جەمقورلىققا قارسى زاڭناماعا ەنگىزىلگەن تولىقتىرۋلاردى ءتۇسىندىردى

قازاقستان • 08 جەلتوقسان، 2019

جەمقورلىققا قارسى زاڭناماعا ەنگىزىلگەن تولىقتىرۋلاردى ءتۇسىندىردى

سىبايلاس جەمقورلىققا قارسى ىس-قيمىل اگەنتتىگىنىڭ توراعاسى اليك شپەكباەۆ Facebook-تە سىبايلاس جەمقورلىققا قارسى زاڭناماعا ەنگىزىلگەن تولىقتىرۋلاردى ءتۇسىندىردى.

گۇلبارشىن ايتجانبايقىزى

«دوستار، 26 قاراشادا مەملەكەت باسشىسىنىڭ سىبايلاس جەمقورلىققا قارسى زاڭناماعا جاڭا تولىقتىرۋلار پاكەتىنە قول قويعانىن بىلەسىزدەر. ەڭ كوپ تالقىلانعان ماسەلەلەردىڭ ءبىرى – باعىنىشتى قىزمەتكەرى سىبايلاس جەمقورلىق قۇقىق بۇزۋشىلىعىن جاساعان جاعدايدا ساياسي قىزمەتشىنىڭ قىزمەتتەن كەتۋى. وسى رەتتە، كەيبىر ماڭىزدى تۇستاردى تۇسىندىرگىم كەلەدى. ەڭ الدىمەن، ساياسي مەملەكەتتىك قىزمەتشىلەر دەگەن كىم؟ ول – پرەزيدەنتكە تىكەلەي باعىناتىن جانە ەسەپ بەرەتىن مينيسترلەر، ونىڭ ورىنباسارلارى، مەملەكەتتىك ورگانداردىڭ ءبىرىنشى باسشىلارى، ولاردىڭ ورىنباسارلارى، نۇر-سۇلتان، الماتى، شىمكەنت قالالارى مەن وبلىستاردىڭ اكىمدەرى، ولاردىڭ ورىنباسارلارى، اۋدان اكىمدەرى. ەندى تىكەلەي تەتىكتەرگە كوشەيىن. ساياسي باسشىنىڭ ءوز قىزمەتىن دوعارۋعا ءوتىنىش بەرۋىنىڭ باستى شارتى – وعان تىكەلەي باعىنىشتى قىزمەتكەرگە قاتىستى زاڭدى كۇشىنە ەنگەن سوتتىڭ ايىپتاۋ ۇكىمىنىڭ بولۋى نەمەسە اقتالمايتىن نەگىزدەر بويىنشا قىلمىستىق ءىستى توقتاتۋ تۋرالى شەشىمنىڭ قابىلدانۋى (امنيستيا، شىنايى وكىنۋ، تاراپتاردىڭ تاتۋلاسۋى جانە ت.ب).

باسشىنىڭ جۇمىستان كەتۋگە ءوتىنىش بەرەتىن مەرزىمى – 10 كۇنتىزبەلىك كۇن. ەكىنشى شارت – تىكەلەي باعىنىشتى قىزمەتكەر جاساعان قىلمىستىڭ باسشىنىڭ ساياسي لاۋازىمعا تاعايىندالعان كۇنىنەن باستاپ 3 اي وتكەننەن كەيىن جاسالۋى. دۇرىس ءتۇسىنۋ ءۇشىن «تىكەلەي باعىنىشتى» تەرمينىن تۇسىندىرە كەتەيىن. ورتالىق مەملەكەتتىك ورگاننىڭ باسشىسى ءۇشىن – ول ونىڭ ورىنباسارلارى، جاۋاپتى حاتشى نەمەسە اپپارات باسشىسى، تەرريتوريالىق بولىمشەلەردىڭ باسشىلارى. وبلىستاردىڭ، رەسپۋبليكالىق ماڭىزى بار قالالاردىڭ، استانانىڭ اكىمدەرى ءۇشىن – ولاردىڭ ورىنباسارلارى، اپپارات باسشىسى، اۋدان نەمەسە وبلىستىق ماڭىزى بار قالا اكىمى. ورتالىق مەملەكەتتىك ورگان باسشىسىنىڭ ورىنباسارى ءۇشىن (مىسالى، ۆيتسە-مينيستر) – ولار باسشىلىق ەتەتىن ۆەدومستۆونىڭ نەمەسە دەربەس قۇرىلىمدىق بولىمشەلەردىڭ (دەپارتامەنت، باسقارما) باسشىلارى. وبلىستاردىڭ، رەسپۋبليكالىق ماڭىزى بار قالالاردىڭ، استانا اكىمدەرىنىڭ ورىنباسارلارى ءۇشىن – جەرگىلىكتى بيۋدجەتتەن قارجىلاندىرىلاتىن ولار باسشىلىق جاسايتىن اتقارۋشى ورگانداردىڭ باسشىلارى. اۋدان اكىمى ءۇشىن – ورىنباسارلارى، اپپارات باسشىسى، تىكەلەي باسشىلىق جاسايتىن اۋداندىق اتقارۋشى ورگانداردىڭ باسشىلارى، اۋىل، كەنت، اۋىلدىق وكرۋگتاردىڭ اكىمدەرى.

