رۋحانيات • 15 قاڭتار، 2020

ءىلياستانۋ ءىلىمى ىلگەرىلەي بەرەدى

183 رەت كورسەتىلدى

الماتىداعى ۇلتتىق كىتاپحانادا جىر قۇلاگەرى، قوعام قايراتكەرى ءىلياس جانسۇگىروۆتىڭ 125 جىلدىق مەرەيتويى اقپارات قۇرالدارى وكىلدەرى اراسىندا ۇيىمداستىرىلعان بايگە قورتىندىسىن جاريالاۋمەن تۇيىندەلدى.

الماتى قالاسى جانە الماتى وبلىسى اكىمدىكتەرى، زيالى قاۋىم وكىلدەرى، اقىن ۇرپاقتارى مەن تىلشىلەر قاۋىمى قاتىسقان جيىندى اشقان بەلگىلى تەلەجۋرناليست نۇرتىلەۋ يمانعالي ۇلى باسقوسۋدىڭ ءمان-مازمۇنىن تۇسىندىرە كەلە، مەرەيتوي اياسىندا جىل بويى تولاسسىز اتقارىلعان شارالاردىڭ ماڭىزىنا توقتالىپ، باعا بەردى. تاعدىردىڭ جازۋىمەن ءبىر جىلى دۇنيەگە كەلىپ، باقيعا دا ءبىر مەزەتتە اتتانىپ كەتە بارعان ءۇش ارىستى حالىق ءبىرتۇتاس ۇعىمعا اينالدىرىپ، مەرەيتويىن دا ءبولىپ-جارماي اۋىل، اۋدان، وبلىس، رەسپۋبليكا دەڭگەيىندە بىرگە اتاپ ءوتتى. شىعارمالارىنا جان-جاقتى تالداۋ جاساپ، ۇزدىكسىز ناسيحات جاسادى. ءۇش بايتەرەكتىڭ ءبىرى ءى.جانسۇگىروۆ مەرەيتويىن ۇيىمداستىرۋ جونىندەگى كوميسسياسىنىڭ مۇشەسى رەتىندە بارلىق شارۋانىڭ باسى-قاسىنان تابىلعان ن.يمانعالي ۇلىنىڭ ايتۋىنشا، اقىننىڭ تويى قازاقستاننان تىس اۋماقتاردا دا اتالىپ ءوتىپ، حالىقارالىق سيپات تاپتى. تۇركيا، رەسەي جۇرتى اقىن ءومىربايانىنا قانىعىپ، شىعارمالارىمەن تانىستى. مۇزبالاق اقىننىڭ «قۇلاگەرى» نەمىس تىلىنە اۋدارىلدى، ال ۇلتتىق اۋدارما بيۋروسىنىڭ جەتەكشىلىگىمەن تارجىمالانعان جىرلارى اعىلشىن تىلىندە سويلەدى.

