«13 جەلتوقسان كۇنى تۇركىستان قالاسىنداعى ورتا مەكتەپ مۇعالىمىن پوليتسيا بولىمىنە جەتكىزۋ فاكتىسى بويىنشا ىشكى ىستەر ءمينيسترى ەرلان تۇرعىمباەۆتىڭ بۇيرىعىمەن قالالىق پوليتسيا باسقارماسى باسشىلىعىنا قاتىستى قىزمەتتىك تەكسەرۋ ءجۇرىپ جاتىر. تەرگەۋ كەزىندە ىشكى ىستەر ورگاندارى قىزمەتكەرلەرىنىڭ مۇعالىمگە قاتىستى ءىس-ارەكەتىنىڭ قانشالىقتى زاڭدىلىعىنا باعا بەرىلەدى. سونداي-اق تۇركىستان قالاسى ىشكى ىستەر باسقارماسى باستىعىنىڭ لاۋازىمىن اسىرا پايدالانۋ فاكتىسىنىڭ بار-جوعى انىقتالادى» دەلىنگەن حابارلامادا.
وبلىستىق پوليتسيا دەپارتامەنتى باسشىسىنىڭ بۇيرىعىمەن تۇركىستان قالالىق پوليتسيا باسقارماسىنىڭ باستىعى دانيار مەيىرحان قىزمەتتىك تەكسەرۋ اياقتالعانعا دەيىن قىزمەتىنەن شەتتەتىلدى.
ەسكە سالا كەتەيىك, تۇركىستاندا ماعجان جۇماباەۆ اتىنداعى №15 ورتا مەكتەپتىڭ مۇعالىمى باقىت كەۋكەنوۆ «اجەتحانا كۇزەتپەگەنى ءۇشىن» جازىقتى بولعان ەدى. 31 جىلدىق ءوتىلى بار ۇستازدى قالالىق پوليتسيا باسقارماسىنىڭ باستىعى, پوليتسيا پودپولكوۆنيگى دانيار مەيىرحان باستاعان ءبىر توپ پوليتسەي ۇستاپ اكەتكەن. مەكتەپ ديرەكتورى ك. ابدىقادىروۆانىڭ جازۋىنشا, مۇعالىم اياق كيىمىنەن سۋ وتكەن سوڭ سونى اۋىستىرۋ ءۇشىن مەكتەپ عيماراتىنا كىرگەن. الايدا پوليتسەيلەر قارسىلىق كورسەتكەنىنە قاراماستان ۇستازدىڭ قولىن قايىرىپ, بولىمشەگە الىپ كەتكەن. كەيىن بۇل جاعدايدى ەستىگەن ءبىلىم جانە عىلىم ءمينيسترى اسحات ايماعامبەتوۆ مۇعالىمگە اراشا ءتۇستى.
بۇگىن مەكتەپ مۇعالىمىن «اجەتحانا كۇزەتپەگەنى ءۇشىن» ۇستاپ اكەتكەن قالالىق پوليتسيا باسقارماسىنىڭ باستىعى دانيار مەيىرحان ۇستازدان كەشىرىم سۇراعان ەدى.
