ايماقتار • 28 قاراشا، 2019

بارقىتبەل باۋرايىنداعى كۇي كەشى

71 رەتكورسەتىلدى

بۇل تەك دومبىرا سويلەگەن دۋمان، دومبىرا كۇمبىرلەگەن كونتسەرت، قازاقتىڭ بالاسى دومبىراسىن ۇلىق كورگەن مەرەكەلى كۇن بولدى.

جۋىقتا وسكەمەندەگى اعايىندى ابدۋلليندەر اتىنداعى مۋزىكا ۋچيليششەسىنىڭ مۇعالىمى، «بايجىگىت» ۇلت اسپاپتار وركەسترىنىڭ ديريجەرى ءارى كوركەمدىك جەتەكشىسى شالقار رىسحان ۇلىنىڭ باستاۋىمەن دومبىرانىڭ قۇلاعىندا وينايتىن سايدىڭ تاسىنداي جىگىتتەردەن قۇرالعان «جىگەر» دومبىراشىلار ءانسامبلىنىڭ تەگىن كونتسەرتى كۇرشىم، زايسان، اقجار، اقسۋاتتا ءوتىپ، اۋىل حالقىنىڭ قۇلاعىنىڭ قۇرىشىن قاندىردى. ساپار  ماقساتى - بيىلعى جاستار جىلىندا اۋىل جاستارىنىڭ كوڭىلىن سەرپىلتۋ، ۇلتتىق قۇندىلىعىمىز دومبىرانى، كۇيلەردى ناسيحاتتاۋ.

البەتتە، دومبىرا ءبىزدىڭ زاڭدى جازمىشىمىز، لايىق­تى مەرەيىمىز ەكەنىنە ءسوز بار ما؟! وبلىس ورتالىعىندا جۇزدەگەن قازاق جاستارىن دومبىراعا تاربيەلەپ قانا قويماي، قازاقتىڭ مىنەزىن، ەرلىگى مەن ورلىگىن، سابىرى مەن اقىلىن جاس ورەندەرگە دارىتىپ جۇرگەن شالقاردىڭ ۇستاز رەتىندەگى ورەلى ازاماتتىق ءىسى ءسۇيسىندىردى. كونتسەرتتە «جىگەر» انسامبلىنە شىعارماشىلىق تابىس تىلەپ، اۋدان اكىمى س.سادۋاقاسوۆتىڭ اتىنان العىس حات تاپسىرىلدى. 

«بايتاق ەلدىڭ باي مۇراسى» اتتى كونتسەرتتە انسامبل ۇلتىمىزدىڭ قاستەرلى اسپابى دومبىرانىڭ قۇدىرەتىن كورسەتتى. شىڭعىس قاعانداي قاھارلى حاننىڭ وزىنە  قاراتاۋداي قايعىنى، جان جۇرەكتەگى سىردى قوڭىر دومبىرانىڭ سىرلى كۇيىمەن ايتقان، ءتاڭىرىم، دوم­بىراعا ءاۋ باستان-اق قازاقتىڭ ءتىلى بولۋ­دى، قازاقتىڭ ءۇنى بولۋدى ەنشىلەپ سىي­لاعان ەكەن. بۇل دومبىرا كۇيلەرى كەشىندە ءان ايتىلعان جوق، داڭعارا مۋزىكا ەستىلگەن جوق.  

ق.احمەدياروۆتىڭ «قوسباسارىمەن» باستالعان كۇي دۋمانى «قۋانىش»، «اقمەشىت»، «كۇتكەندە»، ە.ۇسەنوۆتىڭ «كەربەز سۇلۋ»، ت.توعجاننىڭ «جەلدىرمەسى» مەن «كوشپەندىلەرى»، ءا.جەلدىباەۆتىڭ «ەركەسىلقىمىمەن» جالعاسىپ، قۇرمانعازىنىڭ «سەرپەرىمەن» اياقتالدى.  كۇنى كەشە مۇحتار اۋەزوۆتىڭ «قازاقتىڭ ۇياتى كۇيىندە عانا قالدى» دەپ كۇڭىرەنۋىن ەسكە الساق، تۇسىنگەن كىسىگە دومبىرا اتا تاريحىمىزدى، ەلدىگىمىزبەن مەن بەرەكە-بىرلىكتى، ۇلتتىق مەرەيىمىزبەن مارتەبەلى مەملەكەتتىگىمىزدى ساقتاۋدى اماناتتاپ كەتكەندەي اسەر قالدىرادى.

شاكەن كوپشىكباەۆا

شىعىس قازاقستان وبلىسى،

تارباعاتاي اۋدانى  

 

سوڭعى جاڭالىقتار

ۇقساس جاڭالىقتار