ءى.جانسۇگىروۆتىڭ 125 جىلدىعىنا وراي اقىننىڭ شىعارماشىلىعى مەن ءومىربايانىن زەرتتەۋگە ارنالعان جۋرناليستەر مەن ادەبيەتشىلەر اراسىندا جاريالانعان بايقاۋدىڭ جەڭىمپازدارىن انىقتاۋ وڭايعا سوقپاعان. سەبەبى ءىلياس اتىن ءتىل، ءسوز ونەرى ارقىلى ۇلىقتاۋعا ارنالعان بايگەگە قاتىسقان ادەبيەتشىلەر مەن جۋرناليستەردىڭ قاراسى قالىڭ بولعان. ۇزىن سانى 132 ماتەريال كەلىپ تۇسكەن. اقىن ءومىربايانى مەن شىعارماشىلىعىن زەرتتەۋگە ارنالعان بايقاۋدىڭ ەرەجەسى بىرنەشە اي بۇرىن جاريالانعان بولاتىن. ماراپاتتاۋعا ارنالعان بايگەنىڭ قورتىندىسىن قازاقستاننىڭ ەڭبەك سىڭىرگەن قايراتكەرى، بەلگىلى ساحنا ساڭلاعى بولات ءابدىلمانوۆ جاريالاپ، جەتى جەڭىمپازدىڭ ەسىمىن اتادى. 3-ورىن ۇشەۋ: ء«مالىم جانە بەيمالىم ءى.جانسۇگىروۆ» اتتى تانىمدىق ماقالاسى ءۇشىن ءىلياستانۋشى عالىم، فيلولوگيا عىلىمدارىنىڭ كانديداتى شارا قياحمەتوۆا، «قۇلاگەر» پوەماسىنىڭ اعىلشىن تىلىندەگى اۋدارماسى حاقىندا» اتتى ماقالاسى ءۇشىن دۇيسەنالى الىماقىن، وقىرمان جانىن تولعانتار ەستەلىكتەر مەن سۇحباتتار جيىنتىعى ءۇشىن ءماريام ءابساتتار يەلەندى. 2-ورىن يەگەرلەرى ەكەۋ: شىعارماشىلىق بايقاۋعا «قىزىق ءىلياس – قىرۋار قازىنا» اتتى كولەمدى ماقالاسىن قوسقان جەمىسبەك تولىمبەكوۆ جانە ءىلياس تۋرالى تانىمدىق حابارلار جاساپ، كوپشىلىككە اقىن كەلبەتىن كوزايىم ەتكەن تەلەجۋرناليست مۇرات جۇماباي 2-ورىن يەسى اتاندى. قازىلار القاسى بايگەنىڭ 1-ورنىنا لايىق دەپ تاپقان ماقالا «مۇزبالاق اقىننىڭ مۇزقالاسى» دەپ اتالادى، اۆتورى – بەلگىلى جۋرناليست زاڭعار كارىمحانعا جۇلدەنى مادەنيەتتانۋشى-جازۋشى مۇرات اۋەزوۆ تابىستادى. ال ۇلتتىڭ العاشقى جارعىسىن جازعان زاڭگەر بارلىبەك سىرتانوۆتىڭ ءومىربايانى مەن سوڭىنا قالدىرعان مۇراسىن زەرتتەپ جۇرگەن زەردەلى جاس، ءىلياستىڭ ىزىمەن ءجۇرىپ وتىرىپ، ماسكەۋ مەن سانكت پەتەربۋرگ ارحيۆتەرىن اقتارىپ، بەيمالىم بولىپ كەلگەن 18 كىتابىن ەلگە اكەلگەن  جاس الاشتانۋشى عالىم ەلدوس توقتارباي باس جۇلدەنىڭ يەسى اتاندى. ءىلياستىڭ ۇلى سايات جانسۇگىروۆ تاپسىرعان جۇلدەنىڭ يەسىن لايىقتى تاپقانىنا زالداعى ۇلكەن-كىشى تەگىس قۋانىش ءبىلدىردى.

جيىندا بەلگىلى اقىن عالىم جايلىباي، امانحان ءالىم، م.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى كەنجەحان ماتىجانوۆ، فيلولوگيا عىلىمدارىنىڭ دوكتورى كاكەن قامزين، پروفەسسور ت.كاكىشەۆتىڭ جارى كۇلاش احمەتوۆا اقيىق اقىن تۋرالى قىزىقتى ەستەلىكتەر ايتتى. ك.ماتىجانوۆ ابايدىڭ 175 جىلدىعى مەرەيتويى ۇستىندە اباي مەن ءىلياس شىعارمالارىنىڭ وزەگىندەگى ۇقساستىقتى زەرتتەۋدى ۇسىنسا، ا.ءالىم ءىلياس پەن الاش تاقىرىبىن قاۋزاي ءتۇسۋ جايىنا توقتالدى.  «قۇلاگەر» پوەماسىن جاتقا ايتىپ، ەرەكشە ماقاممەن دومبىراسىمەن جىرلاپ جۇرگەن ناعاشىباي الپىسوۆ قوستاناي وبلىسىنان ارنايى كەلىپ، الماتىلىق قاۋىمنىڭ الدىندا قوڭىر داۋىسىمەن داستاننان ءۇزىندى شىرقاپ بەردى. ۇلتتىڭ رۋحاني قۇندىلىقتارىمەن قابىسقان اقىن جىرلارىن كەلەشەكپەن ساباقتاستىرۋدى ماقسات تۇتقان بايگەگە ەل ازاماتتارىنىڭ ءبىرى قارجىلاي كومەك كورسەتىپ، دانەكەر بولسا، ادەبيەت كوشىندەگى قايراتكەرلەر ءىلياس مۇرالارىنا جاڭاشا قاراۋدى ۇسىندى. مەرەيتوي مارەگە جەتكەنىمەن، ىلياستانۋداعى ىزدەنىستەر ىلگەرىلەي بەرمەك. جاستاردىڭ مەرەيىن وسىرگەن جيىنعا قاتىسقان كوپشىلىك ءىليستانۋدىڭ جاڭا كەزەڭى باستالعانىنا سەنىم ءبىلدىرىپ، تارقاسىپ جاتتى.

 

الماتى

سوڭعى جاڭالىقتار

قازاقستاندا دوللار قىمباتتادى

ەكونوميكا • بۇگىن، 11:37

UFC رەيتينگىندە كوش باستادى

سپورت • بۇگىن، 08:32

ۇقساس جاڭالىقتار