– وكىنىشكە قاراي, تاۋەلسىزدىك جىلدارى قىزمەتتىك بورىشىن اتقارۋ بارىسىندا 791 پوليتسيا قىزمەتكەرى مەرت بولدى. دارحاننىڭ مەزگىلسىز قازاسى سىزدەرگە عانا ەمەس, ەل تىنىشتىعىن ويلاعان بارشا حالىققا ورتاق قايعى. ىشكى ىستەر مينيسترلىگى الداعى ۋاقىتتا مارقۇمنىڭ وتباسىنا قولداۋ كورسەتەتىن بولادى. بەيبىت ءومىر كۇزەتىندە ناعىز ەرلىكتىڭ ۇلگىسىن كورسەتكەن دارحان بازارباەۆتىڭ ەسىمى قازاقستان پوليتسياسىنىڭ تاريحىندا ماڭگى قالادى, – دەدى مينيستر ورىنباسارى.
ءىىو ارداگەرلەر كەڭەسىنىڭ توراعاسى ومىرزاق بولسامبەكوۆتىڭ: «قۇرمەتتى سەرىك باۋىرىم, ءلاززات, ءمولدىر! قۇرمەتتى جەرلەستەر! كەشە عانا ورتامىزدا ءجۇرىپ, قىلمىسقا قارسى كۇرەسىپ, قوعامدىق ءتارتىپتى نىعايتۋعا ۇلەس قوسىپ جۇرگەن, انتىنا بەرىك ۇلىمىز قىلمىسكەردىڭ قولىنان قازا تاۋىپ, ومىردەن وزدى. سەرىك, اينالايىن! ءوسىردىڭ, باقتىڭ, قاقتىڭ. ءبىزدىڭ قاتارىمىزعا قىزمەتكە كەلدى. بۇل ورنى تولماس قايعى! ءبىز – مينيستردەن باستاپ, بۇكىل ىشكى ىستەر ورگاندارىنىڭ قۇرامى سىزدەردىڭ قايعىلارىڭا ورتاقپىز. دارحان بالامىزدىڭ باتىرلىعى مەن جارقىن بەينەسى ماڭگىلىك ەستە قالادى!» – دەپ ەگىلە سويلەگەن ءسوزى قابىرعاسى قايىسقان قارالى كوپشىلىكتى تەبىرەنتىپ ءوتتى.
قارالى ميتينگتە ءسوز العان قوستاناي وبلىسى اكىمىنىڭ ورىنباسارى سەرگەي كارپليۋك دارحاننىڭ ەسىمىن جەرلەستەرى ەشقاشان ۇمىتپايتىنىن ايتتى.
وبلىستىق پوليتسيا دەپارتامەنتىنىڭ باسشىسى بەكەت ايتماعامبەتوۆ:
– دارحان وتە جاس كەتتى. سوڭىندا تالاي ارمانى ورىندالماي قالدى. اتا-اناسى, اياۋلى جارى, كىشكەنتاي ۇلى قالدى. ورنى تولماس قازا بارلىعىمىزدىڭ قابىرعامىزدى قايىستىرىپ كەتتى. دارحاننىڭ وتباسى ەندى ءبىزدىڭ قامقورلىعىمىزدا بولادى, – دەدى.
جيىن اياقتالعان سوڭ قارالى كوش باتىر ۇلدىڭ ءمايىتىن كىندىك قانى تامعان تۋعان جەرى – لاۆرەنتەۆ اۋىلىنداعى قورىمعا قويدى.
دارحان سەرىك ۇلى بازارباەۆ 1995 جىلى 24 ساۋىردە قوستاناي وبلىسى اۋليەكول اۋدانى لاۆرەنتەۆ ەلدى مەكەنىندە دۇنيەگە كەلگەن. مەكتەپتى تامامداعاننان كەيىن, 2011 جىلى قوستاناي ەكونوميكالىق كوللەدجىنە وقۋعا ءتۇسىپ, ونى 2014 جىلى اياقتايدى. 2016 جىلى قازاقستان رەسپۋبليكاسىنىڭ قارۋلى كۇشتەرى قاتارىندا قىزمەت ەتەدى. وتان الدىنداعى اسكەري بورىشىن ابىرويمەن اتقارىپ, 2017 جىلى تۋعان جەرىنە ورالعان ول بىردەن ىشكى ىستەر ورگاندارىنا قىزمەتكە الىنادى. دارحان قاڭتاردىڭ 19-ىنا قاراعان ءتۇنى قىزمەتتىك بورىشىن اتقارىپ ءجۇرىپ, قاسكويدىڭ قولىنان مەرت بولدى.
28 جاستاعى توبىل قالاسىنىڭ تۇرعىنى ءوز ۇيىندە جانجال شىعارىپ, وتباسى مۇشەلەرىن پىشاقتاپ تاستاماقشى بولادى. تۋىستارى ونى سىرتىنان ق ۇلىپتاپ, پوليتسيا شاقىرعان. قۇرامىندا دارحان بازارباەۆ پەن امانگەلدى سىزدىقوۆ بار پاترۋل جاساعى وقيعا ورنىنا 6 مينۋت ىشىندە جەتەدى. قاسكۇنەمدى ۇستاپ جاتقاندا دارحان جۇرەك تۇسىنان پىشاق جاراقاتىن الادى. بىراق قىلمىسكەردىڭ سۋىق قارۋىن تارتىپ الىپ, قولىنا كىسەن سالىپ, وتباسىن اجالدان قۇتقارىپ ۇلگەرەدى. قىلمىسكەردى ەتبەتىنەن تۇسىرگەن سامداعاي پوليتسەي سەرىگى امانگەلدى سىزدىقوۆقا قاراپ: «وسى ماعان پىشاق ۇرىپ العان سياقتى», دەگەن ەكەن. ءبىر وتباسىن اجالدان قۇتقارىپ قالعان قاھارمان سەرجانت سول جەردە كوز جۇمدى. دەرەۋ جەتكەن جەدەل جاردەم قىزمەتى ونىڭ ومىرىنە اراشا تۇرا المادى. باتىردىڭ سوڭىندا اتا-اناسى, جارى, 4 ايلىق ۇلى قالدى.
دارحان بازارباەۆ قىزمەتتىك بورىشىن اتقارۋ ۇستىندە كورسەتكەن ەرلىگى مەن جانقيارلىعى ءۇشىن مەملەكەت باسشىسى قاسىم-جومارت توقاەۆتىڭ جارلىعىمەن ءىىى دارەجەلى «ايبىن» وردەنىمەن ناگرادتالدى.
قوستاناي وبلىستىق پوليتسيا دەپارتامەنتىندە وتكەن قارالى جيىندا ىشكى ىستەر ءمينيسترىنىڭ ورىنباسارى الەكسەي كالايچيدي وردەندى مارقۇمنىڭ اتا-اناسىنا تابىس ەتتى. ال ايماق باسشىسى ارحيمەد مۇحامبەتوۆ دارحاننىڭ وتباسىنا قوستاناي قالاسىنان ءبىر بولمەلى پاتەر بەردى.
نۇرقانات قۇلاباەۆ
قوستاناي
