وتكەن جىلى 53 مەكتەپكە 849 كامەرا قويىلعان. ونىڭ كومەگىمەن بالالاردىڭ قاۋىپسىزدىگىن قامتاماسىز ەتىپ, ءبىلىم بەرۋ وشاقتارىندا ورىن العان زاڭ بۇزۋشىلىقتاردى انىقتاۋعا بولادى. تيىمدىلىگى كوزگە ۇرىپ تۇر. قازىر بالالاردىڭ اراسىنداعى ۇساق-تۇيەك كيكىلجىڭ بۇرىنعىمەن سالىستىرعاندا اجەپتاۋىر ازايعاندىعى بەلگىلى. كوكشەتاۋ قالاسىنداعى №6 مەكتەپكە بەينەباقىلاۋ كامەرالارى وسىدان 7 جىل بۇرىن ورناتىلىپتى. قازىر ەسكىرگەن.
–مەكتەپكە 19 كامەرا ورناتىلعان. 2020 جىلى كامەرالار جاڭارتىلادى دەپ كۇتىلۋدە. كامەرانىڭ كومەگىمەن وقۋشىلاردىڭ ۇمىتقان, جوعالعان زاتتارى جىلدام تابىلىپ, قۇقىق بۇزۋشىلىق فاكتىلەرىنىڭ الدىن الامىز, دەيدى №6 مەكتەپ-ليتسەيىنىڭ ديرەكتورى ايشولپان سەمباەۆا.
بۇگىندە وبلىستاعى 556 مەكتەپتىڭ 60 پروتسەنتىنە 5 مىڭعا تارتا بەينەباقىلاۋ كامەرالارى ورناتىلعان. سونداي-اق, 136 مەملەكەتتىك بالا باقشانىڭ 120-سىنا جانە 100 شاقتى جەكەمەنشىك بالاباقشاعا وسىنداي قۇرىلعىلار قويىلدى. وسى جىلدىڭ ءبىرىنشى قىركۇيەگىنە دەيىن ءوڭىردىڭ بارلىق مەكتەپتەرىندە, ءار سىنىپتا كامەرا بولادى. بۇل جوباعا 353 ميلليون تەڭگە جۇمسالماق.
–بۇل شارا ءبىلىم بەرۋ مەكەمەلەرىندە ورىن العان كەز-كەلگەن قۇقىق بۇزۋشىلىقتىڭ الدىن جىلدام الۋعا كومەكتەسەدى, دەيدى وبلىستىق ءبىلىم باسقارماسى جەتەكشىسىنىڭ ورىنباسارى ۆالەري گامازوۆ.
