پرەمەر-ءمينيستردىڭ ءبىرىنشى ورىنباسارى مەن وبلىس اكىمى باسپانا يەلەرىن قۋانىشتارىمەن قۇتتىقتاپ, تۇڭعىش پرەزيدەنت – ەلباسى نۇرسۇلتان نازارباەۆتىڭ تىكەلەي تاپسىرماسىمەن ەلىمىزدە الەۋمەتتىك سالاعا زور كوڭىل ءبولىنىپ جاتقانىن ەرەكشە اتاپ ءوتتى. ەكەۋى قازاقستان رەسپۋبليكاسىنىڭ تاۋەلسىزدىك كۇنىنە ارنالعان سالتاناتتى جيىنعا قاتىستى.
بيىل شىعىس قازاقستان وبلىسىندا 8 مىڭ پاتەرلىك 122 كوپقاباتتى تۇرعىن ءۇي سالۋ جوسپارلانعان. 25 ءۇي, ياعني 1493 پاتەر قولدانىسقا بەرىلدى. جالپى, جىل قورىتىندىسى بويىنشا «تۇرعىنۇيقۇرىلىسجيناقبانكى» سالىمشىلارى مەن ءۇي كەزەگىندە تۇرعان 2665 ادام قونىس تويىن تويلايۋعا ءتيىس. «7-20-25», «باقىتتى وتباسى» مەملەكەتتىك تۇرعىن ءۇي باعدارلامالارى ارقىلى كوپ بالالى, تولىق ەمەس جانە ەرەكشە كۇتىمدى تالاپ ەتەتىن بالالاردى تاربيەلەپ وتىرعان وتباسىلارعا جەڭىلدىك شارالارى قاراستىرىلعان. ايتا كەتۋ كەرەك, جىل باسىنان بەرى تۇرعىن ءۇي كەزەگىندە تۇرعان 440 كوپ بالالى جانە الەۋمەتتىك از قامتىلعان وتباسى باسپانالى بولدى.
پرەمەر-ءمينيستردىڭ ءبىرىنشى ورىنباسارى ءاليحان سمايىلوۆ بىرەگەي سپورت كەشەنىنىڭ جۇمىسىمەن تانىستى. ەكى جىل ىشىندە بوي كوتەرگەن بىرەگەي كەشەننىڭ مادەني-سپورتتىق شارالاردى وتكىزۋگە ارنالعان ۇلكەن زالى بەس مىڭ ادامعا ارنالعان. الەمدىك ستاندارتتارعا ساي سپورتتىڭ سان تۇرلەرىنەن جارىستار وتكىزۋ مۇمكىندىگى بار. نىساننىڭ جالپى اۋماعى – 33,8 مىڭ شارشى مەتر. ءىرى كەشەندى جەرگىلىكتى «فيرما ازيا» جشس سالعان.
تاۋەلسىزدىك كۇنىنە ارنالعان سالتاناتتى جيىنعا قاتىسقان ءاليحان سمايىلوۆ:
– شىعىس قازاقستان وبلىسى تاۋەلسىزدىك جىلدارىندا ەلىمىزدىڭ جەتىستىكتەرىنە ايتارلىقتاي ۇلەس قوستى. يندۋستريالىق جانە اگرارلىق ايماق تانتال, مىس, مىرىش جانە كەيبىر اۋىل شارۋاشىلىعى ونىمدەرىن وندىرۋدە جەتەكشى ورىندا. وبلىس سۋبسيديالانعان بيزنەس-جوبالار سانى, مەملەكەت-جەكەمەنشىك سەرىكتەستىك تۋرالى جاسالعان كەلىسىمدەر سانى بويىنشا ەلىمىزدە ءبىرىنشى ورىندا. رەسپۋبليكاداعى العاشقى روبوتتى حيرۋرگيا ورتالىعى, نەيروحيرۋرگيالىق گيبريدتى وپەراتسيالىق زال شىعىس قازاقستاندا اشىلدى. ەكى جىل ىشىندە بارلىق مەكتەپتەر IT-سىنىپتارمەن جابدىقتالدى. ءبىلىم بەرۋ جانە مەديتسينالىق قىزمەت ساپاسى ۇنەمى ءوسىپ كەلەدى. مۇنىڭ ءبارى ازاماتتاردىڭ ءال-اۋقاتىن ارتتىرۋعا كەپىل, – دەدى ول.
تاۋەلسىزدىك تۋى جەلبىرەگەن 28 جىلدىڭ ىشىندە ءوڭىردىڭ جەتكەن جەتىستىكتەرىنە شىعىس قازاقستان وبلىسىنىڭ اكىمى دانيال احمەتوۆ تولىعىراق توقتالىپ ءوتتى.
– ءبىز وسى تاريحي كەزەڭمەن ماقتانامىز! سەبەبى ىرگەمىزدى بۇتىندەپ, ءتىلىمىز بەن مادەنيەتىمىزدى قايتا جانداندىردىق. ەلباسىمىزدىڭ ساليقالى ساياساتىنىڭ ارقاسىندا, دۇرىس تاڭدالعان باعداردى ۇستانا وتىرىپ, جوعارى جەتىستىكتەرگە جەتتىك. بۇگىندە ءوزىمىزدى تاۋەلسىز, قۋاتتى جانە تابىستى قازاقستاننىڭ ازاماتتارى دەپ زور سەنىممەن ايتا الامىز. نۇرسۇلتان نازارباەۆتىڭ ىرگەلى ساياسي فيلوسوفياسى پروگرەسس پەن جاسامپازدىققا باعىتتالعان ەل دامۋىنىڭ ستراتەگيالىق باعىتىن ايقىنداپ بەردى. ءبىزدىڭ بولاشاق ۇرپاق الدىنداعى قاسيەتتى بورىشىمىز – تاۋەلسىزدىگىمىزدىڭ باستى قۇندىلىقتارىن ساقتاۋ جانە نىعايتۋ, – دەدى دانيال احمەتوۆ.
سالتاناتتى شارا بارىسىندا 50 ازاماتقا مەملەكەتتىك ناگرادالار مەن وردەندەر تابىس ەتىلدى. بەس تۇرعىنعا «شىعىس قازاقستاننىڭ قۇرمەتتى ازاماتى» اتاعى بەرىلدى. ماراپاتتالعانداردىڭ ىشىندە عالىم اراپ ەسپەنبەتوۆ «پاراسات» وردەنىن, «اباي قۇنانباەۆ» قورىنىڭ نەگىزىن قالاۋشى بالتابەك ەرسالىموۆ «قۇرمەت» وردەنىن يەلەندى. شارا سوڭى قازاقستاندىق جۇلدىزدار قاتىسقان مەرەكەلىك كونتسەرتكە ۇلاستى.
