بۇل توتەنشە وقيعا 21 قاڭتار كۇنى كەشكى ساعات 18.00-ءدىڭ شاماسىندا «قازاقمىس» كورپوراتسياسى» جشس-ءنىڭ عيماراتىنداعى كەن-بايىتۋ كومبيناتىنىڭ باس ديرەكتورى امانگەلدى مينيگۋلوۆتىڭ قىزمەتتىك كابينەتىندە بولعان.
سول كۇننىڭ كەشىندە مىناداي اقپارات ەل ءىشىن كەزىپ كەتتى: باس ديرەكتوردىڭ كابينەتىندە كاسىپوداق ۇيىمىنىڭ توراعاسى مەن ۇجىم باسشىسىنىڭ اراسىندا كيكىلجىڭ بولعان دا, ءبىر ۋاقىتتا كاسىپوداق كوشباسشىسى سىرتقا شىعىپ كەتىپ, ىزىنشە مىلتىق الىپ كەلىپ كابينەتكە قايتا كىرگەن. سودان قىزمەتتىك بولمە ىشىندە مىلتىق اتىلىپ, ەكى ادام پىشاقتان جاراقات الىپ, بىرەۋى سول جەردە وزىنە ءوزى قول سالىپ, قازا تاپقان...
ەندى بەلگىسىزدىكتىڭ تۇمانى سەيىلگەندەي بولعان كەزدىڭ بيىگىنەن قاراپ جانە كەيىنگى رەسمي مالىمەتتەردى ساراپتاي وتىرىپ, مىنا جايتتاردى جارىققا شىعارۋعا بولاتىن سياقتى. «كاسىپ قورعان» كاسىپوداق ۇيىمىنىڭ توراعاسى توعىزباي تاجبەنوۆتىڭ باس ديرەكتوردىڭ كابينەتىنە مىلتىق الىپ كىرگەنى انىق بولعان جايت: ول بەينەباقىلاۋ كامەرالارىنداعى تاسپاعا جازىلىپ قالعان. بۇل تەگىس ۇڭعىلى مىلتىق تاجبەنوۆتىڭ اتىنا رەسمي تىركەلگەن اتىس قارۋى ەكەن. سونداي-اق كاسىپوداق توراعاسى كابينەتكە كىرگەننەن كەيىن الگى مىلتىقتىڭ ءبىر رەت اتىلعانىن دا كۋالەر راستاپ وتىر.
بۇدان كەيىن باس ديرەكتور امانگەلدى مينيگۋلوۆتىڭ كابينەتىندە نە بولىپ, نە قويعانىن ءتىرى جان بىلمەيدى جانە ايتا المايدى. سول جەردە بولعان قاندى وقيعانىڭ رەسمي ورگاندار ۇسىنعان نۇسقاسى مىناداي: تاجبەنوۆ توبەگە قاراتا مىلتىقتى ءبىر رەت اتقاننان كەيىن, وتتى قارۋدى سۋىق قارۋعا ايىرباستاپ, باس ديرەكتور مينيگۋلوۆتىڭ ارقا تۇسىنان پىشاق ۇرعان. سول ەكى ورتادا اراشا تۇسكەن سابىرجان تەمباەۆتىڭ ىشىنە دە سۋىق قارۋدى سۇعىپ الىپتى. سويتكەن دە, ەكى ادامنىڭ قانىنا مالىنعان قارا پىشاقتى ءوزىنىڭ تۋرا جۇرەگىنە سالىپ, سول جەردە جان تاپسىرعان...
جالپى, بۇل وقيعا تۋراسىندا قۇقىق قورعاۋ ورگاندارى بەرگەن ماعلۇماتتاردىڭ ماردىمسىز بولعانىن جانە ولاردىڭ كەشىگىپ جەتكەنىن ايتپاسقا بولماس. ارينە, وقيعا ەلىمىزدەگى الپاۋىت كاسىپورىنداردىڭ بىرىنە قاتىستى بولعان سوڭ, ءتيىستى ورگانداردىڭ اقپاراتتى سۇزگىدەن وتكىزىپ الۋ ءۇشىن ۋاقىت وزدىرۋعا تىرىسقانى تۇسىنىكتى جايت. بىراق مۇنىڭ جۇرتتى ناقتى جانە تولىق مالىمەتپەن دەر كەزىندە قامتاماسىز ەتۋ ىسىندە قولبايلاۋ بولعانى راس ەدى. ءتىپتى وسىنىڭ سالدارىنان ەل ىشىنە ءجون-جوسىقسىز اڭگىمەلەردىڭ, ءتۇرلى قاۋەسەتتىڭ تاراپ كەتكەنى دە وقيعا اينالاسىنداعى كۇماننىڭ بۇلتىن قويۋلاتا تۇسكەن.