«قىزمەتتەن كەتۋ» تۇسىنىگى تەك ساياسي قىزمەتشىلەرگە قاتىستى قولدانىلادى. جۇمىستان كەتۋدى قابىلداۋ نەمەسە قابىلداماۋ – ساياسي مەملەكەتتىك قىزمەتشىنى تاعايىنداعان تۇلعانىڭ قۇزىرەتى ەكەنىن اتاپ وتكىم كەلەدى (ورتالىق مەملەكەتتىك ورگانداردىڭ باسشىلارى، وبلىستاردىڭ، رەسپۋبليكالىق ماڭىزى بار قالالار مەن استانانىڭ اكىمدەرى ءۇشىن – پرەزيدەنت، ۆيتسە-مينيسترلەر ءۇشىن – پرەمەر-مينيستر، وبلىستاردىڭ، رەسپۋبليكالىق ماڭىزى بار قالالار مەن استانا اكىمدەرىنىڭ ورىنباسارلارى ءۇشىن – وبلىستاردىڭ، رەسپۋبليكالىق ماڭىزى بار قالالار مەن استانانىڭ اكىمدەرى). مەملەكەتتىك اكىمشىلىك قىزمەتشىلەر بولىپ تابىلاتىن باسشىلار – جاۋاپتى حاتشىلار، اپپارات باسشىلارى، ورتالىق مەملەكەتتىك ورگان كوميتەتتەرىنىڭ توراعالارى جانە ونىڭ ورىنباسارلارى، دەپارتامەنتتەر مەن دەربەس باسقارما باسشىلارى وسىعان ۇقساس جاعدايلاردا جۇمىستان بوساتۋعا دەيىن تارتىپتىك جاۋاپكەرشىلىككە تارتىلاتىن بولادى. سونداي-اق تارتىپتىك سانكتسيالار مەملەكەتتىك ورگانداردىڭ، مەملەكەتتىك ۇيىمداردىڭ، كۆازيمەملەكەتتىك سۋبەكتىلەر باسشىلارىنىڭ سىبايلاس جەمقورلىقتىڭ الدىن الۋ بويىنشا شارالار قابىلداماعانى ءۇشىن ەنگىزىلەتىن بولادى. مۇنداعى ماسەلە ۇجىمدا سىبايلاس جەمقورلىقتىڭ الدىن الۋدى ءوز مىندەتىندە جۇيەلى تۇردە ەلەمەۋگە قاتىستى بولىپ وتىر. ءبىزدىڭ مىندەتىمىز – باسشىلاردى ءوز ۇجىمدارىندا سىبايلاس جەمقورلىقتىڭ الدىن الۋمەن جانە ەسكەرتۋمەن ءسوز جۇزىندە ەمەس، ءىس جۇزىندە اينالىسۋعا ماجبۇرلەۋ. دوستار، ا.ج. (اعىمداعى جىلدىڭ، رەد) 10 جەلتوقسانىنان باستاپ قولدانىسقا ەنگىزىلەتىن بۇل قوسىمشالار ەلباسى مەن پرەزيدەنتتىڭ قازاقستانداعى سىبايلاس جەمقورلىقتى تۇبەگەيلى جويۋعا باعىتتالعان جۇيەلى جانە كورەگەن ساياساتىنىڭ جەمىسى. ولاردىڭ قۇقىق قولدانۋ تاجىريبەسىندە جاڭاشىلدىعىن ەسكەرە وتىرىپ، الداعى ۋاقىتتا ستاندارتقا سايكەس ەمەس ءتۇرلى جاعدايلار ورىن الۋى ىقتيمال، ءبىز ونى سوت ورگاندارىمەن جانە پروكۋراتۋرامەن بىرلەسىپ ەگجەي-تەگجەيلى زەردەلەيتىن بولامىز» دەلىنگەن اگەنتتىك توراعاسىنىڭ جازباسىندا.

الماتى