اتالمىش جوبانىڭ تەحنيكالىق-ەكونوميكالىق نەگىزدەمەسى وسى ۋاقىتقا دەيىن تەحنيكالىق سۋ شىعارۋ بويىنشا دايىندالسا, ەندى اۋىز سۋىن تۇششىتۋ بويىنشا قايتا جانداناتىن بولادى.
ەسكە سالا كەتەيىك, وسى جىلدىڭ قىركۇيەك ايىندا پرەمەر مينيستر اسقار ءماميننىڭ توراعالىعىمەن جاڭاوزەندى دامىتۋدىڭ كەشەندى جوسپارى بويىنشا جيىن وتكەن بولاتىن. اتالمىش باسقوسۋدا ۇكىمەت باسشىسىنىڭ جاڭاوزەن قالاسىنداعى اۋىز سۋ ماسەلەسىن شەشۋ جونىندە ارنايى تاپسىرماسى بولدى. وسىعان وراي, «كەندىرلى دەمالىس ايماعىنان قۋاتى تاۋلىگىنە 45-50 مىڭ تەكشە مەتر بولاتىن سۋ تۇششىتۋ زاۋىتىن سالۋ» جوباسى ازىرلەندى.
جينالىس كەزىندە تاراپتار زاۋىت پەن قۇبىرلاردى ورنالاستىرۋدىڭ بىرنەشە نۇسقالارىن ورتاعا سالدى.
- مەردىگەر مەكەمە «قازاق مۇناي جانە گاز عىلىمي-زەرتتەۋ جانە جوبالاۋ ينستيتۋتى» اق جوبانىڭ تەحنيكالىق-ەكونوميكالىق نەگىزدەمەسىن ءساۋىر ايىنىڭ سوڭىنا دەيىن ازىرلەيتىنىن ايتتى. سودان كەيىن, جوبانى ۇيلەستىرۋشى مەكەمە «قازمۇنايگاز» ۇك» اق اتىنان الەۋەتتى ينۆەستورلارمەن كەلىسسوزدەر جۇرگىزىپ, زاۋىتتىڭ ناقتى قۋاتىن انىقتاپ, قۇرىلىس جۇمىستارىن ەڭ قىسقا مەرزىمدە اياقتايمىز دەپ وتىرمىز, دەءدى «قازمۇنايگاز» ۇك» اق مۇناي تاسىمالداۋ بويىنشا باسقارۋشى ديرەكتورى نۇرتاس شمانوۆ.
