جالپى, بۇگىنگى تاڭدا قازاقستان ەكونوميكاسىندا كۆازيمەملەكەتتىك جانە مەملەكەتتىك سەكتوردىڭ ۇلەسى وتە ۇلكەن. مەملەكەتتىڭ قاتىسى بار كومپانيالاردا بارلىعى 300 مىڭعا تارتا ادام جۇمىس ىستەيدى. بۇل دەگەنىمىز – جۇمىسقا قابىلەتتى حالىقتىڭ 3,5 پايىزى.
حولدينگتەردىڭ پورتفەلدىك كومپانيالارىنىڭ اكتيۆتەرى ءىجو-ءنىڭ جارتىسىنا جۋىعىن قۇرايدى. بۇل – وتە ۇلكەن كورسەتكىش. ولاردىڭ قانشالىقتى ءتيىمدى جۇمىس ىستەپ جاتقانىن قايتا قاراستىرۋ كەرەكتىگى تۋرالى مەملەكەت باسشىسىنىڭ تاراپىنان بۇعان دەيىن دە ايتىلعان بولاتىن. بۇل ورايدا «بايتەرەك» ۇبح ەلىمىزدەگى ەڭ اۋقىمدى ەكونوميكالىق باعدارلامالاردى جۇزەگە اسىرۋمەن اينالىساتىنىنا نازار اۋدارعان ءجون. ياعني, ونىڭ ءتيىمسىز جۇمىس ىستەۋى ەكونوميكالىق باعدارلامالاردىڭ دا ءتيىمدى جۇزەگە اسىرىلاتىنىنا كۇمانمەن قاراۋعا جەتەلەيدى.
2018 جىلى «بايتەرەك» حولدينگىنىڭ تابىسى 35 ملرد تەڭگەنى قۇرادى, ال اكىمشىلىك شىعىندارىنىڭ كولەمى 43 ملرد تەڭگە بولدى. 43 ملرد تەڭگەنىڭ 21 ملرد-سى قىزمەتكەرلەرگە جۇمسالعان. 2017 جىلى اتالعان حولدينگتىڭ اكىمشىلىك شىعىندارى 39 ملرد تەڭگە بولدى. ياعني, حولدينگتىڭ جىلدىق شىعىنى تابىسىنان الدەقايدا جوعارى دەگەن ءسوز. وسىعان بايلانىستى شتاتىنىڭ تىم كوپتىگى تۋرالى ماسەلە كوتەرىلگەنى ورىندى دەپ سانايمىن.
پرەزيدەنت حالىقتىڭ ءال-اۋقاتىن كوتەرۋ مىندەتىن العا قويىپ وتىر. الەۋمەتتىك تولەمدەرگە جۇمسالاتىن شىعىن كولەمى ۇلعايۋدا. وسىنداي كەزەڭدە حولدينگتەردىڭ اكىمشىلىك جانە باسقا دا شىعىندارىن ازايتىپ, شەكتەن تىس ۇلعايىپ كەتكەن شتاتىن ىقشامداۋ ماسەلەسىنىڭ وزەكتىلىگى ارتا تۇسەدى.
ۆياچەسلاۆ دودونوۆ,
قازاقستان ستراتەگيالىق زەرتتەۋلەر ينستيتۋتىنىڭ باس عىلىمي قىزمەتكەرى, ەكونوميكا عىلىمدارىنىڭ دوكتورى
