بۇگىنگى تاڭدا مايتالمان ماماندار مەن بىلىكتى باپكەرلەردەن باستاپ, بارلىق باق وكىلدەرى «الداعى ۋاقىتتا الۆارەس كىممەن جۇدىرىقتاسۋى مۇمكىن؟» دەگەن اڭگىمەنى سان ساققا جۇگىرتۋدە. وسى ورايدا, بەس بوكسشىنىڭ ەسىمى ەرەكشە اتالۋدا. ولار – قازاقستاندىق گەننادي گولوۆكين, بريتانيالىق كاللۋم سميت پەن بيللي دجو سوندەرس, رەسەيلىك دميتري بيۆول مەن ارتۋر بەتەربيەۆ. ارينە, قازىرگى كەزدە كوپشىلىك GGG مەن كانەلو اراسىنداعى تريلوگيانى كورگىسى كەلەدى. الايدا مەكسيكانىڭ ورەنى گەنادي گولوۆكينمەن قايتا كەزدەسۋگە اسا قۇلشىنىپ وتىرعان جوق. سول سەبەپتى ول كەلەسى جىلدىڭ باسىندا جوعارىدا ەسىمدەرى اتالعان وزگە ءتورت ساڭلاقتىڭ بىرىمەن سايىسقا ءتۇسۋى مۇمكىن.
جاسىراتىنى جوق, ايتۋلى ورەندەردىڭ بارلىعى دا مىقتى. ماسەلەن, ۇلىبريتانيانىڭ قوس وكىلى وسى كۇنگە دەيىن جەڭىلگەن ەمەس. كاللۋم سميت 26 رەت باسىمدىق تانىتىپ, 19 قارسىلاسىن ەسىنەن تاندىردى. بيللي دجو سوندەرس 27 مارتە جەڭىسكە جەتىپ, 13 كەزدەسۋدى مەرزىمىنەن بۇرىن اياقتادى. دميتري بيۆول دا شاشاسىنا شاڭ جۇقتىرماي ءجۇر. ول 17 رەت رينگكە كوتەرىلىپ, 11 باسەكەنى نوكاۋتپەن اياقتادى. ال ارتۋر بەتەربيەۆتىڭ كورسەتكىشى تىپتەن تاماشا. داعىستاننىڭ تۇلەگى 15 جەكپە-جەكتىڭ بارلىعىندا ايقىن جەڭىسكە قول جەتكىزدى.
