الەم • 17 قاڭتار، 2020

سەنات ترامپقا يمپيچمەنت جاريالاي ما؟

25 رەتكورسەتىلدى

وكىلدەر پالاتاسى اقش پرەزيدەنتى دونالد ترامپقا جاريالانعان يمپيچمەنت قۇجاتىن رەسمي تۇردە سەناتقا تاپسىردى. ەندى جوعارعى پالاتا وكىلدەرى اق ءۇي باسشىسىنىڭ تاعدىرىن مايشاممەن قاراماق.

ەستەرىڭىزدە بولسا، وتكەن ايدا وكىلدەر پالاتاسى كوپشىلىك داۋىسپەن د.ترامپقا يمپيچمەنت جاريالاۋ تۋرالى شەشىم قابىلداعان-تۇعىن. الايدا، پالاتا سپيكەرى قۇجاتتى سەناتقا بەرۋگە اسىقپاعان-دى. اقىرى ۇزاق ۋاقىت تالقىعا تۇسكەن قۇجات مارەگە جاقىنداپ كەلەدى.

اقش پرەزيدەنتى د.ترامپ بيىلعى سايلاۋداعى باستى قارسىلاسى دجو بايدەننىڭ كيەۆتەگى ارەكەتىن تەكسەرتۋ ماقساتىندا ۋكرايناعا قۇپيا تۇردە 391 ميلليون دوللار بەردى دەگەن كۇدىكپەن ايىپتالىپ وتىر. سونداي-اق وكىلدەر پالاتاسى يمپيچمەنت ماسەلەسىن قاراستىرۋ كەزىندە كەي قۇجاتتاردى جاسىرىپ، كۋاگەرلەرگە كەدەرگى جاسادى دەپ ەسەپتەيدى.

وكىلدەر پالاتاسىنىڭ سپيكەرى نەنسي پەلوسيدىڭ ايتۋىنشا، مۇنداي قۇجاتتىڭ قابىلدانۋى ءاردايىم قيىن. «پرەزيدەنتتىڭ ارەكەتى ۇلتتىق قاۋىپ­سىز­دىگى­مىزگە نۇقسان كەلتىرىپ، ءوز اكىمشىلىگىنىڭ ابىرويىن توگىپ، داۋىس بەرۋ بارىسىن بۇزىپ، وسىنداي جاع­دايعا جەتكىزگەنى ەلىمىز ءۇشىن وتە وكىنىشتى، وتە قيىن. پرەزيدەنت بارىنە جاۋاپ بەرۋى ءتيىس. ەشكىم زاڭنان جوعارى ەمەس»، دەدى ول يمپيچمەنت قۇجاتىنا قول قويۋ راسىمىنەن كەيىن.

وسىلايشا، جوعارعى پالاتا وكىلدەرى ترامپتىڭ تاعدىرىنا قاتىستى قۇجاتتى 21 قاڭتاردان باستاپ ەگ­جەي-تەگجەيلى زەرتتەمەك. يمپيچمەنتتى قاراۋ ءتارتىبى دە ەرەكشە. اۋەلى قۇجات سەناتتا وقىلۋى ءتيىس. سودان كەيىن پالاتا دەپۋتاتتارى مەن جوعارعى سوت انت بەرەدى. سودان كەيىن عانا قۇجات جۇمىسقا الىنادى.

انت بەرۋ ءراسىمى اياقتالعان سوڭ سەنات ارنايى حات ازىرلەپ، د.ترامپتى پارلامەنتتىك تىڭدالىم­عا شاقىرادى. نەگىزى اتالعان جيىنعا اق ءۇي باس­شى­سىنىڭ قاتىسۋى مىندەتتى ەمەس. د.ترامپ ءوز ورنىنا سەنىم بىلدىرگەن وكىلىن جىبەرۋىنە مۇمكىندىگى بار.

