كۇدىكتىنى ىزدەۋ ىسىنە جۇمىلدىرىلعان جەدەل تەرگەۋ توبىنىڭ ىشىندە ۇلتتىق ۇلاننىڭ كينولوگى المات احمەتجانوۆ پەن ونىڭ تاربيەسىندەگى افينا اتتى يت تە بولعان.
قىلمىس بولعان جەردە شاشىلىپ جاتقان تيىنداردان ءيىس العان يت ءتارتىپ ساقشىلارىن كوپقاباتتى ۇيلەردىڭ ءبىرىنىڭ كىرەبەرىسىنە باستاپ كەلەدى. ءيتىنىڭ جاڭىلىسپاعانىن تەكسەرۋ ماقساتىندا كينولوگ افينانى قاندى وقيعا بولعان جەرگە قايتا اكەلىپ, ىزگە تاعى ءبىر مارتە سالعان. ءيىسشىل يت بولسا, باستاپقىداعى جولدان اۋىتقىماي, تۋرا ماناعى ۇيگە تاعى دا الىپ كەلىپ, كىرەبەرىس ەسىگىنىڭ الدىندا ۇرە باستايدى.
افينانىڭ قاتەلەسپەگەنىنە كوزى جەتكەن پوليتسيا قىزمەتكەرلەرى سىرتقى ەسىكتەن ىشكە ەنگەندە, كىرەبەرىستە تىعىلىپ وتىرعان ءبىر ەر ادامدى قولعا تۇسىرەدى. ءمان-جايدى انىقتاۋ بارىسىندا الگى كۇدىكتى اتالعان قىلمىسقا قاتىسى بارلىعىن, اتاپ ايتقاندا جوعارىدا ايتىلعان ەر ادامدى پىشاقتاعانىن مويىنداعان.
ءسويتىپ, افينا اتتى ءيىسشىل دە اقىلدى ءيتتىڭ ارقاسىندا جەزقازعاندىق ساقشىلار اسا اۋىر قىلمىسقا قاتىسى بار كۇدىكتىنى وسىلايشا ءىزىن سۋىتپاي قولعا ءتۇسىردى.
