پرەزيدەنت • 24 قاڭتار، 2020

پرەزيدەنت اكىمدەرمەن كەڭەس وتكىزدى

94 رەتكورسەتىلدى

قاسىم-جومارت توقاەۆ «اقوردا» رەزيدەنتسياسىندا وبلىستاردىڭ جانە نۇر-سۇلتان، الماتى، شىمكەنت قالالارىنىڭ اكىمدەرىمەن كەڭەس وتكىزدى. بۇل تۋرالى اقوردانىڭ ءباسپاسوز قىزمەتى حابارلادى.

پرەزيدەنت وبلىستار مەن رەسپۋبليكالىق ماڭىزى بار قالالاردىڭ باسشىلارىنا وڭىرلەردى دامىتۋدىڭ وزەكتى ماسەلەلەرىن جەدەل شەشۋ جونىندە بىرقاتار ناقتى مىندەت جۇكتەدى.

– ەل ەكونوميكاسىن دامىتۋدىڭ نەگىزگى مىندەتى – حالىقتىڭ تۇرمىس ساپاسىن جاقسارتۋ جانە ىشكى تۇراقتىلىقتى ساقتاۋ. سوندىقتان ءبارىمىز مەملەكەت مۇددەسى جولىندا ەڭبەك ەتۋگە ءتيىسپىز، دەدى مەملەكەت باسشىسى.

قازاقستان پرەزيدەنتى بيىلعى جىل قوعامدىق-ساياسي وقيعالارعا تولى بولاتىنىن اتاپ ءوتتى. ونىڭ پىكىرىنشە، مەرەيتويلارعا ارنالعان ءىس-شارانىڭ بارلىعى ىسكەرلىك جانە اتاۋلى سيپات الۋى ءتيىس.

– بۇل ادەتتەگى استا-توك مەرەكەنىڭ ءبىرى ەمەس، قايتا يدەولوگيالىق تۇرعىدان ىلگەرىلەۋگە جانە قازاقستاندىقتاردى بىرىكتىرۋگە باعىتتالعان پراگماتيكالىق شارالار كەشەنى بولۋى كەرەك. پرەزيدەنت اكىمشىلىگى وڭىرلەرگە شارالاردىڭ يدەولوگيالىق ماقسات-مىندەتىنە قاتىستى ناقتى نۇسقاۋ بەرەدى، دەدى پرەزيدەنت.

قاسىم-جومارت توقاەۆ ۆولونتەر جىلىن ساپالى وتكىزۋدىڭ ماڭىزدىلىعىنا نازار اۋدارىپ، اكىمدەرگە مۇنىڭ مينيسترلىكتىڭ نەمەسە ۇكىمەت دەڭگەيىندە وتكىزىلەتىن كەزەكتى ءبىر اكتسيا ەمەس، ەلىمىزدىڭ بۇكىل ايماقتارىنداعى ازاماتتاردىڭ باسىم بولىگىن قامتيتىن جۇيەلى جۇمىس ەكەنىن ەسكەرتتى. بۇل ىستە اتقارۋشى ورگاندار شەشۋشى ءرول اتقارۋى ءتيىس.

سونىمەن قاتار مەملەكەت باسشىسى اكىمدەرگە تۇرعىندار تاراپىنان تۇسەتىن وتىنىشتەر مەن تالاپ-تىلەكتەر بويىنشا اتقارىلاتىن جۇمىستى كۇشەيتۋدى، جاڭا فورماتتاعى اتاۋلى الەۋمەتتىك كومەكتى بەرۋ كەزىندە ماقساتتى توپتارعا ءتيىمدى ءتۇسىندىرۋ جۇمىستارىن جۇرگىزۋدى، سونداي-اق، مىندەتتى الەۋمەتتىك مەديتسينالىق ساقتاندىرۋدى ەنگىزۋدى تاپسىردى. پرەزيدەنت حالىق ءجيى تۇتىناتىن الەۋمەتتىك ماڭىزى بار تاۋارلار باعاسىنىڭ تۇراقتىلىعىن قامتاماسىز ەتۋدى تالاپ ەتتى.

قاسىم-جومارت توقاەۆ اكىمدەرگە تۇرعىنداردىڭ قاۋىپسىزدىگىن ساقتاۋ جانە وقىس وقيعالاردىڭ الدىن الۋ ءۇشىن ءتيىستى شارالار قابىلداۋدى تاپسىرىپ، توتەنشە جاعدايلاردان ساقتانۋدىڭ ماڭىزدىلىعىن اتاپ ءوتتى.

قازاقستان پرەزيدەنتى ءسوزىنىڭ سوڭىندا وڭىرلەردى دامىتۋ جانە الەۋمەتتىك ماسەلەلەردى شەشۋ اكىمدەرگە جۇكتەلگەن ماڭىزدى مىندەت ەكەنىن ايتتى.

كەڭەستەن كەيىن مەملەكەت باسشىسى وبلىستار مەن رەسپۋبليكالىق ماڭىزى بار قالالاردىڭ بىرقاتار اكىمدەرىمەن جەكەلەي كەزدەستى.

سوڭعى جاڭالىقتار

بەتپەردە كيگەن كوكتەم - 7

قوعام • بۇگىن، 16:07

Samsung تاعى نە پاتەنتتەدى؟

تەحنولوگيا • بۇگىن، 15:23

تاسقىنعا – توسقىن

ايماقتار • بۇگىن، 13:25

قايىقشى اتانىڭ حيكاياسى

رۋحانيات • بۇگىن، 12:39

ۇقساس جاڭالىقتار