د.ترامپ وزىنە تاعىلعان ايىپتارمەن كەلىسپەيدى. اقش پرەزيدەنتى وكىلدەر پالاتاسىنىڭ توراعاسى نەنسي پەلوسيگە حات جولداپ، ونى امەريكا دەمو­كرا­تياسىنا سوعىس اشتى دەپ كىنالاعان. پرەزي­دەنت اكىمشىلىگى دە ءبارىن جوققا شىعارىپ وتىر. «پرە­زيدەنت ترامپ ەشقانداي ورەسكەل ارە­كەت جاساعان جوق. سوندىقتان ونىڭ اقتالىپ شىعاتى­نىنا سەنىمدىمىز»، دەلىنگەن اق ءۇي تاراتقان مالىم­دەمەدە.

ايتا كەتەرلىگى، اقش سەناتى ءوز تاريحىندا ءۇشىنشى رەت قانا يمپيچمەنت ماسەلەسىن قاراستىرماق. وكىلدەر پالاتاسى 1868 جىلى ەندريۋ دجونسونعا، 1998 جىلى بيلل كلينتونعا قاتىستى ءىس قوزعاعان-دى. ايتسە دە، سەنات ەكى پرەزيدەنتتى دە اقتاپ شىق­قان-تۇعىن. قازىرگى تاڭدا سەناتتا 100 دەپۋتات بار. ونىڭ 53-ءى رەسپۋبليكاشىل، 45-ءى دەموكرات، قالعان ەكەۋى پارتياسىز. د.ترامپتى ءوز قۇزىرەتىن اسىرا پايدالاندى دەپ تانۋ ءۇشىن پالاتا دەپۋتاتتارىنىڭ ۇشتەن ەكىسى يمپيچمەنت قۇجاتىن قولداپ داۋىس بەرۋى كەرەك. الايدا، سەناتتا اق ءۇي باسشىسى­نىڭ جاق­تاستارى – رەسپۋبليكاشىلاردىڭ كوپ ەكەنىن ەسكەرسەك، د.ترامپقا يمپيچمەنت جاريالانۋى ەكىتالاي.

وكىلدەر پالاتاسى يمپيچمەنت قۇجاتىن سەنات­قا تاپسىرعاننان كەيىن د.ترامپقا تاعىلعان ايىپقا قاتىستى جاڭا دەرەك تابىلدى. وندا اقش پرەزيدەنتىنىڭ جولداعان حاتتارى، تەلەفون ارقىلى سويلەسۋى، جازبالارى بار. بۇل دالەلدەردى بيزنەسمەن لەۆ پارناس تەرگەۋشىلەرگە تاپسىرعان ەكەن. ل.پارناس كەزىندە د.ترامپتىڭ جەكە زاڭگەرى بولعان رۋدولف دجۋليانيمەن جاقىن ارالاسىپ، دەرەكتەردى سودان العان كورىنەدى.

سونداي-اق تاعى ءبىر ماسەلە ءالى شەشىلمەي تۇر. جوعارىدا ايتىلعان دەرەكتەر مەن كۋاگەرلەردى تىڭدالىمعا شاقىرۋ ءۇشىن سەنات داۋىس بەرۋى كەرەك. الايدا، سەنات قۇرامىنىڭ كوپشىلىگى رەسپۋبليكاشىلار ەكەنىن ەسكەرسەك، تىڭ مالىمەتتەر ەسكەرىلمەي قالۋى ىقتيمال. قىسقاسى، اقش-تا سايلاۋ الدىندا ساياسي جاعداي شيەلەنىسىپ تۇر.

 

سوڭعى جاڭالىقتار

الىپ ءتيىن تورگە وزدى

ايماقتار • كەشە

18،6 ميلليونعا جەتتىك

قازاقستان • كەشە

كحل: «بارىس» جەڭىسكە جەتتى

حوككەي • 15 اقپان، 2020

جول قۇرىلىسىنان تابىلعان اقاۋ كوپ

ايماقتار • 15 اقپان، 2020

اقتوبەدە اۆتوبۋس اۋدارىلدى

ايماقتار • 15 اقپان، 2020

بيىل بقو-دا 1710 پاتەر بەرىلەدى

ايماقتار • 15 اقپان، 2020

جەر سىلكىندى

قازاقستان • 15 اقپان، 2020

ۇقساس جاڭالىقتار