جەڭىل ماشينا ساعاتىنا ءجۇز شاقىرىمدىق جىلدامدىقپەن اتقان وقتاي زۋلاپ كەلە جاتتى. كوڭىلى الدەنەگە ەلەگىزىگەن قانات ءبايبوروۆ جۇرگىزۋشىنىڭ جانىندا بەيقام وتىر ەدى. نە بولعانىن ءتۇيسىنىپ تە ۇلگەرگەن جوق. قاس پەن كوزدىڭ اراسىنداعى وقىس وقيعا. ەسىن اۋرۋحانادا ءبىر-اق جينادى. قولدارى قوزعالاتىن سياقتى. كەۋدەدە جان بار. بەلدەن تومەن الدەكىم ءزىلباتپان جۇك بايلاپ قويعان ءتارىزدى. ءزىلماۋىر تارتقان دەنەسىن قوزعاپ كورمەك بولعان, شىبىن جانى كوزىنە كورىندى. كوزىنىڭ الدى قايتا-قايتا قاراۋىتا بەردى. الدەن ۋاقىتتا تالىقسىپ كەتكەن.
كوپ جاتتى. ون ەكى مۇشەسىنىڭ ساۋ قالعان ءبىرى جوق ءتارىزدى. سويتسە, ومىرتقاسى سىنعان ەكەن. ەندى قارعا ادىم جەر مۇڭ بولماق. ومىرتقانىڭ نە ەكەنىن ارينە بىلەدى. ءوزى دە جارىمجان اكەسىن كوتەرىپ, كومەكتەسىپ وسكەن. ەندى مىنە, اكەنىڭ باسىنداعى بار بەينەت بالاسىنا تولايىم كوشكەندەي. كەلەشەگىن ويلاعاندا, شىبىن جانى شىرقىراپ كەتەدى. دۇنيەنىڭ ءبارى كۇڭگىرت, تاس قاراڭعى ءتارىزدى. تۋىسقاندارى اۋرۋحاناعا ىزدەپ كەلىپ, سالى سۋعا كەتكەن ازاماتقا دەم بەرىپ, ء«الى-اق ەكى اياعىڭدى تەڭ باسىپ كەتەسىڭ, تاعدىردىڭ از كۇنگى تالقىسىنا مويىما» دەپ قايراتتاندىرعانىمەن, تۇلا بويىنداعى كەسەلدىڭ قانشالىقتى اۋىر ەكەنىن جاس جۇرەگى سەزەدى-اق. وتانى وبلىستىق اۋرۋحانانىڭ دارىگەرلەرى جاساپتى. ءحالىن بىلۋگە كەلگەندەردىڭ قامىردان قىل سۋىرعانداي ەتىپ, بيپازداپ ايتۋلارىنا قاراعاندا, ءتىپتى كولىك اۋدارىلاتىن جەر ەمەس. تەپ-تەگىس جول. قازاق مۇندايدى جازمىش دەسە كەرەك. قاتتى جىلدامدىقپەن كەلگەن كولىك ءتورت دوڭگەلەگى اسپانعا قاراپ, اينالىپ تۇسكەن. كولىك ىشىندەگى جولاۋشىلاردىڭ قاناتتان باسقاسى ءدىن امان.
