تىنىشتىقبەك اقىننىڭ سوناۋ سەمەي شاھارىندا جاتىپ-اق ولەڭسۇيەر قاۋىمدى ەلەڭدەتەتىن قاسيەتى بار. ونىڭ سەبەبى, كوپ جازىپ, كوپ ىزدەنەتىن اقىننىڭ ويلاۋ جۇيەسىنىڭ وزگەشەلىگىندە بولسا كەرەك. ەكىنشى مىڭجىلدىقتىڭ باستالا قالعان شاعىندا تۇڭعىش شىققان «اقشام حاتتارى» كىتابىنىڭ قولدان-قولعا تيمەي وقىلعانىنا كۋاگەرمىز. قازىرگى ينتەرنەت جۇيەسى دامىعان شاقتا اقىننىڭ شىعارماشىلىعى دا, ءوزى دە كوز الدىمىزدا دەۋگە بولادى. اقىننىڭ ارا-تۇرا وقىرماندارىمەن سىرلاسىپ, حات جازاتىنى دا بار. «ينتەرنقازاققا حات» جازباسى سونىڭ دالەلى. «قاس ساق اڭقىماسى» كىتابىنىڭ مازمۇنى نەگىزىندە جازىلعان حاتتا اقىن «اڭقىما», «مۇڭكىمە» ۇعىمدارى ارقىلى كوشپەلىلىك پەن وتىرىقشىلىقتىڭ ايىرماشىلىعىن كورسەتىپ, قازاق دۇنيەتانىمىنىڭ ارتىقشىلىعىن اڭگىمە وزەگىنە اينالدىرعان. كەشەگى اكادەميالىق كىتاپحانادا وتكەن كەزدەسۋ كەشىندە دە تىنىشتىقبەك ابدىكاكىم ۇلى وقىرماندارىمەن ءوزى شيرەك عاسىردان بەرى ىزدەنگەن ەجەلگى ۇعىمدارىمىز توڭىرەگىندە پىكىر ءبولىستى. وقىرماندارىنىڭ سۇراقتارىنا بارىنشا ناقتى جاۋاپ بەردى. شيرەك عاسىرعا جۋىق ىزدەنىپ, جازعان دۇنيەسىنىڭ ون توم كىتاپ بولاتىنىن, ازىرگە قولجازبا كۇيىندە تۇرعانىن, ءساتىن سالسا الداعى جىلى ءۇش تومى جارىققا شىعاتىنىن مالىمدەدى.
كەش بارىسىندا ەلوردالىق ستۋدەنت جاستار اقىننىڭ ولەڭدەرىن وقىدى. بەلگىلى ءداستۇرلى ءانشى كلارا تولەنباەۆا, كۇيشى قايرات ايتباەۆ سىندى ونەرلى جاستار اقىن اعالارىنا قۇرمەت كورسەتىپ, كەشتىڭ قوناعى بولدى, ءان-كۇيمەن كەشتىڭ ءارىن كىرگىزدى. كەشتى اقىن, قازاقستان جازۋشىلار وداعى نۇر-سۇلتان قالالىق فيليالىنىڭ باسشىسى داۋلەتكەرەي كاپ ۇلى جۇرگىزدى.
