بۇل يگىلىكتى ءىستى مالىك عابدۋللين مۋزەيىنىڭ ديرەكتورى قۇدايبەرلى مىرزابەك ۇيىمداستىرعان ەكەن. وعان مەكتەپتىڭ بۇرىنعى ديرەكتورى ءمادينا بەلگىبايقىزى, ساندۋعاش اسىلبەكقىزى, بايان جارقىزى كومەكتەسىپتى. مۋزەي ءوڭىرىمىزدىڭ تاريحي تۇلعالارىن جەرگىلىكتى تۇرعىندار مەن وقۋشىلارعا تانىتۋعا باعىتتالعان. حالىق اقىنى سوناۋ كەڭەس زامانىندا ايتىس ونەرىنىڭ ۇزىلمەي, دامۋىنا ايتۋلى ۇلەس قوسقان.
قازاقستاننىڭ ەڭبەك سىڭىرگەن قايراتكەرى, جازۋشى-دراماتۋرگ, سەناتورلار كەڭەسىنىڭ مۇشەسى جابال ەرعاليەۆ قۇتتىقتاۋ سوزىندە كوكەن شاكەەۆ مۋزەيىنىڭ اشىلۋى اقمولا مەن كوكشەتاۋ ءوڭىرى ءۇشىن ايتۋلى تاريحي وقيعا ەكەنىن, حالىق اقىنىنىڭ ەسىمىن ەل ەسىندە ساقتاۋ ءۇشىن مۋزەيدىڭ ۇلكەن ماڭىزى بار ەكەندىگىنە توقتالدى. ەلىمىزدىڭ رۋحىن كوتەرىپ, ەلدىگىن كورسەتىپ, ەلدىڭ ساناسىن وياتۋعا, تاريحى مەن شەجىرەسىن جيناۋعا قيساپسىز ەڭبەك ەتكەن كوكەن اقىننىڭ ءىزباسارى, وسى ءىستى ۇيىمداستىرۋعا ۇلكەن ەڭبەك سىڭىرگەن قۇدايبەرلى مىرزابەككە العىسىن ءبىلدىردى. كوكشەتاۋدىڭ ءان ونەرىن, سەرىلىگى مەن سالدىعىن, اقىن-جىرشىلارىنىڭ ونەر جولىن جالعاستىرعان كوكەن شاكەەۆ ەكەندىگى داۋسىز ماسەلە.
ول كوكشەتاۋدىڭ ابىرويى, ايدىنى, ايبىنى, اسقار تاۋى بولدى. شارا بارىسىندا كراسنويار سەلولىق وكرۋگىنىڭ اكىمى نۇرلان ايسين مەن مارالبەك كوكەن ۇلى وزدەرىنىڭ جىلى لەبىزدەرىن ءبىلدىردى. مۋزەيدىڭ كوك لەنتاسى قيىلىپ, شاشۋ شاشىلدى. شاراعا قاتىسۋشىلار مەكتەپتىڭ «رۋحاني جاڭعىرۋ» مۋزەيىن ارالاپ, مەكتەپ وقۋشىلارى مەن كوكەن شاكەەۆ اتىنداعى ايتىس اقىندارى مەكتەبىنىڭ ونەرىن تاماشالادى.
