«اقتوبە قالالىق سال اۋرۋىنا شالدىققان ازاماتتاردى قولداۋ ورتالىعى» قوعامدىق بىرلەستىگىنىڭ جانىنان 2007 جىلى اشىلعان, دوستىق, ادالدىق, راقىمشىلىق دەگەن ادەمى ۇعىمداردىڭ باس ارىپتەرىنەن قۇرالعان ۇيىم – «د.ا.ر.» ەرىكتىلەر كلۋبىن ءاۋ باستا قازاقستاننىڭ ەڭبەك ەرى قۇرالاي بايمەنوۆا قۇرعان. وڭىردەگى بەلسەندى ۇكىمەتتىك ەمەس ۇيىمنىڭ قىزمەتى نەگىزىنەن مۇمكىندىگى شەكتەۋلى ازاماتتاردى قولداۋعا باعىتتالعان, الەۋمەتتىك كومەككە باسا ماڭىز بەرىلەدى. قازىرگى تاڭدا جۇزدەن استام مۇشەسى بار ورتالىقتى قۇرۋداعى ماقسات تا سول – قولاربادا وتىراتىن قامكوڭىل جاندارعا دەمەۋ بولۋ. ۇلكەن جۇرەكتى ازاماتتاردىڭ باسىن قوسقان كلۋبتىڭ ۇيلەستىرۋشىسى گاۋھار جۇماعازيەۆا:
– بۇل – زور جاۋاپكەرشىلىكتى قاجەت ەتەتىن جۇمىس. قاتارىمىزعا كامەلەت جاسىنان اسقانداردى عانا قابىلدايتىنىمىز سوندىقتان. ماسەلەن, ول كىسى مۇمكىندىگى شەكتەۋلى جاننىڭ اۋلاسىنداعى قارىن ارشۋعا نەمەسە دۇكەننەن تاماعىن الىپ كەلۋگە جۇمىلدىرىلۋى مۇمكىن. ءتىپتى, ۇيىندە بالا-كەلىندەرى مەن نەمەرەلەرى بولسا دا, شۇيىركەلەسىپ اڭگىمە ايتۋعا قۇشتار, وزىنە رۋحاني سەرىك ىزدەيتىندەر ۇشىراسادى. سول سياقتى ءبىز ۇلى وتان سوعىسىنىڭ ارداگەرلەرى مەن تىل ەڭبەككەرلەرىنە دە جاردەمدەسەمىز. ورتالىق قوعامدىق نەگىزدە جۇمىس ىستەپ, ەشكىمگە قارجىلاي قولداۋ كورسەتپەيدى. ماقسات – ۇيدە وتىرعان زەينەتكەرلەر مەن ءارتۇرلى جاستاعى مۇگەدەك جاندارعا قولعابىس تانىتۋ, – دەيدى.
گاۋھاردىڭ ايتۋىنشا, ۆولونتەرلىك قىزمەتتى تەك ناۋقاس بالالارعا قاراجات جيناۋمەن, قارتتاردىڭ «قولىن ۇزارتۋمەن» بايلانىستىراتىندار كوپ. بۇل – قاتە تۇسىنىك.
قازاقستاننىڭ وزىندە ۆولونتەرلەر جۇمىسىنىڭ 15 باعىتى تۇزىلگەن. ولاردىڭ اراسىندا مەديتسينالىق (دونورلىق), ەكولوگيالىق, جانۋارلارعا ارنالعان, مادەني-كوپشىلىك, عالامتور كەڭىستىگىندەگى, توتەنشە جاعداي كەزىندەگى ۆولونتەرلىك, ت.ب. بار. «قازىرگى تاڭدا قوعام اراسىندا ۆولونتەرلىك قوزعالىس وتە قارقىندى دامىپ كەلەدى. دەگەنمەن, قوعامدىق قىزمەتتىڭ ءمان-ماعىناسىن دۇرىس تۇسىنبەيتىندەر دە كەزدەسەدى. ونداي جاعداي, ۆولونتەر ءيميدجىنىڭ تومەندەۋىنە اكەلىپ سوقتىرادى.
اقتوبەدە دە ۆولونتەرلىك ۇيىمداردىڭ سانى جىلدان-جىلعا كوبەيىپ كەلە جاتىر. ىشتەي قۋاناسىڭ. بىراق ولاردىڭ جۇمىسى ۆولونتەرلىكتىڭ نەگىزگى قاعيدالارىنا نەگىزدەلسە, تەك ەل اۋزىنا ىلىگۋ ءۇشىن جاسالماسا ەكەن دەيسىڭ... جالپى, ۆولونتەرلەر قىزمەتىنىڭ قۇقىقتىق نەگىزدەرى, ماقسات-مىندەتى مەملەكەت تاراپىنان بەلگىلەنۋى كەرەك دەپ ەسەپتەيمىن. ال ۆولونتەرلەردىڭ وزىنە وقۋ اقىسىن تولەۋ جاعىنان جەڭىلدىك جاساۋ دۇرىس پا, بۇل – ۇلكەن سۇراق. نەگە دەسەڭىز, بۇل ۆولونتەرلەردىڭ قاعيداتتارىنا سايكەس كەلمەيتىن سياقتى. ياعني ءبىزدىڭ جۇمىستىڭ نەگىزى رياسىز, وتەۋسىز كومەكتەن تۇرماي ما؟ ەگەر الگىندەي جاعداي ۇسىنىلسا, باسقا پيعىلداعى جاستار دا ۆولونتەر بولۋعا ۇمتىلۋى مۇمكىن», — دەپ سىر شەرتەدى اڭگىمەلەسۋشىمىز.
