«زەينەتكە شىعۋدىڭ قۋانىشىمەن قاتار قۇجات راسىمدەۋ ماشاقاتى قاتار جۇرەتىنىن ەستىپ-بىلەتىنمىن. بىراق قازىر تسيفرلى جاڭاشىلدىقتىڭ زامانى عوي. زەينەتكەرلىككە شىعۋ قىزمەتىنىڭ ءبىر عانا SMS ارقىلى شەشىلگەنى قۋانىشىمدى ەسەلەدى. بۇل جاڭالىقتى تالاي جىلعى ەڭبەگىمىزگە دەگەن قۇرمەت دەپ قابىلدايمىن. ەندى بۇدان بىلاي زەينەتاقى تولەمدەرىن تاعايىنداۋ قىزمەتىن الۋ ءۇشىن حالىققا قىزمەت كورسەتۋ ورتالىعىنا بارۋدىڭ ەش قاجەتى جوق», دەيدى «ازاماتتارعا ارنالعان ۇكىمەت» مەملەكەتتىك كورپوراتسياسى» كە اق قىزىلوردا وبلىسى بويىنشا فيليالى بايقوڭىر قالالىق الەۋمەتتىك قامسىزداندىرۋ ءبولىمىنىڭ باسشىسى قالامقاس ەراليەۆا.
ايتا كەتەيىك, «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ زەينەتكەرلىكتى پرواكتيۆتى تاسىلمەن راسىمدەۋ بويىنشا قاناتقاقتى جوبانى ىسكە قوسقان بولاتىن. اتالعان ءادىس ازىرگە مەملەكەتتىك كورپوراتسيانىڭ قىزمەتكەرلەرى ءۇشىن جۇزەگە اسىرىلۋدا. بۇگىنگە دەيىن 30-دان اسا قىزمەتكەر زەينەتكەرلىكتى پرواكتيۆتى تۇردە راسىمدەپ ۇلگەردى.
جوبا بويىنشا زەينەت جاسىنا تولعانعا دەيىن 10 كۇن بۇرىن بولاشاق زەينەتكەرگە قىزمەتتى پرواكتيۆتى تۇردە راسىمدەۋگە ۇسىنىس بىلدىرەتىن SMS حابارلاما جولدانادى. كەلىسىم بەرىلگەن جاعدايدا, كادر بولىمىنە الدىن الا تاپسىرىلعان قۇجاتتار ەلەكتروندى تۇردە جاۋاپتى مەملەكەتتىك ورگاننىڭ ماقۇلداۋىنا جىبەرىلەدى.
سونىمەن قاتار, زەينەتكەر جۇمىس بەرۋشىسىنىڭ كادر بولىمىنە الدىن الا ەڭبەك ءوتىلى, زەينەتكەرلىك جۇيەگە قاتىسۋى سياقتى مالىمەتتەردى ۇسىنادى, بۇل اقپارات, ءوز كەزەگىندە, ەڭبەك كەلىسىمدەرىن ەسەپكە الۋ بىرىڭعاي جۇيەسىنە ەنگىزىلەدى.
