ايماقتار • 16 قاراشا، 2019

ماڭعىستاۋدا 140 كاسىپكەر قايتارىمسىز قاراجات الادى

19 رەتكورسەتىلدى

ماڭعىستاۋلىق كاسىپكەرلەرگە 200 اەك، ياعني 505 مىڭ تەڭگە كولەمىندەگى قايتارىمسىز قاراجات بەرۋ شارالارى جالعاسۋدا. بۇل تۋرالى ماڭعىستاۋ وبلىسى «اتامەكەن» كاسىپكەرلەر پالاتاسى ءباسپاسوز حاتشىسى جازيرا ءابىل حابارلادى.

2017-2021 جىلدارعا ارنالعان «ەڭبەك» ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ باعدارلاماسى بويىنشا گرانت الۋ ءۇشىن كوميسسيا الدىندا ءوز بيزنەس جوبالارىن قورعاۋعا كەلگەن ادامداردىڭ قاراسى كوپ. وڭىرلىك كاسىپكەرلەر پالاتاسىندا ەكى كۇننەن بەرى وتكەن ءىس شارادا 140 ۇمىتكەر وزا شىقتى. ولاردىڭ ىشىنەن بەينەۋ اۋدانىنا-55، مۇنايلىعا-32، ماڭعىستاۋ اۋدانىنا-20، جاڭاوزەندىكتەرگە-32، ال اقتاۋلىق ءبىر تۇرعىنعا قايتارىمسىز قارجى بۇيىردى. سونىمەن قايتارىمسىز قاراجات كىمدەرگە بەرىلەدى؟ نەگىزىنەن بۇل گرانت مۇگەدەكتەرگە، كوپ بالالى انالارعا، جارىمجان بالا اسىراۋشىلارعا، جاستارعا جانە جۇمىسسىزدارعا ارنالعان. ۇمىتكەرلەردىڭ دەنى تۇيە، جىلقى، ەشكى شارۋاشىلىعى، تىگىن تسەحى، بودەنە ءوسىرۋ، كونديتەر ونىمدەرىن دايىنداۋ، سۇلۋلىق سالونىن اشۋ سياقتى كاسىپ تۇرلەرىن دامىتۋدى قولاي كورەدى.

جاڭاوزەن قالاسىنىڭ تۇرعىنى لاۋرا اقنازاروۆا ەشكى ءوسىرۋدى ءجون كورەدى. كوپ بالالى انا بالالارى سىرقاتتانا بەرگەن سوڭ ۇيىنە ەشكى ساتىپ الىپ، سونىڭ سۇتىمەن يممۋنيتەتىن كوتەرتىپ، اۋرۋىنان تەز ايىققانىن كوزبەن كوردى. حالىقتىڭ دەنساۋلىعىن تابيعي جولمەن نىعايۋ ماقساتىندا وسىنى ۇلكەن كاسىپكە اينالدىرعان دۇرىس دەپ سانايدى. «اسىل تۇقىمدى ەشكىنىڭ باعاسى 125 مىڭ تەڭگە تۇرادى ەكەن. 505 مىڭعا بىرنەشە مال الىپ، كاسىپ باستاعىم كەلەدى. ۇيدە اتا-ەنەم كومەكتەسەدى. ءسويتىپ ءبىر مۇگەدەك ادامدى جۇمىسپەن قامتاماسىز ەتۋدى ۇيعارىپ وتىرمىن» دەيدى ول.

ال، بەعالي ءامىروۆ كيىم-كەشەككە تىگىلەتىن ەتيكەت ءوندىرۋدى جوسپارلاپ وتىر. «قازىر قولدان ءوز برەند كيىمدەرىن شىعاراتىندار، كورپە-توسەك، بالالار كيىمدەرى مەن ءسابي ورايتىن كورپەلەر تىگەتىن شەبەرلەر كوبەيىپ كەلەدى. ولار ءوز بەلگىسى باسىلىپ شىققان ەتيكەت تىگىپ، بۇيىمدارىن ساتىلىمعا قويسا وتە ورىندى بولار ەدى. ءىرى تىگىن فابريكالارىمەن كەلىسىمشارتقا وتىرىپ، ولارعا ءوز بەلگىلەرىن تىگىپ شىعارۋعا دايىنبىز. قازىر ونىڭ ءبارىن باسقا وبلىستارعا تاپسىرىس بەرىپ، ۇزاقتاي كۇتىپ جۇرەتىندەر بار. وسى ماسەلەنى وڭ شەشكىم كەلەدى»،- دەيدى ۇمىتكەر بەعالي سەيفۋللا ۇلى.

-بىرنەشە سالا ماماندارىنان قۇرىلعان كوميسسيا مۇشەلەرىنە بيزنەس جوبالاردى تاڭداۋدىڭ مول مۇمكىندىگى بولدى. گرانت كاسىبىن باستايمىن دەگەن ازاماتتارعا قۇرال-جابدىق، تەحنيكالىق قامتۋ، مال ساتىپ الۋ ءۇشىن بەرىلەدى. قاراجات العاننان سوڭ ولاردىڭ ماقساتتى جۇمسالۋىن، كاسىبىن جۇيەلى تۇردە تەكسەرىپ وتىرامىز. بۇل قاراجات جىمقىرىپ، ەشقانداي كاسىپ اشپايتىن ادامدارعا ارنالماعان. قارجى ورىنسىز جۇمسالعانىن بىلسەك، كەرى قاراي ءوندىرۋ شارالارى جۇرەدى، دەدى كوميسسيا توراعاسى مۇرات ساۋعاباەۆ.

بۇل وسى جىلعا بولىنگەن گرانتقا ۇمىتكەر سوڭعى لەك. كەلەر جىلى قايتارىمسىز قاراجات ءبولۋ جالعاسىن تابادى.

سوڭعى جاڭالىقتار

اۋىر اتلەتتەر كاتارعا اتتانادى

اۋىر اتلەتيكا • كەشە

كوپبالالىلارعا كومەك

ايماقتار • كەشە

كۇلكى كەرۋەنى № 22

رۋحانيات • كەشە

فاريزا اقىننىڭ ۇستازى

رۋحانيات • كەشە

ۇقساس جاڭالىقتار