنداعى 52 681 بالانى كيىم-كەشەك, ىستىق تاماقپەن قامتۋ مەن قوعامدىق كولىكتە تەگىن ءجۇرۋى ءۇشىن ارنايى الەۋمەتتىك پاكەت جۇزەگە اسىپ وتىر.
جالپى, وبلىستىڭ «الەۋمەتتىك كارتاسى» شەڭبەرىندە كوپ بالالى جانە از قامتاماسىز ەتىلگەن وتباسىلارعا 3,5 ميلليارد تەڭگە كولەمىندە قولداۋ كورسەتىلىپ, اتالعان قارجىنىڭ يگىلىگىن 106 مىڭ ادام كورگەن ەكەن. ونىڭ ىشىنە كوپ بالالى انالاردىڭ قالاداعى كوعامدىق كولىكتەرمەن تەگىن ءجۇرۋى, مەكتەپكە دەيىنگى مەكەمەلەردەگى تولەمدەردى سۋبسيديالاۋ, تابيعي گاز جەلىسىنە تەگىن قوسۋ جانە جوعارى وقۋ ورىندارىندا وقۋ ءۇشىن ءبىلىم گرانتتارىن تاعايىنداۋ سياقتى يگى شارالار كىرەدى.
الماتى وبلىسى
