ماڭعىستاۋ حيرۋرگياسىنىڭ نەگىزىن قالاۋشى دارىگەر 80-گە تولدى

ايماقتار • 19 قاراشا، 2019

ماڭعىستاۋ حيرۋرگياسىنىڭ نەگىزىن قالاۋشى دارىگەر 80-گە تولدى

ماڭعىستاۋداعى حيرۋرگيانىڭ نەگىزىن قالاۋشىلاردىڭ ءبىرى، تانىمال دارىگەر حيرۋرگ احمەتجان قۇسايىنوۆ 80 جاسقا تولدى. دوستارى مەن ارىپتەستەرى «دارىگەر ايبوليت» اتاپ كەتكەن احمەتجان قۇسايىنوۆ ماڭعىستاۋ ءوڭىرى مەن رەسپۋبليكانىڭ دەنساۋلىق ساقتاۋ سالاسىنا قوسقان ۇلەسى وراسان. ءوز تاجىريبەسىندە ول دياگنوستيكانىڭ زاماناۋي ادىستەرىن قولدانا ءبىلدى، دەپ حابارلادى ماڭعىستاۋ وبلىستىق دەنساۋلىق ساقتاۋ باسقارماسىنان.

گۇلايىم شىنتەمىرقىزى

احمەتجان قۇسايىنوۆ مويىندالعان حيرۋرگ، جوعارى تاجىريبەلى مامان، ەڭ كۇردەلى وتالار جاساعان. مەديتسينا سالاسىندا جۇرگەن ول مىڭداعان ادامنىڭ ءومىرىن امان الىپ قالدى. ءوزىنىڭ تاڭداعان ماماندىعىنا بەرىك بولدى جانە سوڭىنان ەرگەن ءىزباسارلارىنا ۇستاز بولا ءبىلدى. ماڭعىستاۋ وڭىرىندە احمەتجان اعانىڭ بىلمەيتىندەر كەمدە-كەم. ەلىمىزدىڭ حالقىنا ەمدەۋ-پروفيلاكتيكالىق جۇمىستارىن جوعارى دەڭگەيدە ۇيىمداستىرا بىلگەن ونىڭ وراسان ەڭبەگى سوناۋ كەڭەس ءداۋىرى تۇسىندا ەسكەرىلىپ، كەڭەس وداعى دەنساۋلىق ساقتاۋ مينيسترلىگىنىڭ «دەنساۋلىق ساقتاۋ سالاسىنىڭ ۇزدىگى» اتتى توسبەلگىسىمىن دە ماراپاتتالعان.

احمەتجان قۇسايىنوۆ 1939 جىلى 12 قاراشادا قازىرگى اتىراۋ وبلىسى ماحامبەت اۋدانىنا قاراستى باقساۋ اۋىلىندا دۇنيەگە كەلگەن. اكەسى مالشى بولعان. ال اناسى 11 قۇرساق كوتەرىپ، «باتىر انا» اتاعىنا يە بولدى. ورتا وقۋ ورنىن تامامداعان سوڭ الماتىداعى مەملەكەتتىك مەديتسينالىق ينستيتۋتىن بىتىرگەن. ەڭبەك جولىن 1965 جىلى اتىراۋ وڭىرىنەن باستاعان. ال 1973 جىلدان باستاپ ونىڭ ءومىرى ماڭعىستاۋمەن تىكەلەي بايلانىستى. بىرقاتار باسشىلىق قىزمەتتەردە دە ابىرويلى ەڭبەك ەتتى. ەڭبەك ارداگەرى زەينەتكە شىققاننان كەيىن دە قاراپ قالمادى، ونىڭ ءبىلىمى مەن تاجىريبەسى قاجەت بولعان سوڭ بىرقاتار جەكەمەنشىك كلينيكالار كەلىسىمشارت نەگىزىندە جۇمىسقا شاقىردى. وسىلايشا ول 75 جاسقا دەيىن ءوزىنىڭ سۇيىكتى ىسىمەن اينالىستى. ونىڭ قاجىرلى ەڭبەگى سان مارتە ەسكەرىلىپ، بىرقاتار ەستەلىك جانە توسبەلگىلەرمەن ماراپاتتالعان. اتاپ ايتقاندا «قازاقستان مۇنايىنا 120 جىل»، «ۇزاق جىلدار ادال ەڭبەگى ءۇشىن»، «شىنايى مەيىرىمدىلىگىن جانە ادامدارعا جاساعان قامقورلىعى»، «ەڭبەك ارداگەرى» جانە ت.ب.

-ءوز باسىم مەديتسينا سالاسىن تاڭداعانىما ەش وكىنبەيمىن، اسىرەسە حيرۋرگيانى. ارتتا ۇمىتىلماس جارقىن ساتتەر مەن قىزىقتى كۇندەر قالدى. جۇمىسقا بەرىلگەنىم سونشالىق، ءتىپتى كۇندىز-ءتۇنى ءۇي كورمەي جۇرگەن كەزدەرىم كوپ بولدى. دەمالىستىڭ نە ەكەنىن ۇمىتقان كەزدەر از بولمادى. ەڭ باستىسى ۇنەمى الدىمىزعا ماقسات قوياتىنبىز: قالاي بولعاندا دا ادام ءومىرىن امان الىپ قالۋ ءۇشىن بارىمىزدى سالۋ،- دەيدى ول.

ارداگەر ءوزىنىڭ شاكىرتتەرى تۋرالى دا ايتىپ ءوتتى. ولاردىڭ قاتارىندا ەستۇرعان مۇقانتاەۆ، ەلجاس حۇسايىنوۆ، سۇلەيمەن بەرداۋلەتوۆ، بوريس چاگاي، سايىن شانتيميروۆ، تالعات مۇقانتاەۆ جانە باسقالار. اسىرەسە «نەيرون» كلينيكاسىندا زەينەتكە شىققاننان كەيىن 10 جىل جۇمىس جاساعان كۇندەرىن ساعىنىشپەن ەسكە الادى.

احمەتجان قۇسايىنوۆتىڭ جۇبايى بالحيا احمەتقىزى فارماتسەۆتيكا فاكۋلتەتىنىڭ تۇلەگى، پروۆيزور ماماندىعىن ۇزدىك بىتىرگەن. ولار 3 ۇل 1 قىز وسىرگەن. الايدا بالالارى اكە نەمەسە انا جولىن قۋىپ مەديتسينا سالاسىن تاڭداماعان. اركىم وزىنە ۇناعان ماماندىق يەسى اتانىپتى. احمەتجان قۇسايىن ۇلى بولسا، بالالارىنىڭ مەديتسينانى تاڭداماعانىنا وكىنبەيدى، كەرىسىنشە ءار ادام وزىنە ۇناعان سالانى تاڭداعانى دۇرىس دەپ سانايدى. ارداگەر دارىگەر بوس ۋاقىتىندا سۇيىكتى وتباسىنىڭ جانىندا، اسىرەسە نەمەرەلەرىمەن كاسپي جاعالاۋىندا سەرۋەندەگەندى ۇناتادى.