تاراز قالاسىنداعى «بالاساعۇن» ورتالىق كونتسەرت زالىندا جامبىل وبلىسىنىڭ اكىمى اسقار مىرزاحمەتوۆتىڭ قاتىسۋىمەن تاۋەلسىزدىك كۇنىنە وراي سالناتاتتى جيىن ءوتتى. اسقار مىرزاحمەتوۆ سالتاناتتى شارادا بايانداما جاساپ, تاۋەلسىزدىك تاعىلىمىنا توقتالدى. سونىمەن قاتار, كوپشىلىككە باردىڭ باعاسىن باعالاي ءبىلۋدىڭ ماڭىزدىلىعىن جەتكىزىپ, وسى جىلدار ىشىندە ايماقتا اتقارىلعان اۋقىمدى جۇمىستار بارىسىن دا اڭگىمەلەدى.
بۇدان كەيىن قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ جارلىعىمەن ەلدىڭ الەۋمەتتىك-ەكونوميكالىق جانە مادەني دامۋىنا, حالىقتار اراسىنداعى دوستىق پەن ىنتىماقتاستىقتى نىعايتۋعا قوسقان ەلەۋلى ۇلەسى ءۇشىن ناگرادتالعان بىرقاتار ازاماتتارعا ماراپاتتارى تابىستالدى. پرەزيدەنتتىڭ جارلىعىمەن جازۋشى, رەسپۋبليكالىق «جامبىل» جۋرنالىنىڭ باس رەداكتورى نەسىپبەك ءداۋتاي ۇلى, «قازفوسفات» جاۋاپكەرشىلىگى شەكتەۋلى سەرىكتەستىگى جامبىل فيليالى باس ينجەنەرىنىڭ ورىنباسارى الەكساندر مالىش, اقىن, ەڭبەك ارداگەرى شىرىن ماماسەرىكوۆا, وبلىس اكىمى اپپاراتىنىڭ باسشىسى رۇستەم داۋلەت, «تارازەنەرگوورتالىق» اكتسيونەرلىك قوعامىنىڭ باسقارما توراعاسى باقبەرگەن ماۋلەنوۆ, مويىنقۇم اۋدانىنىڭ اكىمى مادەن مۇساەۆ, «مەيىرىم» مەديتسينالىق ورتالىعىنىڭ ديرەكتورى گۇلدارا نۇرىموۆا, وبلىستىق ەنەرگەتيكا, تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى نۇرلان الدامجاروۆ, وبلىستىق مادەنيەت, ارحيۆتەر جانە قۇجاتتاما باسقارماسى باسشىسىنىڭ ورىنباسارى سارا ماديەۆا «قۇرمەت» وردەنىمەن ماراپاتتالدى. ال, «قازفوسفات» جاۋاپكەرشىلىگى شەكتەۋلى سەرىكتەستىگىنىڭ «مينەرالدى تىڭايتقىشتار» زاۋىتىنىڭ №01 تسەحىنىڭ سلەسار-جوندەۋشىسى جەكسەن اكىجانوۆ پەن «جامبىل ەلەكتر جۇيەسى» جاۋاپكەرشىلىگى شەكتەۋلى سەرىكتەستىگى فيليالىنىڭ كراسنوگور تاراتۋ ەلەكتر جۇيەسىنىڭ ەلەكتروسلەسارى ەدۋارد شتارك III-دارەجەلى «ەڭبەك داڭقى» وردەنىمەن ماراپاتتالدى. بۇل ناگرادانى نۇر-سۇلتان قالاسىندا مەملەكەت باسشىسىنىڭ ءوز قولىنان العاندار اراسىندا تاراز قالاسىنىڭ تۇرعىنى, «قازاقستان تەمىر جولى-جۇك تاسىمالداۋ» اكتسيونەرلىك قوعامىنىڭ «جامبىل جۇك تاسىمالداۋ بولىمشەسى» جامبىل پايدالانۋ لوكوموتيۆ دەپوسىنىڭ ۆاگون قاراۋشى-جوندەۋشىسى نيكولاي حومۋتەنكونىڭ دا بار ەكەنىن ايتىپ ءوتۋ كەرەك. سونداي-اق, تاراز قالاسىنىڭ تۇرعىنى, «اينۇرى» تاتار-باشقۇرت مادەني ورتالىعى» قوعامدىق بىرلەستىگىنىڭ توراعاسى امير حاليكوۆ ءىى دارەجەلى «دوستىق» وردەنىمەن, كەنەن ازىرباەۆ اتىنداعى جامبىل وبلىستىق فيلارمونياسىنىڭ ءانشىسى باقىت شاعىرباەۆ «قازاقستاننىڭ ەڭبەك سىڭىرگەن قايراتكەرى» اتاعىمەن نۇر-سۇلتان قالاسىندا ماراپاتتالعان.
جيىندا وزگە دە بىرقاتار ازاماتتارعا «ەرەن ەڭبەگى ءۇشىن», «شاپاعات» مەدالدارى, قازاقستان رەسپۋبليكاسىنىڭ «قۇرمەت» گراموتالارى, قازاقستان رەسپۋبليكاسى پرەزيدەنتىنىڭ العىس حاتى جانە «بارىس» توسبەلگىسى تابىستالدى. شارا سوڭى جەرگىلىكتى ونەرپازداردىڭ كونتسەرتتىك باعدارلاماسىمەن جالعاستى.
جامبىل وبلىسى
