جاعىمدى جاڭالىق دۇنيە ءجۇزىنىڭ جەلى قولدانۋشىلارىن دا بەيجاي قالدىرمادى. كىشكەنتاي ياگۋاردىڭ ومىرگە كەلۋى ورتكە ورانعان اۋستراليا قۇرلىعىنىڭ قايعىسىن بولىسۋگە ۇندەگەندەي ەدى... ءيا, ورتكە ورانعان اۋستراليا كۇللى الەمدى كۇڭىرەنتتى. الەمدە سيرەك كەزدەسەتىن ميللياردتاعان جانۋارلار ارالى قىزىل جالىن قۇرساۋىندا قالدى. اۋستراليا تۇرعىندارىنىڭ جان كۇيزەلىسىن بولىسپەك نيەتتە الەۋمەتتىك جەلى قولدانۋشىلارى كىشكەنتاي ياگۋارعا ات قويۋعا, ونىڭ تىرشىلىك الەمىندەگى قادامىنا سۇيىسپەنشىلىك ءبىلدىرىپ, كوپتەگەن ەسىم ۇسىندى. زووباق قىزمەتكەرلەرى جەلىدەگى بارلىق ۇسىنىستى ساراپتاي كەلە, تەڭبىل كۇشىككە «اۋستراليا» دەپ ات قويىپ, ونىڭ قىرىق كۇن شيراۋىن كۇتتى.
ياگۋار كۇشىگىنىڭ جاعدايىمەن تانىستىرعان جانۋارلار باعى دامۋ ءبولىمىنىڭ مەڭگەرۋشىسى اقجاني راحيموۆانىڭ ايتۋىنشا, بىلتىر 9 قاراشادا تۋعان ياگۋار كۇشىگى مەن ەنەسىن ماماندار قىرىق كۇن كۇتىپ باپتادى. كۇش-قۋات جيىپ, وزدىگىنەن تىرشىلىك الەمىنە قادام باسۋىنا ەرەكشە كوڭىل ءبولىندى. اۋستراليانىڭ اناسى مومىن 2010 جىلى وسى زووباقتا تۋعان, سارا جانە فرانتسۋز ەسىمدى ياگۋارلاردىڭ ءتولى. ال اكەسى 2014 جىلى نوۆوسىبىردەن اكەلىنگەن ۆاسكا ەسىمدى ياگۋار. ولاردىڭ بەس جىلعى جۇپتاسۋىنان كەيىن اۋستراليا ومىرگە كەلگەن. بۇگىندە زووباقتا 4 ياگۋار تىرشىلىك ەتۋدە. جىرتقىشتار ءبولىمىنىڭ مەڭگەرۋشىسى داۋرەن كەنجەبەكوۆتىڭ ايتۋىنشا, قازىر باۋىرىن كوتەرگەن تەڭبىلشەردىڭ سالماعى 5 كيلوعا جۋىقتادى, قيمىلى شيراق. ءوزىن ءجيى سۇيسىنە باقىلايتىندارعا دا ۇيرەنىپ قالعانداي. ياگۋار كۇشىگىنىڭ مىقتى بولىپ ءوسۋى ءۇشىن ەنەسىنە قولايلى جاعداي جاسالدى. زووباق قىزمەتكەرلەرىنىڭ الەۋمەتتىك جەلى ارقىلى تاراعان وتىنىشىنە وراي قالا تۇرعىندارى زووباققا بەس جۇزگە جۋىق جاڭا جىلدىق شىرشا اكەلگەن. شىرشالار ءتورت اياقتىلارعا ءارى تاعام رەتىندە ءارى كوڭىل الدارقاتۋ ءۇشىن قاجەت.
زوولوگيا ينستيتۋتى تەريولوگيا ءبولىمىنىڭ كىشى عىلىمي قىزمەتكەرى سانجار قاڭتارباەۆتىڭ ايتۋىنشا, ياگۋاردىڭ وتانى – وڭتۇستىك امەريكا, امازونكانىڭ تروپيكالىق ورماندارى. جىرتقىشتاردىڭ, ونىڭ ىشىندە مىسىق تۇقىمداسقا جاتاتىن جانۋاردىڭ بۇل ءتۇرىن ساقتاۋ بويىنشا قازاقستان 1992 جىلى ريو-دە-جانەيرودا قابىلدانعان بيولوگيالىق ارتۇرلىلىكتى ساقتاۋ كونۆەنتسياسىنا قوسىلعان. ياگۋارلاردى تابيعاتتا نەمەسە جاساندى ورتادا ساقتاۋ حالىقارالىق تالاپتار نەگىزىندە جۇزەگە اسۋدا. بۇگىندە قازاقستاندى مەكەندەيتىن تۇركىستان سىلەۋسىنى, قار بارىسى, مانۋل, دالا مىسىعى سياقتى مىسىق تۇقىمداستار دا ەرەكشە قورعاۋعا الىنعان.
الماتى
