جەلتوقسانشىلاردىڭ ءبىرى – ءلاززات اسانوۆا ەرەۋىلدى الاڭنان ورالماعان قايسار قىزداردىڭ ءبىرى. ەگەمەندىك ءۇشىن قۇربان بولعان جاستارىمىزدىڭ باتىل قادامى بۇگىندە جاستار اراسىندا كەڭىنەن ناسيحاتتالىپ ءجۇر. تاۋەلسىزدىك كۇنى قارساڭىندا قالانىڭ بارلىق مەكتەپتەرىندە ءتول مەرەكەگە ارنالعان اشىق ساباقتار وتۋدە. بۇل شارالار, سونىمەن ءبىر مەزگىلدە «رۋحاني جاڭعىرۋ» باعدارلاماسى اياسىندا ءوتىپ جاتىر.
الماتىداعى №152 گيمنازيا وقۋشىلارى بۇگىن تاۋەلسىزدىك ءۇشىن باقيلىق بولعان ءلاززات اسانوۆانىڭ اناسىنا قۇرمەت كورسەتىپ, 1986 جىلدىڭ جەلتوقسانىندا وتان ءۇشىن جان تاپسىرعان بارلىق ازاماتتاردى ەسكە الدى.
الماتىنىڭ چايكوۆسكي اتىنداعى مۋزىكالىق ۋچيليششەسىندە قوبىزشى ماماندىعى بويىنشا ءدارىس العان ءلاززات اسانوۆا نەبارى 16 جاستا ەدى. بىراق ەل باسىنا كۇن تۋعاندا بويجەتكەن كوممۋنيستىك رەجيمنىڭ وتارشىلدىق ساياساتىنا قارسى باتىل شىعىپ, قازاقستاننىڭ ەگەمەندىگى ءۇشىن قۇربان بولعان. تاۋەلسىزدىك مەرەكەسى قارساڭىندا وقۋشىلارمەن كەزدەسۋگە كەلگەن ونىڭ اناسى التىناي سول ءبىر قايعىلى كۇندى كۇرسىنىپ ەسكە الادى.
«1986 جىلدى ەسكە الۋ وتە اۋىر. قازىر قاتتى تولقىپ تۇرمىن. ول كۇندى ايتپاسام دا, حالىق بىلەدى. قازىر حالىقتىڭ كوزى اشىق. ءبارىن ءتۇسىندى. مەن حالقىما, جاستارعا سەنەمىن. ەندى ونداي ناۋبەت قازاق ەلىنە كەلمەسىن. قازاق ەلىنە ءوز ەلىنىڭ, ءوز جەرىنىڭ قىزىعىن كورۋگە اللا ءناسىپ ەتسىن», – دەدى ل. اسانوۆانىڭ اناسى التىناي قاۋمەتقىزى.
2008 جىلدىڭ قاراشاسىندا جاركەنت قالاسىندا «جەلتوقسان» كوتەرىلىسىنىڭ قۇربانى ءلاززات اسانوۆاعا ەسكەرتكىش اشىلعان بولاتىن. تاۋەلسىزدىك جولىندا باقيلىق بولعان ۇل-قىزداردىڭ ەرلىگى بۇگىنگى جانە كەلەر ۇرپاققا قاشان دا امانات بولماق.
«تاۋەلسىزدىك كۇنى جەلتوقسان كوتەرىلىسى قازاق جاستارىنىڭ قايسارلىعىنىڭ, ەرلىگىنىڭ ارقاسىندا كەلگەن. وسى تاۋەلسىزدىك – بولاشاق ۇرپاققا امانات. مەن بۇگىنگى جاستارعا سەنەمىن», - دەدى ل. اسانوۆانىڭ اناسى التىناي قاۋمەتقىزى.
تاۋەلسىزدىك كۇنى – ەڭ قاستەرلى كۇن. بوستاندىق ءۇشىن كۇرەسكەن قايسار قىز ءلاززات اسانوۆانىڭ جاۋىنگەرلىگى بۇگىندە جاستار اراسىندا كەڭىنەن ناسيحاتتالىپ ءجۇر. ەلىمىزدىڭ ءبىلىم وشاقتارىندا ءار جەلتوقسان سايىن ەگەمەندىك ءۇشىن قۇربان بولعان ازاماتتاردى ەسكە الۋ شارالارى تۇراقتى تۇردە ءوتىپ تۇرادى.
«رۋحتى جاستارىمىزدى وتانسۇيگىشتىككە, ەلىن سۇيۋگە تاربيەلەۋ وسى بۇگىنگى كۇنگى ءىس-شارالاردىڭ نەگىزگى ماقساتى بولىپ تابىلادى. وسى رەتتە «جەلتوقسان» قوزعالىسىنىڭ, تاۋەلسىزدىك جولىندا ازاتتىق كۇرەستىڭ باتىرى ءلاززات اسانوۆانىڭ اناسىن شاقىرىلىپ وتىر», – دەدى الماتى قالاسى № 152 مەكتەپ-گيمنازيا ديرەكتورى ريمما ابدىكارىموۆا.
تاۋەلسىزدىك – ەڭ الدىمەن قازاق حالقىنىڭ بوستاندىققا ۇمتىلعان اسقاق ارمانى مەن قايسار رۋحىنىڭ جەمىسى. ەگەمەندىك ءۇشىن جانىن اياماعان ازاماتتار ەل ەسىندە ماڭگى قالماق.
الماتى