قازىرگى ۋاقىتتا بۇل وقيعا توڭىرەگىندە وربىگەن دولبارى كوپ اڭگىمە تىيىلماي تۇر. اسىرەسە مىنا جايت وزىنە نازار اۋدارماي قويمايدى: بىلەتىندەردىڭ ايتۋىنشا, كاسىپوداقتىڭ كوشباسشىسى توعىزباي تاجبەنوۆ تۋمىسىنان اشۋشاڭ ادام ەمەس, ۇستامدى مىنەزى بار كىسى ەكەن. جۇرتپەن ءتىل تابىسىپ جۇمىس ىستەۋدى مەڭگەرگەن, ءوز ىسىنە تياناقتى مامان بولسا كەرەك. ياعني, ونىڭ وزىنە ءوزى قول سالۋى اقىلعا سىيىمسىز دەگەندى ايتقىسى كەلەدى ونىڭ تانىستارى. الايدا, «اشۋ – دۇشپان» دەگەن, تاجبەنوۆتىڭ ديرەكتوردىڭ كابينەتىنە مىلتىق الىپ كىرگەنى جوعارىداعىداي پىكىر ايتۋشىلاردىڭ ءوزىن تىعىرىققا تىرەپ قويعانى اششى شىندىق...
ماسەلەنىڭ ءتۇيىنى ەندى تارقاتىلىپ, وقيعانىڭ كولەڭكەلى تۇستارىنا ساۋلە جۇگىرە باستاعاندا مىنانى ايتۋدى لاج سانادىق. زادى, قاندى وقيعاعا اكەلگەن كيكىلجىڭ تابان استىندا تۋىنداماعان. ماسەلەن, ەڭبەككەرلەردىڭ سالالىق كاسىپوداقتارىنىڭ توراعاسى مۇرات ماشكەنوۆتىڭ ايتۋىنشا, مينيگۋلوۆ پەن تاجبەنوۆ اراسىندا ءبىراز ۋاقىتتان بەرى جەكە باس ارازدىعى بولعان ەكەن. ال «كاسىپ قورعان» كاسىپوداق ۇيىمى توراعاسىنىڭ ورىنباسارى جانات سامەنوۆ جوعارىدا اتالعان ەكى ازاماتتىڭ اراسىنداعى كيكىلجىڭگە كاسىپوداق ۇجىمىندا قالىپتاسقان كۇردەلى جاعدايدىڭ سەبەپشى بولۋى ابدەن ىقتيمال ەكەنىن ايتادى. ونىڭ سوزىنە قاراعاندا, «كاسىپ قورعان» كاسىپوداقتار ۇيىمىندا توراعا ۇستانعان ساياساتقا, ونىڭ جۇرگىزگەن جۇمىسىنا كوپشىلىكتىڭ كوڭىلى كونشىمەي ءجۇرىپتى. كەلىسپەۋشىلىكتەر كوبەيىپ, ۇجىمداعى بەرەكەنىڭ كەتەۋى كەتە باستاعان. وسىنىڭ ءبارى بيىلعى جىلدىڭ 5 قاڭتارىندا كاسىپوداق ۇيىمىنىڭ ورتالىق كەڭەسىندە بولعان وتىرىستا كەڭىنەن تالقىلانعان ەكەن. سول جيىندا كاسىپوداقتار ۇيىمىنىڭ كەزەكتەن تىس سەزىن الدىمىزداعى 5 اقپان كۇنى وتكىزۋ تۋرالى شەشىم دە قابىلدانىپتى. ياعني, كۇن تارتىبىنە كاسىپوداقتىڭ جاڭا توراعاسىن سايلاۋ ماسەلەسى شىعارىلعان بولسا كەرەك.
