بيىلعى جىلدىڭ ماۋسىم ايىندا سەمەيدەگى اباي مۋزەيىنىڭ قىزمەتكەرلەرى تاتارستاننىڭ استاناسى قازان قالاسىنداعى قازان فەدەرالدىق ۋنيۆەرسيتەتىنە قاراستى لوباچەۆسكي اتىنداعى كىتاپحانادان 1885 جىلى بۇرىنعى سەمەي وبلىسى شار وڭىرىندە اباي قۇنانباي ۇلىنىڭ باسشىلىعىمەن جازىلعان «قارامولا ەرەجەسىنىڭ» ارنايى جيناق رەتىندە جارىق كورگەن تۇپنۇسقاسىن تاپقاندىقتارىن جانە كوشىرمەسىن مۋزەي قورىنا اكەلگەندىكتەرىن سۇيىنشىلەي حابارلاعان بولاتىن.
جاقىندا وسكەمەندەگى سارسەن امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىنىڭ رەكتورى مۇحتار تولەگەن قۇندى قۇجاتقا قاتىستى تاعى دا ءبىر جاعىمدى جاڭالىقتى جەتكىزدى.
«جۋىقتا شىعىس قازاقستاننان ارنايى دەلەگاتسيا تاتارستانعا بارىپ قايتتىق. قازان قالاسىنداعى قازان فەدەرالدىق ۋنيۆەرسيتەتىندە وتكەن كەزدەسۋ بارىسىندا قازاقتىڭ ۇلى اقىنى اباي قۇنانباي ۇلىنىڭ 1885 جىلى جازىلعان «قارامولا ەرەجەسىنىڭ» تۇپنۇسقاسىن ۋاقىتشا ەلگە اكەلۋ جونىندە كەلىسىمگە كەلدىك. جوعارى دەڭگەيدەگى كەزدەسۋگە تاتارستاننىڭ قازاقستانداعى وكىلەتتى وكىلى د.ۆالەەۆ, قفۋ پرورەكتورى ل.لاتىپوۆ, قر جوعارعى سوتىنىڭ سۋدياسى ب.جۇماعۇلوۆ, وبلىستىق سوتتىڭ توراعاسى ن.قايىربەكوۆ, وبلىستىق سوتتىڭ سۋدياسى ە.جۇماقسانوۆ قاتىستى. اباي اتامىزدىڭ 175 جىلدىق مەرەيتويى قارساڭىندا اقىننىڭ قازان قالاسىنداعى باسپاحانادا باسىلىپ شىققان, وسىنداعى ن.لوباچەۆسكي اتىنداعى عىلىمي كىتاپحانادا ساقتاۋلى تۇرعان ەرەجەلەر جيناعىنىڭ تۇپنۇسقاسىن ەلگە اكەلسەك نۇر ۇستىنە نۇر بولارى انىق.
ءبىر عاجابى, بۇل ەڭبەك 74 باپتان تۇرادى, اباي اتامىز مۇنى 3 كۇندە جازىپ شىققان دەگەن دەرەكتەر بار. ءبىز قۇندى قۇجاتتى تاتارستانداعى ارىپتەستەرىمىزدەن ءبىر-ەكى ايعا سۇراپ وتىرمىز. الداعى ۋاقىتتا «قارامولا ەرەجەسىن» اۋدارىپ, كيريلل قارپىنە ءتۇسىرىپ, كىتاپ قىلىپ شىعارماق ويىمىز بار» دەيدى ۋنيۆەرسيتەت رەكتورى.
وسكەمەن
