جاقىندا وتانداستارىمىزدىڭ ءبىرى ەلىمىزدىڭ سىرتقى ىستەر مينيسترلىگىنە ءوتىنىش جازىپ, دۋباي قالاسىنداعى «Latifa» كلينيكاسىندا جاساندى تىنىس الۋ اپپاراتىمەن تىنىستاپ جاتقان 2 جاستاعى بالاسىن ەلگە جەتكىزۋگە قولعابىس جاساۋدى سۇراعان. دالىرەك ايتقاندا, بالانى ساناۆياتسيا ۇشاعى ارقىلى ەلگە الىپ كەلۋدى ءوتىنىپتى. ازاماتتىڭ ءوتىنىشىن ارنايى كوميسسيا قاراپ, پاتسيەنتتى ۇشاقپەن تاسىمالداۋعا بولاتىن-بولمايتىندىعى تۋرالى ساراپتاما ازىرلەنگەن. سودان سوڭ دەنساۋلىق ساقتاۋ مينيسترلىگى «ۇلتتىق شۇعىل مەديتسينانى ۇيلەستىرۋ ورتالىعىمەن» بىرلەسىپ بالانى الىپ كەلۋگە شەشىم قابىلداعان. ءسويتىپ 27 قازاندا سانيتارلىق اۆياتسيانىڭ ءموبيلدى بريگاداسى ارنايى ۇشاق ارقىلى بالدىرعاندى قازاقستانعا الىپ كەلدى. قازىر بالا نۇر-سۇلتان قالاسىنداعى انا مەن بالا ۇلتتىق عىلىمي ورتالىعىندا ەمدەلىپ جاتىر. ءسابي بيىل 15 قازاندا دۋباي قالاسىنداعى باسسەيندەردىڭ بىرىنەن ەس-ءتۇسسىز كۇيدە تابىلعان بولاتىن. شەتەلدىك دارىگەرلەر كىشكەنتاي وتانداسىمىزعا جەدەل كومەك جاساعان سوڭ جۇرەگىنىڭ سوعۋى قالپىنا كەلگەن ەدى. الايدا پاتسيەنتتىڭ جاعدايى تىم كۇردەلى بولعاندىقتان بالانىڭ ەسىن جيعىزۋ مۇمكىن بولمادى. دارىگەرلەر ونىڭ 3-دارەجەلى كوماعا تۇسكەنىن انىقتاعان بولاتىن. ەندى بالا ەم-دومىن ەلىمىزدە جالعاستىراتىن بولدى.
بيىلعى 9 ايدىڭ قورىتىندىسىنا قاراعاندا شەتەلدەردە دەنساۋلىعى سىر بەرگەن ازاماتتارىمىزدى ەلگە الىپ كەلۋ ءۇشىن قازاقستان ساناۆياتسياسى 16 رەت ساپارعا شىعىپتى. ءسويتىپ شەتەلدىك مەديتسينا مەكەمەلەرىنەن 69 ازاماتتى ەلگە جەتكىزگەن. ال سانيتارلىق اۆياتسيا ۇشاقتارى مەن تىكۇشاقتارى جالپى العاندا بيىلعى جارتى جىلدا 1500-دەن استام مارتە كوككە كوتەرىلىپ, 2 مىڭعا جۋىق پاتسيەنتكە كومەك كورسەتتى. ساناۆياتسيا ۇشاقتارى بيىلعى ساپارلارىندا 6 رەت دونورلىق اعزالاردى تاسىمالداعانىن ايرىقشا اتاپ وتۋگە بولادى. ال سانيتارلىق اۆياتسيا قىزمەتىنە جۇگىنەتىن پاتسيەنتتەردىڭ كومەك شاقىرۋ سەبەپتەرىنە كەلسەك, جەدەل جاردەمنىڭ 22,9 پايىزى وقىس وقيعالاردىڭ سالدارىنان دەنساۋلىعىنا زاقىم كەلگەن ادامدارعا جاردەم كورسەتۋگە ارنالىپتى. بالالار پاتولوگياسى بويىنشا ساناۆياتسيا شاقىرتۋعا ءماجبۇر بولعاندار ۇلەسى – 22 پايىز, قان اينالىمى جۇيەسىنىڭ اقاۋىنا بايلانىستى – 20,4 پايىز, نارەستەلەردىڭ پاتولوگياسى – 14,1 پايىز, اكۋشەرلىك-گينەكولوگيالىق پاتولوگيا بويىنشا 12,5 پايىز ەكەن. ال 8,1 پايىز پاتسيەنتتەر وزگە جاعدايلارعا بايلانىستى ساناۆياتسيا كومەگىنە جۇگىنگەن.
جالپى, وتاندىق ساناۆياتسيا 2011 جىلدان بەرى 15 مىڭنان استام رەيس جاساعان. قازىر «ۇلتتىق شۇعىل مەديتسينانى ۇيلەستىرۋ ورتالىعىندا» سانيتارلىق اۆياتسيانىڭ 40-قا جۋىق ۇشاعى مەن تىكۇشاعى قىزمەت كورسەتىپ ءجۇر.
