قىلمىستىق كودەكسكە ەسىرتكىنى ناسيحاتتاۋ نەمەسە جارنامالاۋ ءۇشىن قىلمىستىق جاۋاپكەرشىلىك بەلگىلەيتىن جاڭا 299-1-باپ ەنگىزىلدى. ول بويىنشا ءۇش جىلعا دەيىن باس بوستاندىعىنان ايىرۋ تۇرىندەگى جازا كوزدەلگەن.
ەگەر وسى قىلمىس توپپەن, بىرنەشە رەت, ءبىلىم ۇيىمدارىندا نەمەسە ادام كوپ جينالاتىن ورىنداردا, بۇقارالىق اقپارات قۇرالدارىن نەمەسە ەلەكتروندى اقپارات رەسۋرستارىنىڭ قىزمەتتىك جاعدايىن پايدالانىپ جاسالسا, 3 جىلدان 6 جىلعا دەيىن باس بوستاندىعىنان ايىرۋ تۇرىندەگى جازا بەلگىلەنەدى.
بۇدان باسقا بىرقاتار قىلمىستىق باپقا «ەلەكتروندى اقپاراتتىق رەسۋرستاردى پايدالانۋ ارقىلى» دەگەن جاڭا سارالاۋ بەلگىسى ەنگىزىلدى.
«بۇل شارالار ەسىرتكىنى تاراتۋدىڭ جاڭا ادىستەرى ءۇشىن جازانىڭ بولماي قويمايتىندىعىن قامتاماسىز ەتۋ ءۇشىن قاجەت. بۇل دەگەنىمىز ينتەرنەت تەحنولوگيالاردى – سايتتاردى جانە ەلەكتروندى الەۋمەتتىك جەلىلەردى ينستاگرام, تەلەگرام, فەيسبۋك, سونداي-اق ەلەكتروندى تولەم جۇيەلەرىن (كيۆي ءاميان, ياندەكس دەنگي جانە ت.ب.) پايدالانۋ», دەپ ءتۇسىندىردى ەسىرتكى قىلمىسىنا قارسى ءىس-قيمىل دەپارتامەنتى باستىعىنىڭ ورىنباسارى نۇرتاي ءابىلماجىنوۆ.
اتالعان قىلمىستار اۋىر جانە اسا اۋىر قىلمىستار ساناتىنا جاتقىزىلعان. ەلەكتروندى اقپاراتتىق رەسۋرستاردى پايدالانۋ ارقىلى ەسىرتكى وتكىزۋ 10 جىلدان 15 جىلعا دەيىن باس بوستاندىعىنان ايىرۋمەن جازالانادى. ەلەكتروندى رەسۋرستار ارقىلى ەسىرتكى قولدانۋعا كوندىرۋ 3 جىلدان 8 جىلعا دەيىن باس بوستاندىعىنان ايىرۋعا اكەلەدى. ولاردىڭ كومەگىمەن ەسىرتكى وندىرىسىندە پايدالانىلاتىن زاتتاردىڭ اينالىمى ءۇشىن 7 جىلدان 10 جىلعا دەيىن باس بوستاندىعىنان ايىرۋدى كوزدەيدى.
ەسىرتكى وندىرىسىندە پايدالانىلاتىن زاتتاردىڭ اينالىمىمەن بايلانىستى بۇرىننان بار قىلمىستار ءۇشىن دە جازا كۇشەيتىلدى.
