وسىعان دەيىن قانات يسلام كاسىپقوي رينگتە 26 جەكپە-جەك وتكىزىپ, سونىڭ بارلىعىندا جەڭىس تويىن تويلاپ, 21 قارسىلاسىن ەسىنەن تاندىرعانىن جاقسى بىلەمىز. سول سەبەپتى جانكۇيەرلەردىڭ دەنى بۇل جولى دا قانداسىمىزدىڭ ايقىن باسىمدىق تانىتاتىنا كۇماندانعان جوق. بىراق ءبارى ءبىز ويلاعانداي بولمادى. ۋولتەر كاۋتوندوكۆا شارشاپ-شالدىعۋدى, ءبىر ساتكە دە دامىلداۋدى بىلمەيتىن, ۇنەمى شابۋىل وتىندە جۇرەتىن, ناعىز «سەن تۇر, مەن اتايىننىڭ» ءوزى ەكەن.
راسىندا دا بۇل سپورتشىنىڭ كورسەتكىشى ادام قىزىعارلىقتاي. 34 جاستاعى ناميبيانىڭ تۋماسى وسى سپورت ءتۇرىن سەرىك ەتكەن التى جىلدان اسا ۋاقىت ارالىعىندا19 مارتە رينگكە كوتەرىلىپ, 18 رەت جەڭىسكە جەتتى. 17 قارسىلاسىن ەسىنەن تاندىردى. شارشى الاڭدا ول تەك بۇگىنگى تاڭدا الدىنا جان سالماي جۇرگەن, اتاعى الىسقا جايىلعان اقش بوكسشىسى اندرادە دەمەتريۋستان عانا ۇتىلدى. سونىڭ وزىندە تەك ۇپاي سانىمەن عانا. مىنە, وسى جايتتىڭ بارلىعى كاۋتوندوكۆانىڭ قارىمدىلىعىن بايقاتادى.
ايتقانداي-اق, باسەكە وتە شيەلەنىستى ءوتتى. العاشقى راۋند بارلاۋمەن وتسە, ودان كەيىنگى ۇشەۋىندە قانات ءسال الىمدى كورىندى. ول جىلدام قيمىلداپ, ۇنەمى ۋولتەردىڭ الدىن وراپ وتىردى. بىرنەشە جاقسى سوققىلار دا جۇمسادى. ناعىز «قىزىقتى» ءبىز بەسىنشى راۋندا كوردىك. سوققىلار الماسۋ بارىسىندا قانداسىمىز نيگەريالىقتى ۇرىپ جىقتى. تورەشى ەسەپ اشتى. نوكداۋن! بۇكىل زال ءدۇر سىلكىندى. ءبارى دە ايعايعا باسىپ, جەرلەستەرىنە بارىنشا قولداۋ كورسەتتى. سپورت سارايىنا جينالعان ءدۇيىم جۇرت يسلامنىڭ ەندى ءوز مۇمكىندىگىن قالت جىبەرمەيتىنىنە قاتتى سەندى. بىراق كاۋتوندوكۆا وتە ءتوزىمدى ءارى نامىسقوي ەكەن. ورنىنان تۇرا سالا, قاناتقا قاراي ۇمتىلعان ول ەكى بىردەي سوققىسىن ءدال دارىتتى.
التىنشى راۋندتان باستاپ, قارا قۇرلىقتىڭ وكىلى دامىلسىز شابۋىلدادى. شىنى كەرەك, ۋولتەر ءبىزدىڭ جىگىتكە قاراعاندا تىڭ كورىندى. سوققىلارى دا دىتتەگەن جەرىنە ءدوپ ءتيىپ جاتتى. قانات قاشا جۇرە, ۇرىس سالۋعا بەكىندى. ونىڭ شارشاپ قالعانى انىق بايقالدى. بىراق نامىسقا تىرىسقان قانداسىمىز ارا-تۇرا شابۋىلداپ, ەسە قايىرۋعا تىرىستى. ءدال وسىنداي كورىنىس باسەكەنىڭ سوڭىنا دەيىن جالعاستى.
10 راۋندتىق ايقاس اياقتالعاننان كەيىن جانكۇيەرلەر تورەشىلەردىڭ شەشىمىن تاعاتسىزدانا كۇتتى. سەبەبى, ءداپ سول مەزەتتە كىمنىڭ ۇتقانىن ەشكىم ءدوپ باسىپ ايتا المايتىن ەدى. جانكۇيەرلەردىڭ دەنى تەڭ ەسەپ تىركەلەتىن شىعار دەگەن ويدا بولدى. الايدا بىرەر مينۋتقا سوزىلعان ۇزىلىستەن كەيىن تورەشىلەر قانات يسلامنىڭ جەڭىسكە جەتكەنىن جاريا ەتتى. وسىلايشا, قازاق بوكسشىسى التىن بەلبەۋىن ساقتاپ قالدى.
وسى كەشتە تاعى سەگىز رەيتينگتىك جەكپە-جەكتەر ۇيىمداستىرىلدى. ارمان رىسبەك (78 كيلو) پەن مۇحيددين رادجابوۆ اراسىنداعى باسەكە ءبىرىنشى راۋندتىڭ اياقتالۋىنا 58 سەكۋند قالعاندا توقتاتىلدى. ءوز شاكىرتتەرىنىڭ قارىمدى قازاققا ەش قايرات كورسەتە المايتىنىن تۇسىنگەن وزبەكستاندىق باپكەرلەر رينگكە اق ورامال لاقتىردى. باسەكە باستالعان بەتتە نۇرسۇلتان امانجولوۆ (+91 كيلو) لاتۆيالىق ەدگارس كالنارستى ءوزىنىڭ اۋىر سوققىسىمەن ەسەڭگىرەتىپ تاستادى. بالتىق جاعالاۋىنان كەلگەن بوكسشى ەكىنشى راۋندقا شىعۋدان باس تارتتى. ال داۋلەت داۋكەنوۆ (63,5 كيلو), ساپارباي ايداروۆ (74 كيلو), اسقار ەرۋبەك (63,5 كيلو) جانە رۋسلان مىرساتاەۆ (+91 كيلو) ءوز قارسىلاستارىن ۇپاي سانىمەن ۇتتى.
سونىمەن قاتار, وسى جارىستا شەتەلدە تۋىپ-وسكەن قوس قانداسىمىز دا ونەر كورسەتتى. وزبەكستاننىڭ شىرشىق وبلىسىندا دۇنيەگە كەلگەن بەكسۇلتان راۋشانوۆ رۋمىنيالىق الەكساندرۋ يونيتادان باسىم تۇسسە, قىتايدىڭ التاي ءوڭىرىنىڭ تۋماسى اقتىلەك جەڭىس ۋكراينالىق ماكسيم ۆورونينمەن تەڭ ءتۇستى.
