ايماقتار • 12 جەلتوقسان، 2019

الماتىنىڭ باس قۇجاتىنىڭ سوڭعى نۇسقاسى تالقىلانىپ جاتىر

91 رەتكورسەتىلدى

بۇگىن الىپ شاھار الماتىنى ءومىر سۇرۋگە جايلى ەتۋدى ماقسات ەتكەن باستى قۇجاتتىڭ سوڭعى نۇسقاسى تالقىلانىپ جاتىر.

ونى قالا اكىمى باقىتجان ساعىنتاەۆ تانىستىردى. قالانىڭ 2050 جىلعا دەيىنگى دامۋ ستراتەگياسى قاراشا ايىندا حالىققا ۇسىنىلعان بولاتىن. ء تىپتى ءدۇيىم ەل تاراپىنان ايتىلعان تالاپ-تىلەك ەسكەرىلەتىنى ايتىلعان. سول ارالىقتا 400 شاقتى قالا تۇرعىنى 1000-نان استام ۇسىنىس ايتىپ، ونىڭ 180-گە جۋىعى قۇجاتقا ەنگىزىلگەن. جالپى، جوبا بارلىق سالانى قامتيدى. اتاپ ايتقاندا، قالاداعى توزعان قۇبىرلاردى 48 پايىزعا ازايتۋ، قوقىستى وڭدەۋدى 80 پايىزعا جەتكىزۋ، حالىقتىڭ 60 پايىزىن قوعامدىق كولىكپەن تاسىمالداۋ سەكىلدى ناقتى جوسپارلار بار. ال باستىسى جولدا قاۋىپسىزدىكتى كۇشەيتىپ، قازا تاباتىندار سانىن نولگە ءتۇسىرۋ كوزدەلگەن. الماتى اكىمدىگى قالانى بەينەباقىلاۋ مەن ادامدى تاني الاتىن ينتەللەكتۋالدى جۇيەلەر ورناتىلعان، اقىلدى، قاۋىپسىز، ەكولوگياسى تازا، مادەني جانە كرەاتيۆتى مەگاپوليسكە اينالدىرۋدى كوزدەيدى.

«ستراتەگيا الماتىنىڭ دامۋىن جاڭا قىرىنان كورسەتەدى. ماقساتى – ادامنىڭ ءومىر ءسۇرۋ ساپاسى جوعارى الەمنىڭ ۇزدىك 100 قالالار قاتارىنا ەنۋ. سونىمەن قاتار، بيزنەسپەن اينالىسۋعا ىڭعايلى قالا بولۋ. قۇجات 3 قاعيداعا نەگىزدەلگەن. ول: جاڭا ەكونوميكا، جاڭا كەڭىستىك جانە جاڭا كوممۋنيكاتسيا. تۇرعىنداردىڭ ءومىر ءسۇرۋ ساپاسى قالا ەكونوميكاسىنا تىكەلەي بايلانىستى. سوندىقتان الماتىدا ساۋدا-ساتتىق دامۋ كەرەك. ەكىنشىدەن، قالا ىرگەسى مەن ورتاسىندا تەپە-تەڭدىك ساقتاي وتىرىپ، شەتكى اۋدانداردى دا ورتاسىمەن بىردەي ەتىپ دامىتامىز. بۇل – مەنىڭ جەكە پوزيتسيام. جانە سوڭعىسى، كوممۋننيكاتسيا. تۇرعىندارمەن ءجيى كەزدەسىپ، پروبلەمالارىن تەز ارادا شەشىپ بەرۋ. وسى تۇستا «ەستيتىن مەملەكەت» تۇجىرىمداماسى قولعا الىنادى»، دەدى الماتى قالاسىنىڭ اكىمى باقىتجان ساعىنتاەۆ.

الماتى قالاسى اكىمدىگىنىڭ عيماراتىندا تاڭعى ساعات 9:00 دە باستالعان جيىنعا كەلگەن قاتىسۋشىلار كوپ. كونفەرەنتسيادا بيىل باستى ءۇش تاقىرىپقا باسىمدىق بەرىلمەك. ماماندار الىپ شاھاردا ەكولوگيا، قاۋىپسىزدىك جانە كولىك تيىمدىلىگىن جاقسارتۋ كەرەك دەپ سانايدى. بۇگىن ولار وسى سالالاردى جەتىلدىرۋ  ماقساتىندا ءوز جوبالارىن دا ۇسىنىپ جاتىر. قالا اكىمىنىڭ ورىنباسارى مۇحيت ازىرباەۆ ۇسىنىس-تىلەكتەردىڭ ورىندى ەكەنىن ايتىپ، اتالعان باعىت بويىنشا قانداي جۇمىستار اتقارىلىپ جاتقانىن جىپكە ءتىزدى. 

«قالادا كوتەرمە ساۋدانى قولداۋ كوزدەلىپ وتىر. ياعني، سىرتتان كەلگەن تاۋارلاردى ءبىر جەرگە ساقتاپ، سودان كەيىن مەگاپوليستەگى دۇكەندەر مەن ساۋدا ورتالىقتارىنا تاراتاتىن ورىن اشۋ جوسپاردا بار. ول جەردە تاۋار قايتا وڭدەلمەيدى، تەك ونىڭ وتۋىنە جاعداي جاسايمىز. كولىك ماسەلەسىنە كەلەتىن بولساق، قازىر كەزەك كۇتتىرمەيتىن پروبلەمالاردى شەشىپ جاتىرمىز. ودان كەيىن وبلىسپەن جالعايتىن جولداردى كەڭەيتۋ كوزدەلىپ وتىر. "التىن وردا» بازارى ماڭىنداعى تاس جولدى، تالعارعا قاراي بەتتەيتىن جولداردى كەڭەيتۋ دە ويدا بار. سايكەسىنشە سول جاقتان قاتىنايتىن قوعامدىق كولىكتەردى دە ويلاستىرىپ جاتىرمىز»، دەيدى الماتى قالاسى اكىمىنىڭ ورىنباسارى مۇحيت ازىرباەۆ.

بۇعان دەيىن حابارلاعانداي، كەشە الماتىدا قازاقستان ۋربان فورۋمى باستالعان بولاتىن. وعان الماتىنىڭ تاۋەلسىز ساراپشىلارى، ساۋلەتشىلەرى سپيكەر رەتىندە شاقىرىلعان. فورۋم بارىسىندا ايتىلعان يدەيالار الماتىنىڭ دامۋ ستراتەگياسىن دايىنداۋ كەزىندە ەسكەرىلەدى. 

سوڭعى جاڭالىقتار

الماتىدا زەرتحانالار سانى ارتادى

وڭتۇستىك قازاقستان • كەشە

ۇقساس جاڭالىقتار