ەل پرەزيدەنتى قاسىم-جومارت توقاەۆتىڭ جارلىعىمەن 28 جەلتوقسان ازا تۇتۋ كۇنى بولىپ جاريالانىپ, ويىن-ساۋىق ءىس-شارالارى توقتاتىلعان بولاتىن. الايدا, ەرەيمەنتاۋ اۋدانىنىڭ اكىمدىگى ءدال سول كۇنى جاڭاجىلدىق كورپوراتيۆتەن باس تارتپاعان. ادەپ جونىندەگى كەڭەس وتىرىسىندا اكىم ءوز كىناسىن مويىندادى.
– مەن 28-ءى كۇنى تاعى ءبىر جولداسىمنىڭ تۋىسىنىڭ تۋعان كۇنى بولىپ, «اسىلتاس» مەيرامحاناسىنا باردىم. سول جەردە جينالعان حالىقتى جاڭا جىل مەرەكەسىمەن قۇتتىقتادىم. بىلمەگەنىم دە بار شىعار. جاڭادان تاعايىندالعان اكىممىن. كەلەشەكتە مۇنداي قاتەلىكتەرگە جول بەرىلمەيدى دەپ ۋادە بەرەمىن, – دەيدى ەرەيمەنتاۋ اۋدانىنىڭ اكىمى اباي ءالجانوۆ.
– اكىمنىڭ كىناسى انىق دەپ ويلايمىن. ارينە, بۇدان دا اۋىر جازا قولدانىپ, قىزمەتىنەن بوساتۋعا دا بولاتىن ەدى. ءبىز ءوز ۇسىنىمىمىزدى بەردىك. ال شەشىمدى اقمولا وبلىسىنىڭ اكىمى ەرمەك مارجىقپاەۆ قابىلدايتىن بولادى. سەبەبى, ول تىكەلەي وبلىس باسشىلىعىنىڭ قاراماعىنداعى قىزمەتكەر, – دەيدى وبلىستىق ءماسليحات حاتشىسى الىبەك بايماعامبەتوۆ.
ايتا كەتەيىك, اباي ءالجانوۆ ءوزى باسقاراتىن ەرەيمەنتاۋ اۋدانىنىڭ تۋماسى.
اقمولا وبلىسى
