زنامەنكا اۋىلىنداعى «ورگانيكو» جاۋاپكەرشىلىگى شەكتەۋلى سەرىكتەستىگى بيىلعى قىستا ەكىنشى رەت ءدان ەگىپ جاتىر. الدىڭعى سەپكەندەرىنىڭ ءونىمى كوز قۋانتىپ سامساپ تۇر. سەرىكتەستىك ەسىل اۋدانىنىڭ عانا ەمەس, كوكشەتاۋ مەن قوستانايداعى ساۋدا نۇكتەلەرىنە ءتاپ-ءتاۋىر باسەكەلەستىك تۋعىزۋدا.
– وتكەن جىلى اۋدان ورتالىعىنداعى ساۋدا سورەلەرىن ەكولوگيالىق تازا ونىمىمىزبەن جاۋلاپ الدىق, – دەيدى جىلىجاي شارۋاشىلىعىنىڭ جەتەكشىسى ۆيتالي كورەنكوۆ, – كەيىن الىستاعى تۇتىنۋشىلار دا قۇلاقتانىپ, وزدەرى ىزدەپ كەلە باستادى. ماسەلەن, قوستاناي قالاسىنىڭ تۇتىنۋشىلارى اپتاسىنا ءبىر جارىم تونناعا دەيىن الادى. ءدال وسىنداي كولەمدە اۋدان ورتالىعىندا ساتىلادى. كوكشەتاۋلىقتارعا 650-700 كيلو توڭىرەگىندە ءوتىپ تۇر.
جىلىجاي شارۋاشىلىق جەتەكشىسىنىڭ ايتۋىنا قاراعاندا, ەڭ باستىسى ساپا ەكەن. ءونىمىڭ ساپالى بولسا, باسەكەلەستىكتە ءباسىڭ جوعارى بولماق. سودان سوڭ باعانى دا ەسكەرمەي بولمايدى. سەرىكتەستىك ءبىر ماۋسىمدا 30 تونناعا جۋىق ءونىم وندىرگەن. ەندى بىرەر كۇننەن كەيىن جاڭا ءونىمدى جيناۋ باستالادى. سول كەزدە كىرىس تە كوبەيىپ قالماق.
جىلىجاي – جەرگىلىكتى «تىنەي-اگرو» جاۋاپكەرشىلىگى شەكتەۋلى سەرىكتەستىگىنىڭ قۇرامداس بولىگى. ينۆەستورلار تاراپىنان ەكونوميكالىق تيىمدىلىگى بار ەكەنىنە الدەقاشان كوز جەتكەن. ولاي بولماعاندا شە؟ جەرگىلىكتى جەردە ورگانيكالىق تىڭايتقىش يەن تەگىن, سۋ دا وزدەرىنىكى. جىلۋعا دا ونشالىقتى قينالىپ وتىرعان جوق. كومىردەن ءىستى باستاعاندا-اق باس تارتقان. ارنايى جابدىقتالعان پەشتە سەرىكتەستىكتىڭ ەگىن القاپتارىنان دەستەلەنىپ جينالعان ساباندى جاعادى. وسىنىڭ بارلىعى وزىندىك قۇنىنىڭ ارزانداۋىنا ءتاپ-ءتاۋىر اسەر ەتەدى. ونى ايتاسىز, قالعان كۇل دە تىڭايتقىش رەتىندە كادەگە جاراپ جاتىر. جاڭالىققا جانى قۇمار جاندار ەڭبەك دەسە جانىپ تۇرادى. ماسەلەن, جىلىجايدىڭ العاشقى كورپۋسى سالىنىپ بىتىسىمەن وندا قياردىڭ قۇلاعى قىلتيا باستادى.
جەرگىلىكتى جەردە قاسقالداقتىڭ قانىنداي بولىپ ەسەپتەلەتىن كوكونىس ءوسىرۋ قولعا الىنعالى ونداعان ادام جۇمىسپەن قامتىلىپ, ۋاقتىلى جالاقى الىپ وتىر. قاي جاعىنان الىپ قاراساڭىز دا ءتيىمدى ەكەنى كوزگە ۇرىپ تۇر. كورشىسىنىڭ قارەكەتىن كورىپ ءبىزدىڭ اعايىن دا بەل بۋسا دەيسىڭ وسىندايدا.
اقمولا وبلىسى