توسەككە تاڭىلعالى نەبىر ويلار كەلىپ-كەتپەدى دەيسىز؟ جاقسىسى دا, جامانى دا. بالكىم جامانى كوپتەۋ. ودان كەيىنگى كۇنى نە بولماق؟ ازامات اتانىپ, ەندى اتقا مىنگەندە, تاعدىردىڭ ماڭدايىنا جازعانى وسى ما؟ ءزىلباتپان قايعى القىمىنان العان كەزدە ءوز وزىنە قول سالعىسى دا كەلگەن. رايىنان دوستارى قايىردى. كۇنا ەكەنىن ايتقان. جاراتقان يە پەندەسىنە ءومىر سىيلاعاندا, سىناعىن دا قوسا سىيلايدى دەسكەن. وسى ءسوز دەم بەرىپ, قايتادان قايراتتاندى, ءومىر سۇرگىسى كەلدى. جاي عانا پەندە تىرلىك ەمەس, ويعا العان ارمان-ماقساتىن ورىندايتىن, قوعامعا پايداسى, ەت جاقىن تۋىستارعا شاراپاتى تيەتىن ازامات بولۋى كەرەك. ءتاي-ءتاي باسىپ تۇرعىسى كەلگەن, تابانىن جەرگە تيگىزىپ جۇرگىسى كەلگەن. ەڭ باستى قورقىنىشى – ماسىل بولماۋ ەدى. ول ماسىل بولماۋى ءۇشىن قالاي بولعاندا دا جارتى جانىن دەمەپ, باس كوتەرۋ كەرەك. اۋرۋحانادان شىققان سوڭ ءبىراز ۋاقىت وتكەن كەزدە دوستارى مۇگەدەكتەر ارباسىن اكەپ بەرگەن. جاناشىرلىقتارى دا. وسىمەن ءجۇرىپ ۇيرەنسەڭ, توسەكتە جاتقاننان جەڭىل بولادى دەسكەن ولار. ارباعا مىنگىسى كەلمەدى. جۇرەمىن دەپ ۇمتىلدى. الگى اربا ءۇيدىڭ بوساعاسىندا قاڭتارىلىپ ءبىر جىل تۇردى.
ەندى ءبىر اۋىز ءسوز – وقىس وقيعاعا ۇشىراپ, ومىرتقاسىن وپىرعانعا دەيىنگى بەيقام تىرشىلىگى جايىندا. 1994 جىلى بۇرىنعى تسەلينوگراد قالاسىنداعى ينجەنەرلىك-قۇرىلىس ينستيتۋتىن ويداعىداي اياقتاپ, ينجەنەر-مەحانيك ماماندىعىن الىپ شىققان بولاتىن. جوعارى وقۋ ورنىنان كەيىن ءوزىنىڭ تۋعان قالاسى ششۋچينسكىدە كولىك جوندەۋ ستانساسىندا سلەسار بولىپ جۇمىس ىستەدى. 1996 جىلدىڭ جەلتوقسان ايىنان ۇلتتىق قاۋىپسىزدىك كوميتەتىنە قاراستى اسكەري قىزمەتتە بولدى. 2000 جىلدىڭ قازان ايىنان نەبارى 28 جاسىندا مۇگەدەكتەر ارباسىنا تاڭىلدى.
قىرسىق شالعاندا ء«بىر اينالدىرعاندى شىر اينالدىرادى» دەسەدى. راس ەكەن. الدىمەن تۋعان باۋىرى جانات باقيلىق بولدى. اكەسى تولەگەن دە, اناسى گۇلفرۋزا دا ومىردەن ءوتتى. پەندە شىركىننىڭ وتىز ومىرتقاسىن وپىرىپ, قىرىق قابىرعاسىن قاۋساتاتىن قايعى قايتا-قايتا سىناعىنا الا بەرگەنىمەن سىنعان جوق. 2006 جىلى كوكشەتاۋ ۋنيۆەرسيتەتىنىڭ زاڭ فاكۋلتەتىن ءبىتىرىپ شىقتى. جاقسى ىسىمەن تانىلدى, ادال ەڭبەگىنىڭ ارقاسىندا ابىرويى ارتتى. بۇل كۇندە «بۋراباي اۋداندىق مۇگەدەكتەر قوعامى» قوعامدىق بىرلەستىگىنىڭ توراعاسى. 2012 جىلدىڭ قاڭتار ايىندا بۋراباي اۋداندىق ءماسليحاتىنىڭ دەپۋتاتى بولىپ سايلاندى. 2014 جىلدىڭ قاراشا ايىنان باستاپ بۋراباي اۋدانى اكىمىنىڭ مۇگەدەكتەر ماسەلەسى جونىندەگى كەڭەسشىسى. ءبىر كەزدە ءوزى كومەككە ءزارۋ بولسا, ەندى قانات تولەگەن ۇلى الدىنا جاعدايىن ايتىپ كەلگەن مۇقتاج جاندارعا كومەكتەسە باستادى. سول ەڭبەگى ەلەنىپ, «الەۋمەتتىك ەڭبەك سالاسىنىڭ ۇزدىگى» توسبەلگىسىمەن ماراپاتتالدى.
