سونىمەن قاتار كەزدەسۋگە اقپارات جانە قوعامدىق دامۋ ءمينيسترى داۋرەن اباەۆ, ءماجىلىس دەپۋتاتتارى, ەلىمىزدەگى الدىڭعى قاتارلى ۇكىمەتتىك ەمەس ۇيىمداردىڭ باسشىلارى قاتىستى.
ءىس-شارادا ءسوز سويلەگەن پرەمەر-ءمينيستردىڭ ورىنباسارى ب.ساپارباەۆ قوعامنىڭ ءار مۇشەسى مەملەكەتتىڭ دامۋىنا جاۋاپتى ەكەنىن ايتا كەلە, ۇكىمەتتىك ەمەس ۇيىمدار مەن مەملەكەتتىڭ قارىم-قاتىناسىنا توقتالدى.
«ۇكىمەتتىڭ نەگىزگى ماقساتتارىنىڭ ءبىرى – ۇكىمەتتىك ەمەس ۇيىمداردىڭ جۇمىسىن جەتىلدىرىپ, قوعامنىڭ ءال-اۋقاتىن ارتتىرۋ. ەلباسى نۇرسۇلتان نازارباەۆتىڭ, مەملەكەت باسشىسى قاسىم-جومارت توقاەۆتىڭ تاپسىرمالارىنا سايكەس, ۇكىمەت وسى باعىتتا اۋقىمدى شارالار اتقارىپ كەلەدى», دەدى ب.ساپارباەۆ. سونداي-اق پرەمەر-ءمينيستردىڭ ورىنباسارى ۇەۇ وكىلدەرىمەن كەزدەسۋ حالىقتىڭ مۇڭ-مۇقتاجىن تىڭداۋعا مۇمكىندىك بەرەتىنىن اتاپ ءوتتى. وسىلايشا, اتالعان ماسەلەلەردى ۇتىمدى شەشۋگە جول اشىلادى.
ء«بارىمىز دە وسى مەملەكەتتىڭ دامۋىنا, بولاشاعىنا جاۋاپتىمىز. كەمشىلىكتەر بولسا وعان دا جاۋاپ بەرەتىن – ءبىز. ويتكەنى ءبارىمىز دە قوعامنىڭ مۇشەسىمىز. ۇكىمەتتىڭ ماقساتى – ۇكىمەتتىك ەمەس ۇيىمدارمەن, قوعاممەن جۇمىس ىستەۋ. ۇكىمەتتىك ەمەس ۇيىمدار حالىقتى تولعاندىراتىن ماسەلەلەردى بىلەدى. سونى بىزگە جەتكىزىپ, ماسەلەلەردىڭ شەشىلۋى جولىندا بىرىگە جۇمىس ىستەۋىمىز كەرەك. ۇكىمەت ۇەۇ-مەن بىرگە جۇمىس ىستەۋگە ءاردايىم دايىن. بۇگىنگە دەيىن كوپتەگەن جۇمىس اتقارىلدى. مەملەكەت تاراپىنان كورسەتىلگەن قولداۋ از ەمەس. ارينە كەي باعىتتار ءالى دە جەتىلدىرۋدى تالاپ ەتەدى. الايدا, وسىنداي كەزدەسۋلەردىڭ, ۇكىمەتتىك ەمەس ۇيىم وكىلدەرى ايتقان ۇسىنىستاردىڭ ماڭىزى ەرەكشە», دەدى ب.ساپارباەۆ.
ءىس-شارادا ۇلتتىق سەنىم كەڭەسىنىڭ مۇشەلەرىن سايلاۋ, وعان ۇكىمەتتىك ەمەس ۇيىم وكىلدەرىن قوسۋ ماسەلەسى دە كوتەرىلگەن. ب.ساپارباەۆ مۇنداي ۇسىنىسقا قارسى ەمەس ەكەنىن ەسكەرتىپ, كەڭەسكە ۇكىمەتتىك ەمەس ۇيىم مۇشەلەرىن ەنگىزۋدى قولدايتىنىن جەتكىزدى.
«حالىقتىڭ شەشىلمەي جاتقان ماسەلەلەرىن قوعامدىق ۇيىمدار ارقىلى ءبىلىپ, وڭتايلى شەشىلۋىن قاداعالاۋ كەرەك. ءبىر سوزبەن ايتقاندا, ۇكىمەتتىك ەمەس ۇيىمدارمەن بىرگە اتقارار شارۋامىز از ەمەس. ديالوگ جاسايتىن الاڭدار قۇرىلىپ, قوماقتى قاراجات ءبولىنىپ كەلەدى. قوعامدىق ۇيىمدار ارقىلى اتقارىلىپ جاتقان شارۋا ەلگە جەتۋى كەرەك. حالىقتىڭ شەشىلمەي جاتقان ماسەلەلەرى قوعامدىق ۇيىمدار ارقىلى ايتىلىپ, شەشىمىن تابۋى ءتيىس», دەدى پرەمەر-ءمينيستردىڭ ورىنباسارى.
جيىنعا قاتىسقان ۇكىمەتتىك ەمەس ۇيىم وكىلدەرى ەلىمىزدە جاستار اراسىندا سۋيتسيدتىڭ كوبەيىپ كەتكەنىنە الاڭداۋشىلىق بىلدىرگەن. ب.ساپارباەۆ بۇل تۇيتكىلدى شەشۋگە قوعام بولىپ جۇمىلۋ قاجەت ەكەنىنە توقتالدى.
«بۇعان ءبارىمىز كىنالىمىز. ويتكەنى ولار ءبىزدىڭ بالالارىمىز. كىنانى ۇكىمەتكە عانا ارتۋ دۇرىس ەمەس. ولاردىڭ اتا-انالارى قايدا قاراپ وتىر؟ ارينە بيلىكتىڭ كەمشىلىگى بار. كەي ءساتتى ەسكەرمەي قالۋى, كەي سالاعا قارجى از ءبولىنۋى مۇمكىن. جاسوسپىرىمدەردىڭ بوس ۋاقىتىن ءتيىمدى پايدالانۋعا باعىتتالعان سپورتتىق شارالار جەتكىلىكسىز بولۋى ىقتيمال. الايدا, اتا-انانىڭ جاۋاپكەرشىلىگىن دە ۇمىتپاعان ابزال. سوندىقتان «پەداگوگ مارتەبەسى تۋرالى» زاڭدا اتا-انانىڭ جاۋاپكەرشىلىگىنە ەرەكشە نازار اۋدارىپ وتىرمىز. بۇل تۇيتكىلمەن بىرلەسىپ كۇرەسۋىمىز كەرەك», دەدى ب.ساپارباەۆ.
بۇدان بولەك, جيىن بارىسىندا ازاماتتىق قوعامدى دامىتۋ, سەنىم مادەنيەتىن قالىپتاستىرۋ, مەملەكەت پەن ازاماتتىق قوعام ينستيتۋتتارىنىڭ قارىم-قاتىناسى, الەۋمەتتىك كاسىپكەرلىك سەكىلدى قوعامداعى ماڭىزدى ماسەلەلەر تالقىلاندى.
