تورتكۇل دۇنيە جانكۇيەرلەرى 2 قاراشادا رەسەيلىك سەرگەي كوۆالەۆ پەن مەكسيكالىق ساۋل الۆارەس اراسىنداعى جەكپە-جەكتى تاعاتسىزدانا كۇتىپ وتىرعانى انىق. اقش-تىڭ لاس-ۆەگاس قالاسىنداعى ايگىلى مەديسون سكۆەر گاردەن كەشەنىندە وتەتىن ايتۋلى بوكس كەشىندە ورتا سالماقتاعى مەيىرىم نۇرسۇلتانوۆ مەكسيكانىڭ تاعى ءبىر ورەنى كريستيان وليۆاسپەن جۇدىرىقتاسادى.
ءدال سول كۇنى رەسەيدىڭ ەكاتەرينبۋرگ قالاسىندا وتەتىن تۋرنيردە ءبىرىنشى اۋىر سالماقتاعى يسا اقپەرباەۆ شارشى الاڭعا شىعادى. ونىڭ قارسىلاسى – وليمپيادا جانە الەم چەمپيونى, ەۋروپا بىرىنشىلىگىنىڭ ەكى دۇركىن جەڭىمپازى, رەسەيلىك ەۆگەني تيششەنكو. ريو وليمپياداسىنىڭ فينالىندا ءدال وسى بوكسشى ءبىزدىڭ ۆاسيلي لەۆيتتى التىننان ايىرعان بولاتىن. اقتىق ايقاستىڭ اقىرى داۋ-دامايعا ۇلاسىپ, سول باسەكەدە تورەشىلەر ادىلەتسىز شەشىم شىعارعانى جايىنداعى اڭگىمە ءالى كۇنگە دەيىن وربۋدە.
9 قاراشادا ءۇش بىردەي وتانداسىمىز جارىس كورىگىن قىزدىرادى. اتاپ ايتساق, اقش-تىڭ فرەسنو قالاسىندا ورتا سالماقتاعى اسا دارىندى بوكسشىمىز جانىبەك ءالىمحان ۇلى نيگەريادا تۋىپ-ءوسىپ, كەيىننەن كانادانىڭ ازاماتتىعىن العان البەرت ونولۋنوسەمەن ايقاسادى. لوس-اندجەلەستەگى كەشتە ءبىرىنشى ورتا سالماقتاعى ماديار اشكەەۆ مەكسيكالىق فەرناندو كاستانەدومەن كۇش سىناسادى. ال گەرمانيانىڭ گامبۋرگ قالاسىندا وتەتىن جارىستا اسا اۋىر سالماقتاعى جان كوسوبۋتسكي ونەر كورسەتەدى. نەمىس جەرىندە ول حورۆاتيالىق اگرون سماكيتسيمەن شەبەرلىك بايقاسادى.
22 قاراشادا جانقوش تۇراروۆقا جانكۇيەر بولامىز. جارتىلاي ورتا سالماق دارەجەسىندە باق سىنايتىن قانداسىمىز لوندوندا MTK Global كومپانياسىنىڭ ۇيىمداستىرۋمەن وتەتىن Golden Contract تۋرنيرىندەگى ءوزىنىڭ تۇساۋكەسەر كەزدەسۋىن وتكىزەدى. ايتۋلى ۇيىمنىڭ بەلگىلەگەن شارتى مەن تالابىنا ساي ول ءوزىنىڭ قارسىلاسىن جارىستىڭ وتۋىنە تەك ءبىر اپتا عانا ۋاقىت قالعاندا بىلە الادى.
مىنە, قاراشا ايىندا كاسىپقوي رينگتە كۇش سىناسىپ جۇرگەن قازاقستاننىڭ بىلعارى قولعاپ شەبەرلەرىن وسىنداي قىزىقتى جەكپە-جەكتەر كۇتىپ تۇر. الداعى باسەكەلەردە ءبىزدىڭ جىگىتتەر ورەلى ونەرلەرىمەن ءوز جانكۇيەرلەرىن قۋانتادى دەگەن ويدامىز.