2019 جىلدىڭ سوڭىندا نۇر-سۇلتان قالاسىندا جاستار جىلى قورىتىندىلانعان سالتاناتتى شارادا گاۋھار مەملەكەت باسشىسىنىڭ قولىنان العىس حات الدى. مۇنداي ۇلكەن قۇرمەتكە يە بولعان اقتوبەلىك ۆولونتەر اتالعان سالاداعى ەڭبەگىنىڭ ەلەنگەنىنە ءدان ريزا.
– مەنى ۇسىنعان — ۇلتتىق ۆولونتەرلىك جەلىسى. شىنىمدى ايتسام, بۇل كۇتپەگەن جەردەن العان ماراپات بولدى. وتە قاتتى قۋاندىم. ەل پرەزيدەنتى قاسىم-جومارت توقاەۆتىڭ قولىنان العىس حات الۋ مەن ءۇشىن ۇلكەن مارتەبە. مۇنى جىلدار بويى سىڭىرگەن ەڭبەگىمنىڭ باعالانعانى دەپ بىلەمىن.
«ۆولونتەر» ءسوزى شەتەلدەن ەنگەن تەرمين بولعانىمەن, قازاق حالقى اتام زاماننان كومەككە زارۋلەردى ەسكەرۋسىز قالدىرماي, جەسىرى مەن جەتىمىن جىلاتپاعان. سوندىقتان ەرىكتىلەر قىزمەتىن باتىستان ۇيرەنىپ جاتىرمىز دەگەنگە كەلىسپەيمىن. تەك بۇل ۇعىمدى قايتا جانداندىرىپ جاتىرمىز دەگەنىمىز دۇرىس بولار, – دەيدى گاۋھار قارشىعاقىزى.
كەيىپكەرىمىزدەن ۇيىمداعى ەڭ جاس مۇشە 18-دە بولسا, ەڭ ۇلكەنى – 70-تەن اسقان قارت ەكەنىن بىلدىك. سوڭعىسى – قۇرمەتتى دەمالىستاعى زاڭگەر قولاربادا وتىرعاندارعا اقىسىز نەگىزدە قۇقىقتىق كەڭەس بەرەدى. ودان بولەك, ۆولونتەرلەردىڭ اراسىندا قارتتار ءۇيى, بالالار ءۇيى سياقتى الەۋمەتتىك نىساندارعا ۇدايى بارىپ, كونتسەرت قوياتىن ونەرلى جاستار دا بار. وسى ورايدا «د.ا.ر.» ەرىكتىلەر كلۋبىنىڭ مۇشەسى بولىپ ءجۇرىپ تانىسقان, كەيىن تابىسقان جاستاردىڭ ءبىرشاما ەكەنىن ايتپاي كەتۋگە بولمايدى. ولاردىڭ ءبىرازى بۇل كۇندە جان قالاۋىن بىرلەسىپ ورىنداپ ءجۇر. ەڭ العاش سىڭارىن اتالعان كلۋبتىڭ وتكىزگەن شارالارىندا كەزدەستىرىپ, شاڭىراق كوتەرگەن ەرىكتى مەن مۇمكىندىگى شەكتەۋلى جاندار دا بار.
ورتالىق بەلسەندىلەرى بىرقاتار رەسپۋبليكالىق بايقاۋلاردان دا جۇلدەمەن ورالىپ ءجۇر. ماسەلەن, ەلوردادا وتكەن «ۇزدىك ۆولونتەر» سايىسىندا «ۆولونتەرلىك بويىنشا ۇزدىك جوبا» اتالىمى بويىنشا «د.ا.ر.»-دىڭ جاستارى وزگەلەردەن وق بويى وزىپ شىعىپ, ءبىلىم جانە عىلىم مينيسترلىگى تاراپىنان ديپلوم مەن باعالى سىيلىققا يە بولدى. سونىمەن بىرگە ۇيىم كوپتەگەن حالىقارالىق, رەسپۋبليكالىق قوزعالىستاردان جەمىستى جۇمىسى ءۇشىن العىس حاتتار العانىن ايتا كەتكەنىمىز ابزال.
جالپى, ۇلتتىق ۆولونتەرلىك جەلىسىنىڭ مالىمەتىنشە, اقتوبەنىڭ وزىندە يگى ءىس جاساۋعا ۇمتىلعان 30-دان استام ۇيىم بار. «د.ا.ر.» ەرىكتىلەر كلۋبىنان بولەك, قايىرىمدىلىققا دەن قويعان «قىزىل اي» قوعامى وبلىستىق فيليالىنىڭ جانىنان قۇرىلعان ۆولونتەرلەر توبى, «جۇرەكتەن جۇرەككە» جانە «مەيىرىم» كلۋبتارىنىڭ ماقساتى ءبىر – قينالعاندارعا قولۇشىن سوزۋ. بىلگەنىمىزدەي, ونداعىلاردىڭ 70 پايىزىن جاسى 29-عا تولماعان جاستار قۇرايدى.
ايبەك تاسقاليەۆ,
جۋرناليست
اقتوبە وبلىسى
