ءىس-شاراعا وبلىستىق سوتتىڭ القا توراعالارى, سۋديالار, ماڭعىستاۋ وبلىستىق ادۆوكاتتار القاسى تورالقاسىنىڭ توراعاسى راشيد ساۋلەباەۆ جانە ادۆوكاتتار, قۇقىق قورعاۋ ورگاندارىنىڭ وكىلدەرى قاتىستى.
ءىس-شارانى وبلىستىق سوتتىڭ ازاماتتىق ىستەر جونىندەگى سوت القاسىنىڭ توراعاسى نۇرساپا پريماشەۆ اشىپ, ەلىمىزدە ازاماتتار قازاقستان رەسپۋبليكاسى كونستيتۋتسياسى جانە زاڭدارىنا سايكەس بەلگىلەنگەن ەرەجەلەرگە ساي ازاماتتىق, اكىمشىلىك جانە قىلمىستىق پروتسەسس بارىسىندا زاڭدى كومەك الۋعا قۇقىلى ەكەندىگىنە توقتالدى. سونداي-اق ول ءوڭىر سوتتارىندا ارنايى ادۆوكاتتار كابينەتىنىڭ اشىلعانىن اتاپ ءوتتى.
دوڭگەلەك ۇستەل بارىسىندا ادۆوكاتتىڭ قىلمىستىق ىستەر مەن ماتەريالدارعا قاتىسۋى, قىلمىستىق پروتسەسستە تاراپتاردىڭ قاراما-قايشىلىقتى جانە تەڭ قۇقىقتارىن قامتاماسىز ەتۋى, ازاماتتىق سوت ءىسىن جۇرگىزۋدە مەملەكەت كەپىلدىك بەرگەن زاڭ كومەگىن كورسەتۋ ءۇشىن ادۆوكات تاعايىنداۋمەن بايلانىستى پروبلەمالىق ماسەلەلەر, باستى سوت تالقىلاۋىنداعى پروكۋروردىڭ ءىس جۇرگىزۋ مارتەبەسى مەن اسپەكتىلەرى تالقىعا سالىندى.
اقتاۋ قالالىق سوتىنىڭ سۋدياسى مارەت كوۆراەۆا سوتقا قىلمىستىق ءىس تۇسكەن بويدا قورعاۋشى تاعايىنداۋ تۋرالى قاۋلى شىعارىلىپ, ادۆوكاتتارعا الدىن الا جولداناتىنىن تىلگە تيەك ەتتى.
- سوت قاراستىرعان قىلمىستىق ءىس بويىنشا قورعاۋ مەن وكىلدىك ەتۋگە بايلانىستى شىعىستاردى وتەۋ جانە سوتتالۋشىعا, سوتتالعانعا, اقتالۋشىعا نەمەسە جابىرلەنۋشىگە زاڭ كومەگىن كورسەتۋ بويىنشا اقى تولەۋ تۋرالى قاۋلى ادۆوكاتتىڭ ءوتىنىشى نەگىزىندە شىعارىلادى, دەدى مارەت كوۆراەۆا.
ءىس-شارا سوڭىندا قورعاۋشىلار ءار ءىستى ساپالى قاراۋعا ءبىر اۋىزدان اتسالىساتىندىقتارىن جەتكىزدى.
