ناتيجەسىندە, ارناۋلى وقۋ ورىندارىندا ساباقتى ۇزدىك وقيتىن ستۋدەنتتەردىڭ شاكىرتاقىسى 19 272 تەڭگەدەن 24 090 تەڭگەگە دەيىن وسسە, باسقا ساناتتاعى بىلىمگەرلەردىڭ دە 16 759 تەڭگە ستيپەندياسى 20 948 تەڭگەگە دەيىن جوعارىلادى. سونداي-اق جوعارى ءبىلىمدى باكالاۆريات جانە ماگيستراتۋرا جۇيەسى بويىنشا الاتىن ستۋدەنتتەرگە تولەنەتىن ستيپەنديا مولشەرى دە ارتادى. بۇعان دەيىن باكالاۆرياتتاعى ستۋدەنت 20 949 تەڭگە شاكىرتاقى السا, ەندى بۇل 26 186 تەڭگەگە دەيىن وسەدى. ال ماگيستر-بىلىمگەرگە 53 530 تەڭگە تولەنسە, ول كوبەيە كەلە 66 913 تەڭگەنى قۇراماق. مۇنان بولەك, دوكتورانتۋرادا ءبىلىمىن شىڭدايتىن بولاشاق عالىمدار ءۇشىن دە قۋانىشتى جاڭالىق بار. ماسەلەن, جاس ىزدەنىمپاز بۇرىن 81 998 تەڭگە شاكىرتاقى السا, ەندى 102 498 تەڭگەگە دەيىن ۇلعايادى.
بۇل جاڭالىقتى تالدىقورعان قالاسىندا ورىن تەپكەن ماڭداي الدى وقۋ ورنى – جەتىسۋ مەملەكەتتىك ۋنيۆەرسيتەتىنىڭ ستۋدەنت جاستارى قۋانىشپەن قابىلدادى.
– مەن 4 جىل باكالاۆرياتتا, 2 جىل ماگيستراتۋرادا وقىدىم. نەگىزگى تابىسىم ستيپەنديا ەدى. ستۋدەنت بولعان كۇننەن 20950 مىڭ تەڭگە ستيپەنديا الدىم. ال ماگيسترانت بولعاندا 53530 مىڭ تەڭگە الدىم. بۇل قاراجات مەنىڭ كۇندەلىكتى ءومىر سۇرۋىمە, كوممۋنالدىق قىزمەتتەردى تولەۋىمە جەتىپ وتىردى. ەندى 3 جىل دوكتورانتۋرادا وقيمىن. دوكتورانتتاردىڭ ستيپەندياسى – 82 مىڭ. جاڭا جىلدان باستاپ بۇل 102500 تەڭگە بولدى. بۇل دەگەنىڭىز ءبۇتىن ءبىر وتباسىن اسىراۋعا جەتەتىن قاراجات. سوندىقتان ستيپەنديانىڭ 25 پايىزعا وسكەنىنە قاتتى قۋانىپ وتىرمىن. ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىندە مەن سياقتى گرانتتا وقيتىن سەگىز جۇزدەن استام ستۋدەنت بار. ولاردىڭ اراسىندا جاقسى ۇلگەرىمى ءۇشىن جوعارىلاتىلعان ستيپەنديا الاتىندارى قانشاما. ءبىلىم العان جىلدارىمىزدى مەملەكەتىمىز ستيپەنديامەن قولداپ وتىرسا, بىزگە بۇدان ارتىق نە كەرەك؟ ءسوزسىز 9 جىل بويى العان ءبىلىمىمدى ەلىمنىڭ دامۋىنا ارنايمىن. قۋانىشتى حابارمەن ەلىمىزدىڭ بارلىق ستۋدەنتتەرىن قۇتتىقتايمىن جانە جەتىسۋلىق ستۋدەنتتەر اتىنان پرەزيدەنتكە العىس بىلدىرەمىن, – دەيدى 1-كۋرس دوكتورانتى ايىم تىنىسحانوۆا.
جالپى, ءبىلىم ساپاسىن ارتتىرۋ مەن تۇلەكتەردى جۇمىسپەن قامتۋ ماقساتىندا ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتى كەشەندى جۇمىس اتقارىپ كەلەدى. الماتى وبلىسى اگرارلىق ايماق بولعاندىقتان, وڭىرگە قاجەتتى ماماندىقتاردى زەردەلەپ, الداعى 4 جىلدا قانداي ماماندار دايارلاۋ قاجەت, قانداي ءبىلىم باعدارلامالارىنا باسىمدىق بەرۋ كەرەك ەكەنىن انىقتاپ, سول بويىنشا وقۋ باعدارلاماسى جاسالادى ەكەن. سونىمەن قاتار جىل بويى وبلىستاعى بارلىق مەكەمەلەرمەن تىعىز بايلانىس جاساپ, بوس ورىندار انىقتالادى. بۇل بويىنشا ۋنيۆەرسيتەت تۇلەكتەرگە ماعلۇمات بەرىپ, مەكەمە باسشىلارىمەن كەزدەسۋ ۇيىمداستىرادى.
– ءوز بىلىمگەرلەرىن تۇراقتى جۇمىسپەن قامتۋ ماقساتىندا جەتىسۋ ۋنيۆەرسيتەتى جاڭا باستامانى قولعا الدى. بۇل باستاما بويىنشا, ەگەر ستۋدەنت وندىرىستىك تاجىريبەدەن وتۋگە بارعان مەكەمەدە ءوزىنىڭ ءبىلىمى مەن قابىلەتىن دالەلدەپ, جۇمىسقا ورنالاسۋعا مۇمكىندىك تۋسا, بىلىمگەرگە سوڭعى كۋرستى قاشىقتان وقۋعا مۇمكىندىك بەرەمىز. بۇل ءادىس ءوز كەزەگىندە, تۇلەكتى جۇمىسپەن قامتىپ قانا قويماي, ءوز كاسىبى بويىنشا تاجىريبە جيناۋىنا جول اشادى. سونىمەن قاتار ۋنيۆەرسيتەت «بوس ورىندار جارمەڭكەسىن» وتكىزۋ, كاسىپورىننىڭ سۇرانىسى بويىنشا مامان دايارلاۋ, ۆاكانتتىق ورىندار بازاسىن قۇرۋ, «ديپلوممەن – اۋىلعا!» باعدارلاماسىنا قاتىسۋ ارقىلى تۇلەكتەردى جۇمىسپەن قامتىپ كەلەدى. ماسەلەن, الدىڭعى جىلى ۋنيۆەرسيتەتتى بىتىرگەن 781 تۇلەكتىڭ 78 پايىزى جۇمىسقا ورنالاسسا, بىلتىرعى كورسەتكىش ودان دا جوعارى بولىپ وتىر, – دەيدى ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ رەكتورى قۋات بايمىرزاەۆ.
الماتى وبلىسى
