بۇگىندە ەلىمىزدە قانت ديابەتىنە شالدىققان 300 مىڭنان استام ادام تىركەۋدە بار. ولاردىڭ ىشىندە 30 مىڭعا جۋىعى الماتى قالاسىنىڭ تۇرعىندارى ەكەن. ال, جاڭادان اشىلعان ديابەت ورتالىعىنىڭ ستاتسيونارى 30 ورىنعا شاقتالعان. مۇندا اي سايىن ءجۇز ناۋقاستى قابىلداپ, جالپى جىل سوڭىنا دەيىن مىڭنان استام ادامدى ەمدەۋ جوسپارلانىپ وتىر. جاڭا جىلدان باستاپ مەكەمەدە مىندەتتى الەۋمەتتىك مەديتسينالىق ساقتاندىرۋ جۇيەسى دە ىسكە قوسىلماق.
ء«بىزدىڭ ەلىمىزدە 350 000 ادام قانت ديابەتىمەن اۋىرادى, سوندىقتان ونىڭ الدىن الۋ مەن ەمدەۋدى ۇيىمداستىرۋعا تىرىسامىز. بۇل ورتالىق قانت ديابەتىنىڭ الدىن الۋدى ماقسات ەتەدى. سونىمەن قاتار اسقىنۋىنا دا توسقاۋىل قويماسا بولمايدى. ناۋقاستاردى قانداي دا ءبىر سەبەپپەن باسقا ەمحانالار قابىلداماسا, ولار ءبىزدىڭ كلينيكاعا قارالۋلارىنا مۇمكىندىكتەرى بار. ديابەت اۋرۋىنا شالدىققاندار مۇگەدەك ەسەبىندە دەسە دە بولادى جانە ولار مىندەتتى الەۋمەتتىك مەديتسينالىق ساقتاندىرۋ جۇيەسىنىڭ ارقاسىندا الدەقايدا تەزىرەك كومەك الا الادى», – دەدى مەديتسينالىق كلينيكانىڭ باسشىسى جاناي اقانوۆ
قانت ديابەتى اۋرۋى قازىرگى تاڭدا الەۋمەتتىك ماسەلەگە دە اينالىپ وتىر. كۇن ساناپ, ديابەت اۋرۋىنا شالدىعاتىندار سانى كوبەيۋدە, ال دارىگەرلەر بۇل اۋرۋدىڭ ەمدەلۋ جولى ۇزاققا سوزىلاتىنىن ايتادى. ءتىپتى, اۋرۋدىڭ سالدارىنان ناۋقاس مۇگەدەكتىككە ۇشىراسا, مەملەكەت تاراپىنان قارجىلاي دا كومەك كورسەتىلەدى ەكەن. دەسە دە, دارىگەرلەر اتالمىش اۋرۋدىڭ الدىن الۋعا تىرىسادى.
ناۋقاستاردىڭ كوبىسى وزدەرىنىڭ بۇل اۋرۋعا شالدىققاندىعى تۋرالى بىلە بەرمەيدى. تەك, قان تالداۋى ناتيجيەسىندە عانا كەزدەيسوق جانە وتە كەش ءبىلىپ جاتادى. قازىرگى تاڭدا بۇل اۋرۋدىڭ ەمى «ينسۋللين» ءدارىسى بولىپ وتىر. ال, قالا ءدارىحانالارىندا اتالمىش ءدارىنىڭ باعاسى شارىقتاپ تۇرعانى ناۋقاستاردى قاتتى قىنجىلتادى. 19 جىل بويى وسى اۋرۋمەن كۇرەسىپ كەلە جاتقان تيمۋر گالەەۆ اشىلعان ورتالىقتىڭ ءدارى-دارمەكتى تەگىن بەرۋدە كومەگى مول دەيدى.
ورتالىقتا قانت ديابەتىن ەمدەۋمەن قاتار, كەشەندى ەمدەۋ جۇمىستارى دا جۇزەگە اسىرىلماق. ديابەتولوگپەن بىرگە ناۋقاستى نەۆروپاتولوگ, كارديولوگ, وتوليارينگولوگ, ۋدز ماماندارى دا قاداعالايدى. ايتا كەتەلىك, ورتالىق قاراشانىڭ 15-ءى كۇنى العاشقى ەمدەلۋشىلەردى قابىلداۋ جۇمىسىن باستاماق. جىل سوڭىنا دەيىن «قانت ديابەتى» دياگنوزىمەن اۋىراتىن 50-گە جۋىق ادامدى كۆوتا بويىنشا ەمدەۋ جۇمىستارى جوسپارلانىپ وتىر.
