بايقاۋدىڭ شەشۋشى كەزەڭىندە «دۇنيەگە كەلەر ءالى تالاي قاسىم...» جانە «جاس داۋرەن» اتتى ەكى اتالىم بويىنشا 26 ۇمىتكەر باق سىنادى. جالپى بيىلعى قاسىم وقۋلارىنا قاراعاندى, شىعىس قازاقستان, باتىس قازاقستان جانە سولتۇستىك قازاقستان وبلىستارىنان بارلىعى 48 ءوتىنىم تۇسكەن بولاتىن.
قۇرامىندا ايتىسكەر اقىن, قازاقستان جازۋشىلار وداعىنىڭ نۇر-سۇلتان قالالىق فيليالىنىڭ توراعاسى داۋلەتكەرەي كاپ ۇلى, اقىن-جازۋشى, قازاقستان جازۋشىلار وداعىنىڭ قاراعاندى وبلىستىق فيليالىنىڭ توراعاسى سەرىك ساعىنتاي بار قازىلار القاسى اقىن قىز سالتانات قايىربەكتى «دۇنيەگە كەلەر ءالى تالاي قاسىم...» اتالىمى بويىنشا باس جۇلدەگە لايىقتى دەپ تانىدى. سونداي-اق بۇل اتالىمدا تۇركىستان وبلىسىنان كەلگەن باۋىرجان ەرمان ءبىرىنشى جۇلدەنى جەڭىپ السا, پاۆلودار وبلىسىنان قاتىسقان اسىلبەك مارتا ەكىنشى ورىن يەگەرى اتاندى. ال جۇلدەلى ءۇشىنشى ورىندى قاراعاندى وبلىسىنىڭ وكىلى بەك ىقىلاسوۆ قاناعات ەتتى.
«جاس داۋرەن» اتالىمى بويىنشا قاسىمنىڭ اندەرىن ورىنداپ سىنعا تۇسكەن ۇمىتكەرلەردىڭ ونەرىن ءانشى, قازاقستان رەسپۋبليكاسىنىڭ تۇڭعىش پرەزيدەنتى-ەلباسى قورى سىيلىعىنىڭ لاۋرەاتى سەرجان مۇسايىن جانە قازاقستاننىڭ مادەنيەت قايراتكەرى, ق.بايجانوۆ اتىنداعى كونتسەرتتىك بىرلەستىكتىڭ ءانشىسى داۋرەنبەك اركەنوۆ باستاعان قازىلار باعالاعان بولاتىن. بۇل اتالىمدا وساكاروۆ اۋدانىنان كەلگەن سايان بودەسوۆ باس جۇلدەنى جەڭىپ الدى. ءبىرىنشى جۇلدە نۇرسلان سايدالينگە بۇيىرسا, «ۇلدار» كۆارتەتى ەكىنشى ورىن يەگەرى اتاندى. ال ءۇشىنشى جۇلدەنى باقىتجان ۇيسىنباەۆ الدى.
جەڭىمپازدار مەن جۇلدەگەرلەردى ماراپاتتاۋ راسىمىندە باسپادان جاڭا شىققان «Qasym» اتتى كىتاپتىڭ تۇساۋكەسەرى ءوتتى. بۇل جيناققا تانىمال جازۋشىلاردىڭ قاسىم امانجولوۆ تۋرالى عىلىمي ماقالالارى, ەسسەلەرى, سىن ماتەريالدارى جانە ەستەلىكتەرى توپتاستىرىلعان.
ال قازاقستان جازۋشىلار وداعىنىڭ مۇشەسى, «ماعجان» باسپاسىنىڭ ديرەكتورى الماز مىرزاحمەت كەلەسى جىلى قاسىم امانجولوۆ اندەرىنىڭ باسىن قۇراعان كىتاپتى جارىققا شىعارۋ جوسپاردا بار ەكەنىن ايتتى.
قاراعاندى وبلىسى