ابىروي مەن اتاق قاي ەڭبەگى ءۇشىن دەيسىز عوي. قانات ءبىر توپ جولداستارىمەن بىرىگىپ, ششۋچينسك قالاسىندا تۇڭعىش رەت دەنساۋلىعىندا اقاۋى بار بالالارعا ارناپ شىعىس مەديتسيناسىنىڭ جەتىستىكتەرىمەن ەمدەيتىن كۇندىزگى ستاتسيونار اشتى. بۇل جەردە يپپوتەراپيا, كانيستەراپيا (يتتەردىڭ كومەگىمەن ەمدەۋ), دىبىس تەراپياسى, شوپپەن ەمدەۋ ءتارىزدى توسىن, بىراق تيىمدىلىگى از ۋاقىتتىڭ ىشىندە كوزگە ۇرىپ تۇراتىن ەمدەۋ تاسىلدەرىن قولدانادى. ءار كۇن سايىن ون-ون بەس بالا وسى ورتالىقتا ەمدەلەدى. ءوزى ءتارىزدى تاعدىر تالكەگىنە ۇشىراعان تالاي ادامعا قول ۇشىن بەردى. مۇگەدەكتەر اراسىندا سپورتپەن اينالىسقىسى كەلەتىندەر دە از ەمەس. ولار اۋىق-اۋىق اۋداندىق, وبلىستىق, ءتىپتى كەيدە رەسپۋبليكالىق جارىستارعا دا قاتىسادى. مۇگەدەك سپورتشىلاردىڭ ءۇمىت وتىن لاۋلاتىپ, جارىسقا قاتىسۋىنا جاعداي جاساۋدى دا قانات قولعا الىپ وتىر.
ال دەپۋتات رەتىندە اتقارعان شارۋا شاش-ەتەكتەن. تىرشىلىكتە تۇيتكىل تاۋسىلعان با؟ بۋراباي باۋرايىنا كەلىمدى-كەتىمدى كىسى كوپ. دەمەك اۋىل-ايماق قۇدا كۇتكەندەي جۇتىنىپ, جايناپ تۇرعانى ءلازىم. كۋرورتتى وڭىرگە اياق-قولى ساۋ ادامدارمەن بىرگە, قول ارباعا تاڭىلعان مۇگەدەكتەردىڭ كەلۋى ابدەن مۇمكىن. ولارعا دا جاقسى جاعداي تۋدىرعان ءجون. قانات تولەگەن ۇلى ءار مەكەمە, ۇجىمنىڭ عيماراتتارىندا مۇگەدەكتەر كىرىپ-شىعاتىن پاندۋس سالۋعا مۇرىندىق بولدى. قازىر ۇزىندىعى, ەنى, ەڭىستىگى ءتارىزدى تەحنيكالىق تالاپتاردى جاتقا بىلەدى.
اكە-شەشە ومىردەن وتكەن سوڭ, قارىنداسى ساۋلە مەن ءىنىسى جاناتتىڭ بالالارىنا باس-كوز بولىپ وتىر. ءوزىنىڭ ەكى پەرزەنتىنەن كەم كورمەيدى. ەندىگى ارمانى وسى بەس جەتكىنشەكتىڭ ەل قاتارىنا قوسىلۋى.
تاياۋدا Nur Otan پارتياسىنىڭ قولداۋىمەن نۇر-سۇلتان قالاسىندا وتكەن قازاقستان مۇگەدەكتەر كونفەدەراتسياسى ۇيىمداستىرعان ءداستۇرلى «جان شۋاق» قوعامدىق سىيلىعىن يەلەندى. الدا قانشا عۇمىر بار. سىناقتان ساعى سىنباعان ازاماتتىڭ پەشەنەسىنە جازىلعان سىي كوپ بولعاي.
اقمولا وبلىسى,
بۋراباي اۋدانى