قازىرگى تەرگەۋ ورگاندارى توعىزباي تاجبەنوۆتىڭ ءولىمى فاكتىسى بويىنشا «ونى ءولتىرۋ» نەمەسە ء«وزىن ءوزى ولتىرۋگە دەيىن جەتكىزۋ» جونىندەگى ەكى بولجامدى تەكسەرۋدە. سونىمەن قاتار ا.مينيگۋلوۆ پەن س.تەمباەۆتىڭ پىشاق جاراقاتتارىن الۋ فاكتىسى بويىنشا دا «ولتىرۋگە وقتالۋ» بولجامى تەرگەلۋ ۇستىندە.
وتكەن اپتانىڭ جۇما كۇنى توعىزباي تاجبەنوۆتىڭ جامباسى جەرگە ءتيدى. توپىراق ءوزىنىڭ تۋعان جەرى جەزقازعاننان بۇيىردى. ۇلكەن اۋلەتتەن شىققان مارقۇمدى جەرلەۋگە جيىلعان ادامنىڭ قاراسى مول بولدى دەيدى قارالى شاراعا قاتىسقاندار. جەزقازعانداعى ارىپتەستەرىمىزدىڭ سوزىنە جۇگىنسەك, مارقۇمنىڭ تۋعان-تۋىستارى, جالپى وسى وقيعاعا قاتىسى بارلاردىڭ تانىستارى مەن ارىپتەستەرى بۇل تاقىرىپ تۋراسىندا بالەندەي پىكىر ايتۋدان باس تارتۋدى ءجون سانايدى ەكەن. بىراق تەرگەۋدىڭ ءادىل جانە اشىق بولعانىن قالايتىندىقتارىن بىلدىرگەن.
ال پىشاقتان جارالانعان امانگەلدى مينيگۋلوۆ پەن سابىرجان تەمباەۆ قولى شيپا حيرۋرگتەردىڭ ارقاسىندا امان قالدى. اسىرەسە باس ديرەكتوردىڭ جاراقاتى اۋىر بولعان: وعان كۇردەلى وتا جاسالدى. ونىڭ ارىپتەسى بولسا, اۋرۋحانادا كوپ جاتپاي, ۇيىنە قايتارىلعان.
«بۇگىنگى كۇنى تەرگەۋ باستاپقى ساتىدا بولعاندىقتان, كىم, كىمگە, قالاي جانە قانداي زاتپەن دەنە جاراقاتتارىن كەلتىرگەنى تۋرالى تۇپكىلىكتى قورىتىندى جاساۋعا ءالى ەرتە ەكەنىن ايتا كەتۋ قاجەت. وقيعاعا قاتىسۋشىلاردىڭ ارقايسىسىنىڭ ءرولى كەشەندى جەدەل-تەرگەۋ ءىس-شارالارىنان كەيىن جانە ساراپشىلار قورىتىندىلارىنىڭ نەگىزىندە ايقىندالادى», دەلىنگەن وبلىستىق پروكۋراتۋرانىڭ رەسمي مالىمدەمەسىندە.
سونىمەن قاتار پروكۋراتۋرا تۇرعىنداردان دالەلدەنبەگەن دەرەكتەردى تاراتپاي, تەك رەسمي اقپاراتتى باسشىلىققا الۋدى وتىنگەن جانە اتالعان قىلمىستىق ءىستىڭ تەرگەلۋ بارىسى قاراعاندى وبلىسى پروكۋرورىنىڭ جانە وبلىستىق پوليتسيا دەپارتامەنتى باسشىسىنىڭ باقىلاۋىنا الىنعانىن جەتكىزگەن.
بولعان ءىستىڭ اق-قاراسى ايقىندالمايىنشا, سىرتتان تون پىشۋدەن بويدى اۋلاق سالعان ءبىزدىڭ دە پروكۋراتۋرا ورگاندارىنىڭ وسى ايتقانىنا الىپ قوسارىمىز جوق. تەك, كابينەتتەگى كىسى ولىمىنە اكەلگەن كيكىلجىڭنىڭ كارتيناسى بار بوياۋىمەن تولىق جانە شىنايى تۇردە اشىلسا ەكەن دەگەن تىلەك ۇستىندەمىز.
قاراعاندى وبلىسى
